​មី​យ៉ាន់​ម៉ា៖ ក្រុម​មេដឹកនាំ​របប​សឹក​មី​យ៉ាន់​ម៉ា​និយាយថា ពួកគេ​នឹង​អនុវត្តន៍​ផែនការ​ដែល​ត្រូវ​បាន​ស្នើ​ឡើង​ដោយ​សមាគម​ប្រជាជាតិ​អាស៊ីអាគ្នេយ៍​ហៅ​កាត់​ថា ​អាស៊ាន (ASEAN) ដើម្បី​បញ្ចប់​ជម្លោះ​ក្នុង​ប្រទេស​នេះ​។ ​

​មេដឹកនាំ​យោធា​លោក Min Aung Hlaing បាន​និយាយ​ថា ផែនទី​វិថី​ ៥​ចំណុច​នឹង​ត្រូវ​អនុវត្តន៍​តាម​លទ្ធភាព​ដែល​អាច​ធ្វើ​ទៅ​បាន ខណៈ​ស្ថានភាព​បាន​ប្រសើរ​ឡើង​នៅ​គ្រប់​មុខព្រួញ​ទាំងអស់​។ ផែន​ការ​នេះអំពាវនាវ​ឲ្យ​វ​បញ្ចប់​អំពើ​ហិង្សា​ជាបន្ទាន់​។ សារព័ត៌មាន​រដ្ឋ​បាន​និយាយ​ថា​ ក្រុមប្រឹក្សា​យោធា​នឹង​បន្ត​ដាក់​រដ្ឋ​ក្នុង​គ្រាអាសន្ន​រយៈពេល​ ៦​ខែ​បន្ថែម​ទៀត​។ ក្រុម​ឧត្ដមសេនីយ៍​បាន​ប្រកាស​ដាក់​ប្រទេស​ក្នុង​គ្រាអាសន្ន​កាលពី​ខែ​កុម្ភៈ​ឆ្នាំមុន ក្រោយ​ដណ្ដើម​អំណាច​ពី​រដ្ឋាភិបាល​ជាប់ឆ្នោត​ដឹកនាំ​ដោយ​លោកស្រី Aung San Suu Kyi​។ របប​សឹក​គ្រោង​នឹង​រៀបចំ​ការបោះឆ្នោត​នៅ​ខែ​សីហា​ឆ្នាំ​ក្រោយ ប៉ុន្តែ​ក្រុម​ប្រឆាំង ឬក្រុម​ជំទាស់​មិន​ជឿ​ថា​ ការបោះឆ្នោត​នេះ​នឹង​ប្រព្រឹត្តទៅ​ដោយមាន​ភាព​ត្រឹមត្រូវ​ និង​សេរី​នោះ​ទេ​។

​សហភាព​មី​យ៉ាន់​ម៉ា​បាន​ធ្លាក់​ក្នុង​ភាព​ចលាចល​ចាប់​តាំង​ពី​រដ្ឋប្រហារ។ យោធា​បាន​បង្ក្រាប​ការ​តវ៉ា​ទូទាំង​ប្រទេស​។ ក្រុម​សិទ្ធិ​មនុស្ស​និយាយ​ថា​ ជន​ស៊ីវិល​ជាង 2,100​នាក់​បាន​ស្លាប់​ចាប់​តាំង​ពី​រដ្ឋាភិបាល​បាន​ផ្ដួល​រំលំ​។​ រដ្ឋាភិបាល​ជប៉ុនបាន​បញ្ជាក់​កាលពី​ថ្ងៃ​ចន្ទ​ថា កងកម្លាំង​សន្តិសុខ​ក្នុង​សហភាព​មី​យ៉ាន់​ម៉ា​បាន​ឃុំ​បុរស​ជនជាតិ​ជប៉ុន​ម្នាក់ ដែល​ត្រូវ​គេ​គិត​ថា​ជា​អ្នកសារព័ត៌មាន​ដែល​កំពុង​រាយការណ៍​ពី​ការ​តវ៉ា​។ ASEAN នឹង​រៀបចំ​កិច្ចប្រជុំ​ថ្នាក់​រដ្ឋមន្ត្រីការបរទេស​ចាប់ពី​ថ្ងៃ​ពុធ​ស្អែក​នេះ រួម​ទាំង​មួយ​រូប​មកពី​សហរដ្ឋ​អាមេរិក ហើយ​ចិន​ក៏​នឹង​ចូលរួម​ដែរ៕

អត្ថបទ៖ សុខមាន