ភ្នំពេញ៖ ក្រសួងសុខាភិបាល បាននិយាយក្នុងសេចក្ដីប្រកាសព័ត៌មាន​នៅថ្ងៃនេះថា ស្ត្រីខ្មែរ ០២នាក់​ទៀត ម្នាក់អាយុ ៦៧ឆ្នាំ និងម្នាក់ទៀតអាយុ ៧០ឆ្នាំ បានស្លាប់ដោយសារជំងឺកូវីដ១៩ ដែលធ្វើឱ្យចំនួន​មនុស្សស្លាប់​ដោយសារជំងឺផ្លូវ​ដង្ហើម​មួយ​នេះ​​នៅកម្ពុជា កើនឡើងដល់ ១៦ករណីហើយ។

បើតាមក្រសួងសុខាភិបាលស្ត្រីខ្មែរវ័យ ៧០ឆ្នាំ ត្រូវបានរកឃើញឆ្លងមេរោគកូវីដ១៩ នៅថ្ងៃ២៥ ខែមីនា ហើយត្រូវបានបញ្ជូនទៅសម្រាកព្យាបាលនៅមណ្ឌលសុខភាពចាក់អង្រែនៅថ្ងៃនោះដដែល មុន​នឹង​បញ្ជូន​ទៅ​ព្យាបាល​បន្ត​នៅ​មន្ទីរ​ពេទ្យ​មិត្តភាព​ខ្មែរ-សូវៀត។

ចំណែកស្ត្រីខ្មែរអាយុ ៦៧ឆ្នាំវិញ ក្រសួងសុខាភិបាលបញ្ជាក់ថា ត្រូវបានរកឃើញឆ្លងមេរោគកូវីដ​១៩ នៅថ្ងៃទី២៣ ខែមីនា ហើយត្រូវបានបញ្ជូនទៅសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត នៅ​ថ្ងៃនេះដដែល។

ក្រសួងសុខាភិបាលបញ្ជាក់ថា ស្ត្រីខ្មែរទាំង ០២នាក់នេះ បានស្លាប់ដោយសារតែជំងឺកូវីដ​១៩ ដែល បានវាយប្រហារសួតទាំងសងខាងរបស់ពួកគាត់។

គិតត្រឹមថ្ងៃទី០១ ខែមេសានេះ មនុស្ស ១៦នាក់ហើយ ត្រូវបានក្រសួងសុខាភិបាលប្រកាសថា បាន ស្លាប់ដោយសារជំងឺកូវីដ ១៩ នៅក្នុងរយៈពេលត្រឹម ៣សប្ដាហ៍ចុងក្រោយប៉ុណ្ណោះ៕