​ភ្នំពេញ៖ វិទ្យាស្ថានជាតិសង្គមកិច្ច ជាគ្រឹះស្ថានឧត្តមសិក្សាក្រោម ក្រសួងសង្គមកិច្ច អតីតយុទ្ធជន និងយុវនីតិសម្បទាកន្លងមកនេះ ក្រៅពីបណ្ដុះបណ្តាលធនធានមនុស្សកម្ពុជា វិទ្យាស្ថានក៏បាន​ស្រូបទាញ​សិស្សពីបរទេសជាង ៥០ប្រទេសមកសិក្សានៅកម្ពុជា ​លើមុខជំនាញ វិស្វកម្មឧបករណ៍​សប្បនិម្មិត ​និងរណប ផងដែរ។

វិទ្យាស្ថានជាតិសង្គមកិច្ច ខណៈពេលបច្ចុប្បន្ន គឺកំពុងបណ្ដុះធនធានមនុស្សលើការសិក្សា ​៩មុខវិជ្ជា ដែលសំដៅលើការងារបម្រើឱ្យវិស័យសង្គមកិច្ច។ ៩មុខវិជ្ជា គឺមាន ១មុខវិជ្ជា ជាមុខវិជ្ជាអន្តរជាតិ គឺមុខ​ជំនាញ ​វិស្វកម្មឧបករណ៍សប្បនិម្មិត​ និងរណប។ ​នេះជាការបញ្ជាក់របស់​ ឯកឧត្តម ខុម ផលលឿន ​នាយកវិទ្យាស្ថានជាតិសង្គមកិច្ច ​ក្នុងឱកាសចែកសញ្ញាបត្រជូនសិស្សជិត ២០០ នាក់ដែលបានបញ្ចប់ការសិក្សា។

ឯកឧត្តម នាយកវិទ្យាស្ថានលើកឡើងថា មុខជំនាញ ​វិស្វកម្មឧបករណ៍សប្បនិម្មិត និងរណប សម្រាប់​កម្ពុជា គឺមានការបណ្ដុះបណ្ដាលក្នុងវិទ្យាស្ថានសង្គមកិច្ចតែមួយប៉ុណ្ណោះ។ កម្មវិធីសិក្សាមួយនេះ ​ក៏មានការទទួលស្គាល់គុណភាពពី​ សមាគមអវយវៈ ISPO ។

នាយកវិទ្យាស្ថានក៏ បានបន្ថែមដែរថា ថ្មីៗនេះ វិទ្យាស្ថានក៏បានទទួលយកនិស្សិត​ មកពីប្រទេស មីយ៉ាន់ម៉ា ប្រមាណ ២០នាក់មកសិក្សាលើជំនាញនេះផងដែរ ​ខណៈសាលានៅប្រទេសមីយ៉ាន់ម៉ា បានបិទទ្វារ។

ក្នុងឱកាសប្រគល់សញ្ញាបត្រជូននិស្សិតបញ្ចប់ការសិក្សានាថ្ងៃនេះ ឯកឧត្តម វង សូត រដ្ឋមន្រ្តីក្រសួង​សង្គមកិច្ច ​ក៏បានកោតសសើរចំពោះវិទ្យាស្ថាន ដែលព្យាយាម​ក្នុងការបង្កើត​ធនធានមនុស្ស​បម្រើ​ដល់វិស័យសង្គមកិច្ច។

ឯកឧត្តម បន្តថា ធនធានមនុស្សក្នុងវិស័យសង្គមកិច្ច​ គឺមានតម្រូវការច្រើនសម្រាប់សង្គមបច្ចុប្បន្ន ជាក់ស្ដែងក្រសួងមានគោលដៅរៀបចំឱ្យមាន​ អ្នកសង្គមកិច្ចអាជីព​ រឺអ្នកសង្គមកិច្ចអាជីពរង ឱ្យបាន​២នាក់​ក្នុងមួយឃុំសង្កាត់​ ក្នុងការដោះស្រាយបញ្ហានានា​ជូនប្រជាពលរដ្ឋ។

ឯកឧត្តម រដ្ឋមន្រ្តី នៅថ្ងៃនេះ​ ក៏បានផ្ដល់ដំបូន្មានដល់និស្សិតទទួលសញ្ញាបត្រទាំងអស់ ត្រូវយក​សមត្ថភាព​ដែលទទួលបានពីការបណ្ដុះបណ្ដាល ​ទៅប្រើប្រាស់ឱ្យចំគោលដៅ ​មានប្រសិទ្ធភាព នៅតាមស្ថាប័នរដ្ឋ ​ឯកជន បណ្ដាអង្គការជាដើម៕ អត្ថបទ៖ គឹមហុក