ភ្នំពេញ៖ ផែនការបោះផ្សាយ និងជួញដូរមូលបត្ររបស់រដ្ឋ ចំនួនប្រមាណ ៣០០ លានដុល្លារអាមេរិក នឹងឈានទៅបោះផ្សាយលក់មូលបត្រនេះ ឆាប់ៗនេះ ខណៈការរៀបចំលើបញ្ហាបច្ចេកទេស បានអនុវត្តដោយពេញលេញ និងគ្រប់ជ្រុងជ្រោយស្ទើរទាំងស្រុង។

ឯកឧត្តម មាស សុខសេនសាន អគ្គលេខាធិការ និងជាអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លើកឡើងនៅក្នុងសន្និសីទសារព័ត៌មានស្តីពី “សមិទ្ធផលសម្រេចបាន រយៈពេល៥ឆ្នាំ ពីឆ្នាំ ២០១៧-ឆ្នាំ២០២១ របស់ក្រសួងសេដ្ឋកិច្ច និងហិរញ្ញវត្ថុ” នៅថ្ងៃទី ២ ខែ សីហា ឆ្នាំ ២០២២ នេះថា នេះជាលើកទី១ហើយ ដែលកម្ពុជាបានរៀបចំការបោះផ្សាយ និងជួញដូរមូលបត្ររដ្ឋ ដែលមានទំហំសរុបប្រមាណ ១,២ ទ្រីលានរៀល ត្រូវប្រមាណ ៣០០ លានដុល្លារអាមេរិក។

ឯកឧត្តមបន្តថា ជុំវិញការបោះផ្សាយមូលបត្រនេះ រដ្ឋត្រូវការវិនិយោគ និងត្រូវការហិរញ្ញប្បទានក្រៅប្រទេស ក្នុងនោះការបោះផ្សារមូលបត្រនេះ គឺជាការបំពេញហិរញ្ញប្បទាន ដោយផ្តល់លទ្ធភាពដល់ក្រុមហ៊ុនក្នុងស្រុកអាចទិញមូលបត្របាន នៅក្នុងអត្រាសមរម្យ ជាជាងកម្ពុជាទៅកម្ចីពីដៃគូរបរទេសនានា។

បច្ចុប្បន្នគម្រោងការបោះផ្សាយ និងជួញដូរមូលបត្ររដ្ឋនេះ ត្រូវបានរដ្ឋសភាអនុម័តរួចរាល់ ហើយអ្វីដែលសេសសល់បន្ត គឺក្រុមការងារបច្ចេកទេសកំពុងប្រជុំស្ទាបស្ទង់ និងពិនិត្យឡើងវិញ ដែលកាងារនេះក្រសួងបានអនុវត្តពេញលេញ និងគ្រប់ជ្រុងជ្រោយស្ទើរទាំងស្រុងហើយ ដោយនៅរង់ចាំតែពេលវេលា ដើម្បីការបោះផ្សាយ និងជួញដូរមូលបត្រនេះតែប៉ុណ្ណោះ។

រាជរដ្ឋាភិបាល បានសម្រេចនូវវឌ្ឍនភាពគួរឱ្យកត់សម្គាល់ក្នុងនោះមាន៖ ការដាក់ចេញនូវលិខិតបទដ្ឋានគតិយុត្តសំខាន់ៗជាច្រើនដូចជា៖ ប្រកាសស្តីពីការបោះផ្សាយលក់មូលបត្ររដ្ឋ, អនុក្រឹត្យស្តីពីការលើកទឹកចិត្តពន្ធដារ ក្នុងវិស័យមូលបត្ររដ្ឋ, សារាចរណែនាំស្តីពីការអនុវត្តចំពោះមូលបត្ររដ្ឋ ដែលកាន់កាប់ដោយគ្រឹះស្ថានធនាគារ និងហិរញ្ញវត្ថុ, និងការកំណត់ទំហំបោះផ្សាយលក់មូលបត្ររដ្ឋក្នុងច្បាប់ស្តីពីហិរញ្ញវត្ថុសម្រាប់ការគ្រប់គ្រង ឆ្នាំ២០២២ ដែលច្បាប់នេះ បានអនុញ្ញាតឱ្យរាជរដ្ឋាភិបាលបោះផ្សាយលក់មូលបត្ររដ្ឋ ក្នុងទំហំសរុបប្រមាណ ១,២ ទីលានរៀល ត្រូវប្រមាណ ៣០០ លានដុល្លារ៕អត្ថបទ៖ សុន រ៉ាឌី