ភ្នំពេញ៖ គិតត្រឹមបំណាច់ខែកក្កដា ឆ្នាំ២០២២ ក្រុមការងាររបស់បេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ បានចុះផ្សព្វផ្សាយពន្យល់អំពីការបង់ភាគទាន និងអត្ថប្រយោជន៍ដែលនឹងទទួលបាននាពេលអនាគតទៅដល់កម្មករនិយោជិត បុគ្គលិកសរុបចំនួនប្រមាណជាង ១២ម៉ឺននាក់ហើយ។

 ឯកឧត្តម ហេង សុផាន់ណារិទ្ធ ប្រធាននាយកដ្ឋានសេវាអតិថិជន និងទំនាក់ទំនងសាធារណៈ និងជាអ្នកនាំពាក្យ នៃបេឡាជាតិសន្តិសុខសង្គម ហៅកាត់ ប.ស.ស. បានឲ្យទូរទស្សន៍ព័ត៌មាន ប៊ីធីវី ដឹងនៅរសៀលថ្ងៃទី១ ខែសីហា នេះថា ក្រោយពីបានទទួលស្តាប់អំពីព័ត៌មានលម្អិតទាក់ទងរបបប្រាក់សោធននេះ បងប្អូនកម្មករមាន ក្តីត្រេកអ៊រ ពេញចិត្ត និងរីករាយក្នុងការចូលរួមបង់ភាគទាន ដែលជាចំណែករបស់ពួកគាត់ផងដែរ។

ជាមួយគ្នានេះ ឯកឧត្តម បានអំពាវនាវទៅដល់ម្ចាស់សហគ្រាស គ្រឹះស្ថាន និងកម្មករនិយោជិតទាំងអស់ ត្រូវចូលរួមអនុវត្តកាតព្វកិច្ចរបស់ខ្លួនប្រកបដោយស្មារតីទទួលខុសត្រូវខ្ពស់ និងពេញចិត្ត ដើម្បីទទួលបាន អត្ថប្រយោជន៍ស្តីពីរបបសន្តិសុខសង្គមផ្នែកប្រាក់សោធនថ្មីមួយនេះ ដែលជាកាដូដ៏ពិសេសបំផុតរបស់រាជរដ្ឋាភិបាលកម្ពុជា។

សូមបញ្ជាក់ថា របបសន្តិសុខសង្គមផ្នែកប្រាក់សោធន នឹងផ្តល់ឲ្យបុគ្គលិកក្នុងវិស័យឯកជន អាចទទួលបានអត្ថប្រយោជន៍របបនេះ ដូចនឹងបុគ្គលិកក្នុងវិស័យរដ្ឋដែរ។ ចំពោះការបង់ភាគលើរបបប្រាក់សោធននេះ សម្រាប់រយៈពេល៥ឆ្នាំដំបូង ត្រូវកំណត់ក្នុងអត្រាស្មើនឹង ៤ភាគរយ នៃប្រាក់ឈ្នួលជាប់ភាគទាន។ ក្នុងនោះ ២ភាគរយ ជាបន្ទុកនិយោជក និង ២ភាគរយ ជាបន្ទុកកម្មករនិយោជិត ហើយការបង់ភាគទានផ្នែកប្រាក់សោធនមួយនេះ ត្រូវធ្វើជាប្រចាំខែ៕ អត្ថបទ៖ បូរ៉ាវី