ភ្នំពេញ ៖ លោក ឡេង រ៉ាវង្ស អភិបាលរងខណ្ឌជ្រោយចង្វារ ប្រាប់BTV ព័ត៌មាននាព្រឹកថ្ងៃទី១ មេសា ២០២១នេះថា ក្នុងមូលដ្ឋានខណ្ឌជ្រោយចង្វារ បានផ្តល់ការចាក់វ៉ាក់សាំងបង្ការជំងឺកូវីដ១៩ ចំនួន២គោលដៅ ជូនប្រជាពលរដ្ឋអាយុ៦០ឆ្នាំឡើង និងបុគ្គលិកអប់រំទាំងឯកជន និងសាធារណៈ។

​

លោក បន្តថា នៅក្នុងខណ្ឌជ្រោយចង្វារ សម្រាប់ប្រជាពលរដ្ឋមានអាយុចាប់ពី៦០ឆ្នាំឡើង មានចំនួនប្រហែល៦០០០នាក់ ដែលត្រូវទទួលបានការចាក់វ៉ាក់សាំងបង្ការជំងឺកូវីដ១៩ ប្រភេទកូវីសែល។ ចាប់តាំងពីបើកយុទ្ធនាការ១៥ថ្ងៃ នៃការចាក់វ៉ាក់សាំងកូវីដ១៩ សម្រាប់លើមនុស្សអាយុ៦០ឆ្នាំឡើងទៅ ពីថ្ងៃទី២៣ រហូតមកដល់ថ្ងៃទី៣១ មីនាម្ស៊ិលម៉ិញ ក្រុមការងារគ្រូពេទ្យនៅមណ្ឌលសុខភាពជ្រោយចង្វារ បានចាក់វ៉ាក់សាំងកូវីដ១៩ ប្រភេទកូវីសែលនេះ ជូនប្រជាពលរដ្ឋអាយុ៦០ឆ្នាំឡើង បានចំនួនប្រហែល៣០០០នាក់។ ដូច្នេះយើងនៅសល់ប្រមាណជា៥០%ទៀត ដែលត្រូវផ្តល់វ៉ាក់សាំងកូវីដ១៩ជូនប្រជាពលរដ្ឋ។ ទន្ទឹមនឹងនោះបើតាមការឲ្យដឹងពីក្រុមគ្រូពេទ្យដែលបានទទួលវ៉ាក់សាំងបង្ការជំងឺកូវីដ១៩ ដែលក្នុងមូលដ្ឋានខណ្ឌទទួលបាន មានចំនួន៣៩៩០ដូស ដែលត្រូវចាក់វ៉ាក់សាំងជូនប្រជាពលរដ្ឋ ប៉ុន្តែឥលូវនេះអាជ្ញាធរមូលដ្ឋានកំពុងព្យាយាមគៀងគរប្រជាពលរដ្ឋ ក៏ដូចជាផ្សព្វផ្សាយអំពីសារប្រយោជន៍ នៃការផ្តល់វ៉ាក់សាំងជូនប្រជាពលរដ្ឋ ពីព្រោះប្រជាពលរដ្ឋអាយុ៦០ឆ្នាំឡើង ជាអ្នកប្រឈមនឹងជំងឺកូវីដ១៩ ខ្លាំងជាង អ្នកដែលមានវ័យជំទង់។

​

ទន្ទឹមគ្នានោះដែរប្រជាពលរដ្ឋអាយុចាប់ពី៦០ឆ្នាំឡើង បានមកចាក់វ៉ាក់សាំងបង្ការជំងឺកូវីដ១៩ ប្រភេទ កូវីសែល បាននិយាយស្រដៀងគ្នាថា ភូមិ សង្កាត់ បានឲ្យគាត់មកចាក់វ៉ាក់សាំងកូវីដ១៩ ដើម្បីយកឈ្នះជំងឺកូវីដ១៩ ដែលមានឈ្មោះ និងអាយុចាប់ពី៦០ឆ្នាំឡើងទៅ និងសូមថ្លែងអំណរគុណដល់រាជរដ្ឋាភិបាលកម្ពុជា ក្រសួងសុខាភិបាល អាជ្ញាធរខណ្ឌ សង្កាត់ បានអនុញ្ញាតឲ្យ គាត់មកចាក់វ៉ាក់សាំងកូវីដ១៩នេះ។

ជាចុងក្រោយ លោក ឡេង រ៉ាវង្ស បានបញ្ជាក់ថា ក្នុងព្រឹតិ្តការណ៍សហគមន៍ ២០ កុម្ភះ ក្នុងមូលដ្ឋានខណ្ឌជ្រោយចង្វារ អ្នកវិជ្ជមានកូវីដ១៩ មានចំនួនជាង១០នាក់ និងមួយចំនួនធំ ក៏បានជាសះស្បើយពីជំងឺកូវីដ១៩នេះផងដែរ។ ដោយឡែកអ្នកវិជ្ជមានកូវីដ១៩ ដែលកំពុងសម្រាកព្យាបាលជំងឺនៅមនី្ទរពេទ្យ មានចំនួន៨នាក់ នឹងទីតាំងដែលត្រូវបិទមិនឲ្យមានការអនុញ្ញាតឲ្យចេញ-ចូល មានចំនួន៧ទីតាំង ហើយនឹងទីតាំងដែលកំពុងធ្វើចត្តាឡីស័ក មានចំនួន៥ទីតាំងផ្សេងទៀត៕.អត្ថបទ ៖ រដ្ឋា