កោះកុង៖ ប្រជាពលរដ្ឋនៅតាមបណ្តាក្រុងស្រុកនីមួយៗក្នុងខេត្តកោះកុង បានទទួល​វ៉ាក់សាំង​ដូសជំរុញ ដូសទី៤ និងទី៥​ ហាក់មិនសូវលឿនតាមផែនការ ខណៈក្រុមអាទិភាព​បានចាក់ដូសទី៥ រួចរាល់អស់ហើយ។

លោកវេជ្ជបណ្ឌិត ទៅ ម៉ឹង ប្រធានមន្ទីរសុខាភិបាលខេត្តកោះកុង បានឱ្យដឹងកាល​ពីថ្ងៃទី១សីហា ម្សិលមិញនេះថា ល្បឿននៃដំណើរការចាក់វ៉ាក់សាំងបង្ការជំងឺកូវីដ-១៩ ជូនពលរដ្ឋក្នុង​មូលដ្ឋាន​ខេត្តនៅតែយឺតយ៉ាវដដែល សម្រាប់ដូសទី៤ និងដូសទី៥។ ទោះបីជាបែងចែករៀបចំ​ផែនការ​ទៅ​ដល់ខ្នងផ្ទះប្រជាពលរដ្ឋឆ្ងាយដាច់ស្រយោលតាមក្រុងស្រុកយ៉ាងណាក៏ដោយ។

លោកវេជ្ជបណ្ឌិត ទៅ ម៉ឹង សម្តែងក្តីបារម្ភអំពីការឆ្លង រីករាលជំងឺកូវីដ-១៩ ខណៈកម្ពុជា​រកឃើញ​អត្រាអ្នកឆ្លងឡើងវិញ ដោយ​ទទូច​ដល់ប្រជាពលរដ្ឋ ​ដែលមិនទាន់ចាក់​វ៉ាក់សាំង​ដូសជំរុញ ចាប់ពីដូសទី៣ ​ដល់ដូសទី៥ ឱ្យបានគ្រប់គ្នា ។

លោកវេជ្ជបណ្ឌិតប្រធានមន្ទីរសុខាភិបាល ​បានបន្ថែមថា​ ប្រជាពលរដ្ឋ អាចមកទទួលសេវាចាក់វ៉ាក់​សាំងគ្រប់ដូសតាមតម្រូវការនៅតាមមណ្ឌលសុខភាព​ ឬប៉ុស្តិ៍សុខភាព ដែលនៅជិតផ្ទះក្នុងភូមិឃុំ​សង្កាត់​នីមួយៗ។

យោងតាមរបាយការណ៍លទ្ធផលចាក់វ៉ាក់សាំងរបស់រដ្ឋបាលខេត្តកោះកុង ​បង្ហាញថា គិតបំណាច់ ខែកក្កដា ឆ្នាំ២០២២ មានប្រជាពលរដ្ឋ ក្រុមមន្រ្តីរាជការ គ្រូពេទ្យ ​និងកងកម្លាំងប្រដាប់អាវុធ ចំនួន ២.៩១០នាក់បានចាក់វ៉ាក់សាំងដូសទី៥។ ​រីឯដូសទី៤បាន១ម៉ឺន៤ពាន់នាក់ និងដូសទី៣ បានចាក់វ៉ាក់សាំងសរុប៨ម៉ឺន៥ពាន់នាក់៕អត្ថបទ៖ ឈឹម មករា