​ភ្នំពេញ៖ ក្រោយទទួល​ស្តាប់​នូវ​បទបង្ហាញអំពី​អត្ថប្រយោជន៍​របប​សន្តិសុខ​សង្គមផ្នែក​ប្រាក់សោធន​រួចមក កម្មករ កម្មការិនីជាច្រើននៅរោងចក្រកាត់ដេរ ​បានបង្ហាញក្តីសប្បាយរីករាយ ​និងស្ម័គ្រចិត្ត ក្នុងការចូលរួមបង់ភាគទាន ដើម្បីទទួលបានររបបនេះ ​នៅពេលឈានចូលនិវត្តន៍ការងារ។

ក្នុង​កិច្ចសម្ភាសន៍​ផ្ទាល់ ​នៅព្រឹកថ្ងៃទី២​ ខែសីហា ឆ្នាំ២០២២នេះ ​ក្រុមកម្មករ​ កម្មការិនី​នៃក្រុមហ៊ុន វ៉ានលីន-ហ្សុងហេង (ខេមបូឌា) ​ហ្គាម៉ិនហ្វេកធើរី​ ស្ថិតនៅតំបន់ទួលសង្កែ ​ខណ្ឌឬស្សីកែវ រាជធានី​ភ្នំពេញ បានឲ្យដឹងថា ពួកគាត់​ពិតជារំភើប និង​ត្រេកអរ​ណាស់ បន្ទាប់ពីទទួល​បាន​ដំណឹង​ដ៏​រីករាយ​នេះ ព្រោះមិននឹកស្មានថា ​នឹងអាចមានប្រាក់ចូល​និវត្តន៍​ដូចមន្រ្តីរាជការទេ ខណៈដែលកន្លង​មក​ពួកគាត់ធ្លាប់​មានការព្រួយបារម្ភលើជីវភាពរស់នៅ​ ពេលឈាន​ដល់វ័យចាស់ជរា និង​គ្មានកម្លាំង​ធ្វើការងារដូចមុន ។

អ្នកនាង តាន់ គឹមសៀន ប្រធានរដ្ឋបាលរោងចក្រ បានបញ្ជាក់ឲ្យដឹងថា ទាក់ទិនការចូលរួមបង់​ភាគទាន​បន្ថែមទៅលើរបបប្រាក់សោធននេះ ​ភាគីនិយោជក នឹងគោរពនូវតាមការដាក់ចេញ​របស់​រាជរដ្ឋាភិបាល​ ជាពិសេសការបង់ទានទៅលើរបបសន្តិសុខសង្គមនានា ​ក្រុមហ៊ុនតែងតែចូលរួម និងទៀងទាត់ផងដែរ។

របបសន្តិសុខសង្គមផ្នែកប្រាក់សោធន (ប្រាក់រឺត្រែត)​ នឹងផ្តល់ឲ្យបុគ្គលិកក្នុងវិស័យឯកជន អាច​ទទួល​បានអត្ថប្រយោជន៍របបនេះ ​ដូចនឹងបុគ្គលិកក្នុងវិស័យរដ្ឋដែរ។ ចំពោះការបង់ភាគ​លើ​របប​ប្រាក់សោធន ​នឹងចាប់ផ្តើមពីដើមខែតុលាខាងមុខតទៅ ​សម្រាប់រយៈពេល៥ឆ្នាំដំបូង ត្រូវកំណត់​ក្នុង​អត្រាស្មើនឹង ៤ភាគរយ ​នៃប្រាក់ឈ្នួលជាប់ភាគទាន។

ក្នុងនោះ ២ភាគរយ ជាបន្ទុកនិយោជក ​និង ​២ភាគរយ ​ជាបន្ទុកកម្មករនិយោជិត ហើយ​ការ​បង់ភាគ​ទានផ្នែកប្រាក់សោធនមួយនេះ ត្រូវធ្វើជាប្រចាំខែ៕

អត្ថបទ៖ ឈិត បូរ៉ាវី