ភ្នំពេញ៖ ខេត្តចំនួន៣បន្ថែមទៀត នឹងក្លាយជាខេត្តគ្មានមីននៅចុងឆ្នាំ២០២២ បន្ទាប់ពីអាជ្ញាធរមីន និងមជ្ឈមណ្ឌលសកម្មភាពកំចាត់មីនកម្ពុជា ហៅកាត់ថា (ស៊ីម៉ាក់) បានចុះកិច្ចសន្យា និងចាប់ផ្តើមប្រតិបត្តិការពីថ្ងៃនេះតទៅ។
ក្នុងនាមសម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងជាប្រធានអាជ្ញាធរមីន ឯកឧត្ដម ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន នៅថ្ងៃទី២ខែសីហានេះ បានអញ្ជើញជាអធិបតីក្នុងពិធីចុះកិច្ចសន្យាលើកិច្ចព្រមព្រៀងស្តីពីការងារបោសសម្អាតមីនក្នុងខេត្តចំនួន ០៥ រួមមាន ខេត្តតាកែវ ខេត្តកំពង់ចាម ខេត្តកំពង់ឆ្នាំង ខេត្តកំពត និងខេត្តស្វាយរៀង ព្រមទាំងត្រូវប្រកាសជាខេត្តអស់មីន ក្នុងទំហំផ្ទៃដីសរុបចំនួនជាង ៣០,៩១គីឡូម៉ែត្រក្រឡា ក្រោមគម្រោងសម្តេចតេជោ សម្រាប់សកម្មភាពមីន “ផ្តល់ដីសុវត្ថិភាព បង្កើតស្នាមញញឹម”។
ពិធីចុះកិច្ចព្រមព្រៀងនេះ ប្រព្រឹត្តិទៅរវាងអាជ្ញាធរមីន និងមជ្ឈមណ្ឌលសកម្មភាពកំចាត់មីនកម្ពុជា (CMAC) ដែលនឹងចាប់ផ្តើមប្រតិបត្តិការបោសសម្អាតមីន ចាប់ពីខែសីហា ឆ្នាំ២០២២តទៅ។
នៅក្នុងឱកាសខាងលើនោះ ឯកឧត្តម ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានថ្លែងថា បន្ទាប់ពីក្រុមការងារបច្ចេកទេសអាជ្ញាធរមីន និង ស៊ីម៉ាក់ សម្រេចចុះកិច្ចសន្យាបោសសម្អាតមីន គឺភាគីពាក់ព័ន្ធបានចុះពិនិត្យ និងវាយតម្លៃរួមគ្នានូវស្ថានភាពចម្ការមីនក្នុងខេត្តចំនួន៥ ដោយធ្វើការបោសម្អាតឲ្យអស់នៅចុងឆ្នាំ២០២២ និង២០២៣។
ខេត្តដែលត្រូវបោសម្អោតមីនឲ្យអស់នៅចុងឆ្នាំ២០២២ មាន៣ខេត្តរួមមាន៖ ខេត្តតាកែវ ខេត្តកំពង់ចាម និងខេត្តកំពង់ឆ្នាំ។ ដោយឡែកខេត្តពីរផ្សេងទៀតរួមមាន៖ ខេត្តកំពត និងខេត្តស្វាយរៀង ត្រូវធ្វើការបោសសម្អោតឲ្យអស់មីននៅឆ្នាំ២០២៣។ក្រៅពីនេះ ឯកឧត្ដម ទេសរដ្ឋមន្រ្តី បានថ្លែងអំណរគុណយ៉ាងជ្រាលជ្រៅបំផុតជូនចំពោះសម្តេចតេជោនាយករដ្ឋមន្រ្តី ដែលបានផ្តល់នូវកាដូពិសេសជូនដល់ប្រជាពលរដ្ឋកម្ពុជាទាំង ៥ ខេត្ត ដើម្បីធានានូវសុខសុវត្ថិភាព និងភាពសុខដុមរមនាក្នុងការរស់នៅ និងការប្រកបមុខរបរចិញ្ចឹមជីវិត។
គម្រោងសម្តេចតេជោ សម្រាប់សកម្មភាពមីន’”ផ្តល់ដីសុវត្ថិភាព បង្កើតស្នាមញញឹម’’ ក្នុងដំណាក់កាលដំបូង អាជ្ញាធរមីន បានបែងចែកឲ្យប្រតិបត្តិករដោះមីនជាតិសំខាន់ៗចំនួន៣ រួមមាន៖ បញ្ជាការដ្ឋានកងទ័ពជើងគោក, មជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់សង្រ្គាម និងមជ្ឈមណ្ឌលសកម្មភាពកំចាត់មីនកម្ពុជា (CMAC) ដោយជ្រើសរើសខេត្តត្បូងឃ្មុំ កំពត តាកែវ និងស្រុក/ក្រុងចំនួន៩ផ្សេងទៀត ដើម្បីបោសសម្អាតមីនឲ្យអស់៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
