កំពង់ធំ៖ ជំនន់ទឹកភ្លៀង កំពុងលិចលង់ក្នុងក្រុង-ស្រុកចំនួន៥ នៅក្នុងខេត្តកំពង់ធំ បានប៉ះពាល់​ដល់ដំណាំស្រូវជាង ៧០០០ហិកតា ខណៈឯកឧត្តមទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម) កំពុងចុះពិនិត្យផលប៉ះពាល់ ដើម្បីស្ដារឡើងវិញ ។

 យោងតាមរបាយការណ៍មន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ បានឲ្យដឹងថា គិតត្រឹមថ្ងៃទី១ ខែសីហា ឆ្នាំ២០២២ សម្រាប់ស្រុកដែលកំពុងជួបបញ្ហាជំនន់ទឹកភ្លៀងនោះ មាន​ស្រុកកំពង់ស្វាយ, ស្រុកបារាយណ៍ ស្រុកតាំងគោក ក្រុងស្ទឹងសែន និងស្រុកសន្ទុក សរុបចំនួន​២៤ឃុំ ហើយជំនន់ទឹកភ្លៀងនេះ បានបណ្ដាលឲ្យប៉ះពាល់ស្រូវ របស់ប្រជាពលរដ្ឋជាង ៧ ០០០ហិកតា និងរងការខូចខាតជាង ៣០០០ហិកតា ។

ក្នុងពេលចុះពិនិត្យស្ថានភាពជំនន់ទឹកភ្លៀង មានការចូលរួមពីមន្ត្រីក្រសួងពាក់ព័ន្ធ ឯកឧត្តម ងួន រតនៈ អភិបាលខេត្តកំពង់ធំ នៅថ្ងៃទី២ ខែសីហា ឆ្នាំ២០២២ ឯកឧត្តម គន់ គីម បានណែនាំឱ្យ​លេខាធិការដ្ឋាន​គ្រប់គ្រងគ្រោះមហន្តរាយខេត្ត បន្តតាមដាន និងធ្វើបច្ចុប្បន្នភាព ឱ្យបានជាប់​ប្រចាំ​ពីផលប៉ះពាល់ និងខូចខាតដែលមានជាបន្តបន្ទាប់ទៀតនោះ ដើម្បីងាយស្រួល​ដល់ខាង​ស្បៀង​បម្រុង ធ្វើការផ្តល់ជូនគ្រាប់ពូជស្រូវ សម្រាប់ធ្វើការស្តារឡើងក្រោយទឹកបានស្រកអស់ និងត្រូវមានវិធានការឆ្លើយតបបានទាន់ពេលវេលា ប្រកបដោយប្រសិទ្ធភាព​សំដៅ​កាត់បន្ថយ​បាន​ផលប៉ះពាល់ឱ្យនៅកម្រិតទាបបំផុត ដោយផ្តោតជាអាទិភាពខ្ពស់ ចំពោះអាយុជីវិតមនុស្ស ។

ឯកឧត្តមរំពឹងទុកចំនួន ៧ចំណុច ត្រូវបានដាក់ចេញក្នុងផែនការត្រៀមបម្រុង សម្រាប់​ឆ្លើយ​តប​គ្រោះមហន្តរាយ ទឹកជំនន់សម្រាប់រាជធានី-ខេត្ត រួមមាន ១. ពលរដ្ឋរងគ្រោះគ្មាន ឬ​ប្រឈម​នឹង​ការ​គ្មាន​ជម្រកស្នាក់នៅ នឹងទទួលបានការជួយជម្លៀស ទៅ​កាន់​ទីទួល​សុវត្ថិភាព​បានទាន់ពេលវេលា និងមានសុវត្ថិភាព, ២. ការស្នាក់នៅ​បណ្តោះអាសន្ន​នឹងទទួល​បាន​ការ​ការពារសុវត្ថិភាព ពីហានិភ័យនានា ដែលអាចកើតមានជាយថាហេតុ, ៣. មានជម្រក​សមរម្យ​សម្រាប់​ការស្នាក់នៅបណ្ដោះអាសន្ន, ៤. ទទួលបានទឹកស្អាតគ្រប់គ្រាន់ សម្រាប់បរិភោគ ប្រើ​ប្រាស់ និងមានអនាម័យ, ៥. ទទួលបានស្បៀងអាហារជាអង្ករ គ្រឿងឧបភោគបរិភោគ និង​បរិក្ខារ​ចម្អិនគ្រប់គ្រាន់, ៦. ទទួលបានសេវាកម្មសុខភាពបឋមនៅនឹងកន្លែង និង៧. ពលរដ្ឋរងគ្រោះ​ដោយ​ទឹកជំនន់ ទទួលបានព័ត៌មាននានា ពីស្ថានភាពគ្រោះមហន្តរាយទឹកជំនន់ និង ព័ត៌មាន​ចាំបាច់មួយចំនួន ពីប្រតិបត្តិការឆ្លើយតបសង្គ្រោះបន្ទាន់ ដែលពាក់ព័ន្ធដល់គេ ៕ អត្ថបទ៖ បាន សុខរិទ្ធិ