ស្ទឹងត្រែង៖ ក្រុមបច្ចេកទេសស្ថាបនាផ្លូវស្ពាន នៃមន្ទីរសាធារណការ និងដឹកជញ្ជូន ខេត្តស្ទឹងត្រែង បានធ្វើការកែសម្រួលផ្លូវ៣៧៦F និងពន្លឿនការស្ថាបនាស្ពាន និងប្រព័ន្ធលូថ្មីចំនួន១២កន្លែង ដើម្បីធានាការធ្វើចរាចររបស់ប្រជាពលរដ្ឋនៅចុងឆ្នាំនេះ។

ក្នុងសកម្មភាពសាងសង់ប្រព័ន្ធលូតាមបណ្តោយផ្លូវថ្មី ចេញពីឃុំភ្លុកទៅដល់ផ្លូវបេតុងឆ្ពោះ ទៅ​ឃុំស្រែគរ ក្នុងស្រុកសេសាន ខេត្តស្ទឹងត្រែងលោក ស គឹមណាត ប្រធានមន្ទីរសាធារណការ និងដឹកជញ្ជូន បានបញ្ជាក់ថា ក្រុមការងារពន្លឿនការសាងសង់ប្រព័ន្ធលូ និងស្ពាន តាមបណ្តាញផ្លូវនេះ តភ្ជាប់ចេញពីភូមិឃុំភ្លុក ទៅដល់ទំនប់វ៉ារីអគ្គិសនីសេសានក្រោម២ ឱ្យឆាប់ហើយ ដើម្បីបន្តគម្រោងចាក់កៅស៊ូនៅឆ្នាំ២០២៣។

លោកបានឱ្យដឹងថា ផ្លូវនេះ ជាអំណោយរបស់រាជរដ្ឋាភិបាល ត្រូវបានស្ថាបនាឡើងនៅឆ្នាំ២០១៨។

ប្រជាពលរដ្ឋ បានគាំទ្រចំពោះការយកចិត្តទុកដាក់នេះ ព្រោះការអភិវឌ្ឍហេដ្ឋារចនាសម្ព័ន្ធ​ជា​ផ្នែកមួយ​ដែលនឹងដោះស្រាយបញ្ហាលំបាករបស់ប្រជាពលរដ្ឋ ។ ការតភ្ជាប់ផ្លូវជនបទនេះ ពិតជាបានបង្កលក្ខណៈងាយស្រួលដល់ប្រជាពលរដ្ឋ ធ្វើដំណើរពីតំបន់មួយទៅតំបន់មួយទៀត និងជាផ្នែកមួយជួយជំរុញឱ្យមានកំណើនសេដ្ឋកិច្ចគ្រួសារកសិករ។

តាមការឱ្យដឹង នេះជាផ្លូវថ្មី ដែលរាជរដ្ឋាភិបាលបានសម្រេចឱ្យសាងសង់ឡើង មានប្រវែង ១១គីឡូម៉ែត្រ ទទឹង៧ម៉ែត្រ ​បានផ្តល់ប្រយោជន៍យ៉ាងសំខាន់ដល់ប្រជាពលរដ្ឋ មកទទួលយក​សេវាសាធារណនៅទីរួមស្រុកសេសាន និងបានទាក់ទងគ្នាដោះដូរសេដ្ឋកិច្ច​ជា​លក្ខណៈគ្រួសារ​ទៅតាមតំបន់នីមួយៗ៕អត្ថបទ៖ មាស ផល្លា