អាមេរិក៖ រូបភាពវីដេអូកាមេរ៉ាសុវត្ថិភាព បង្ហាញពីសកម្មភាពគួរឲ្យតក់ស្លុតចំពោះសកម្មភាពដ៏សាហាវព្រៃផ្សៃ។ ស្ត្រីអន្តោប្រវេសន៍ជនជាតិហ្វីលីពីនម្នាក់វ័យ ៦៥ឆ្នាំកំពុងដើរនៅតាមផ្លូវមួយកន្លែងក្បែរទីលានចតុរ៉ង់ Times Square នៅពេលមានបុរសម្នាក់បានលោតទាត់ធាក់ស្ត្រីរូបនេះ ចំពោះពេញទំហឹងទាំងកណ្ដាលថ្ងៃត្រង់។
យោងតាមមន្ត្រីនគរបាលម្នាក់ឲ្យដឹងថា បុរសនោះបានទាត់ស្ត្រីនោះមួយជើងហើយមួយជើងទៀតចំក្បាល។ គេបានស្រែកជេរប្រទេចដាក់ស្ត្រីនោះ ហើយបន្ទាប់មកនិយាយថា អ្នកមិនមែនជាមនុស្សរស់នៅទីនេះទេ។ ខណៈសកម្មភាពប្រើអំពើហិង្សាបានកើតឡើង នៅក្នុងទីក្រុង Manhattan បុរស ៣នាក់បានឈរមើលចេញពីបន្ទប់រង់ចាំ ក្បែរអគារប្រណីតមួយ។ នៅពេលដែលស្ត្រីជនជាតិហ្វីលីពីនបានព្យាយាមក្រោកឈរ ម្នាក់ក្នុងចំណោមបុរស ៣នាក់ជាសន្តិសុខបានបិទទ្វារតែម្ដង។ បើទោះបីជាមានសេចក្ដីរាយការណ៍ជាច្រើន និយាយពីការស្អប់ខ្ពើមប្រឆាំងនឹងជនជាតិអាស៊ី បានកើនឡើងនៅក្នុងរយៈពេលប៉ុន្មានសប្ដាហ៍ថ្មីៗនេះយ៉ាងណាក៏ដោយ ក៏រូបភាពវីដេអូដែលត្រូវបានបញ្ចេញដោយក្រុមមន្ត្រីនគរបាល កាលពីល្ងាចថ្ងៃច័ន្ទបានបង្កឲ្យមានការភ័យខ្លាចថ្មីៗបន្ថែមទៀតដែរ។
នគរបាលបាននិយាយកាលពីថ្ងៃពុធថា បុរសជាជនសង្ស័យម្នាក់ដែលបានវាយដំ ហិង្សាលើស្ត្រីអាមេរិកមានដើមកំណើតអាស៊ីម្នាក់ទាំងពេលថ្ងៃ ត្រូវបានចាប់ខ្លួនបន្ទាប់ពីរូបភាពវីដេអូក្នុងកាមេរ៉ាសុវត្ថិភាព នៃការវាយប្រហារបាននាំឲ្យមានការថ្កោលទោសយ៉ាងខ្លាំងនោះ។ នាយកដ្ឋាននគរបាលក្រុង New York បាននិយាយថា ក្រុមមន្ត្រីបានចាប់ខ្លួនបុរសឈ្មោះ Brandon Elliot វ័យ ៣៨ឆ្នាំជាអ្នកក្រុង New York ដែលប្រឈមនឹងបទចោទប្រកាន់នៃការវាយប្រហារ ដូចជាបទវាយដំដោយភាពស្អប់ខ្ពើម ការវាយដំដោយមានការគ្រោងទុក ជាការស្អប់ខ្ពើម ការវាយដំលើរាងកាយដោយមានចេតនា៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
