ភ្នំពេញ ៖ ថ្នាក់ដឹកនាំ និងមន្រ្តីរាជការទាំងអស់នៃគណៈកម្មាធិការជាតិគ្រប់គ្រងគ្រោះមហន្តរាយ ប្រកាសគាំទ្រយ៉ាងពេញទំហឹងលើការធ្វើវិសោធនកម្មរដ្ឋធម្មនុញ្ញ លើកទី១០ ដែល រដ្ឋ សភា ជាតិ បានអនុម័តរួច។ ការធ្វើវិសោធនកម្មលើកទី១០នេះ មានសារៈសំខាន់បំផុត ដើម្បីចូលរួម ចំណែក យ៉ាងសំខាន់ក្នុងការលើកកម្ពស់ប្រព័ន្ធប្រជាធិបតេយ្យ សេរីពហុបក្ស និងចូលរួមធានា ដល់ស្ថាប័នកំពូលរបស់ជាតិ ឲ្យដំណើរការប្រព្រឹត្តទៅបានល្អ ដោយរលូនមិនជាប់គាំង ពិសេសការពាររបបរាជានិយមអាស្រ័យរដ្ឋធម្មនុញ្ញ ដើម្បីការអភិវឌ្ឍប្រទេសជាតិមាតុភូមិឲ្យកាន់តែរីកចម្រើនលើគ្រប់វិស័យ ប្រកបដោយសុខដុមរមនា។

សូមជំរាបថា ការធ្វើវិសោធនកម្មមាត្រា ១៩ថ្មី (មួយ) មាត្រា៨៩ មាត្រា៩៨ ថ្មី មាត្រា ១០២ថ្មី មាត្រា ១១៩ថ្មី (មួយ) និង មាត្រា ១២៥ថ្មី នៃរដ្ឋធម្មនុញ្ញ នៃ ព្រះ រា ជាណាចក្រកម្ពុជា និងមាត្រា៣ថ្មី និង មាត្រា៤ថ្មី នៃ ច្បាប់ធម្មនុញ្ញបន្ថែមដែលត្រូវបានរដ្ឋសភាសម្រេច អនុម័តទាំងស្រុងក្រោមសំឡេងគាំទ្រ ១០៥លើ១០៦សំឡេង ក្នុងសម័យប្រជុំពេញអង្គ កាលព្រឹកថ្ងៃទី២៨ ខែកក្កដា ឆ្នាំ២០២២ កន្លងទៅ។