​​វាយ​កូន​បាល់​៖ គណៈកម្មាធិការ​ជាតិ​អូឡាំពិក​កម្ពុជា​(NOCC) បាន​បើក​វគ្គ​បណ្ដុះបណ្ដាល​គ្រូបង្វឹក​កីឡា​វាយ​កូន​បាល់​ ITF/OS ​ថ្នាក់​តំបន់​កម្រិត​ដំបូងសម្រាប់​អត្ត​ព​លិ​ក ដែលមាន​សិក្ខាកាម​ចំនួន ១៩​នាក់មកពី ៥​ប្រទេស​ចូលរួម រួមមាន​កម្ពុជា មី​យ៉ាន់​ម៉ា ទី​ម័​រ​ខាងកើត បង់​ក្លា​ដេ​ស និង​ហ្វី​ជី។​

​តាម​ការបញ្ជាក់​របស់​មន្ដ្រី​គណៈកម្មាធិការ​ជាតិ​អូឡាំពិក​កម្ពុជាបាន​ឲ្យ​ដឹងថា វគ្គ​នេះធ្វើឡើង​រយៈពេល ១២​ថ្ងៃចាប់ពី​ថ្ងៃទី​១ ដល់​ថ្ងៃទី​០១២ ខែសីហា ឆ្នាំ​២០២២ ជាមួយ​ការអនុវត្ត​ជាក់ស្ដែងនៅ​ទីលាន​វាយ​កូន​បាល់ នា​ពហុ​កីឡដ្ឋាន​ជាតិ​(​ស្ដា​ត​អូឡាំពិក​) ក្រោម​កិច្ចសហការ និង​ឧបត្ថម្ភ​គាំទ្រ​របស់​អង្គការ​សាមគ្គី​អូឡាំពិក​កម្ពុជា​(OS)។​ ​លោក ជា ពៅ អគ្គលេខាធិការ​សហព័ន្ធ​កីឡា​វាយ​កូន​បាល់​កម្ពុជាបាន​បញ្ជាក់ថា វគ្គ​បណ្ដុះបណ្ដាល​ជា​លក្ខណៈ​អន្ដរជាតិ​នេះ មាន​គ្រូឧទ្ទេស​កម្រិត​អន្ដរជាតិ ៣​រូបចូលរួម​បង្រៀន និង​ចែករំលែក​បទពិសោធន៍ រួមមាន​លោក​ Jonathan Stubbs ​លោក​ Gary Pucell ​និង​លោក​ Amir Borghei ​មកពី​សហព័ន្ធ​កីឡា​វាយ​កូន​បាល់​អន្តរជាតិ “ITF”​។​

​តាមរយៈ​ការរៀបចំ​វគ្គ​នេះ លោក​បានចាត់ទុក​ពិត​ជាមាន​សារៈសំខាន់​ណាស់ សម្រាប់​សិក្ខាកាម​ជា​គ្រូបង្វឹក​កីឡា​វាយ​កូន​បាល់​ក្នុង​តំបន់ពិសេស​គ្រូបង្វឹក​កម្ពុជា ដែល​ទទួលបាន​ការសិក្សា​ទាំង​ទ្រឹស្ដី និង​ការអនុវត្ត​ផ្ទាល់​លើ​ទីលានជាមួយ​អ្នកជំនាញ​អន្ដរជាតិ ដើម្បី​អភិវឌ្ឍន៍​សមត្ថភាព បច្ចេកទេស​ឲ្យ​កាន់តែ​ច្បាស់លាស់ ហើយ​ធ្វើការ​ចែករំលែក និង​បណ្ដុះបណ្ដាល​ដល់​កូនសិស្ស​កាន់តែ​ប្រសើរ និង​រីកចម្រើន​បន្ថែមទៀត៕

​អត្ថបទ៖ លី ឈុន​ឡា