ភ្នំពេញ៖ ក្រុមហ៊ុនវិនិយោគទុន​អាណិកជន​កម្ពុជា អូស៊ីអាយស៊ី (OCIC) កាលពីរសៀលថ្ងៃទី២ ខែសីហា ឆ្នាំ២០២២នេះ បានចុះអនុស្សារណៈជាមួយគ្នា ក្រុមហ៊ុន EAKON គ្រុប របស់ប្រទេសម៉ាឡេស៊ី ដើម្បីជំរុញទៅលើវិស័យលក់រាយនៅកម្ពុជា។

ពិធីចុះហត្ថលេខាលើអនុស្សារណៈនេះ បានប្រព្រឹត្តទៅក្រោមអធិបតីភាពជាសាក្សីរបស់ ឯកឧត្តម Eldeen Husaini Mohd Hashim ឯកអគ្គរដ្ឋទូតម៉ាឡេស៊ីប្រចាំប្រទេសកម្ពុជា និងអ្នកឧកញ៉ា ឆាល វ៉ាន់ (Charles Vann) អនុប្រធានប្រតិបត្តិ នៃក្រុមហ៊ុន កាណាឌីយា ដែលធ្វើឡើងរវាងលោកស្រី លឹម លីជិន តំណាងឲ្យក្រុមហ៊ុន អូស៊ីអាយស៊ី និងលោក Dato Sri Ricky Yaw តំណាងឲ្យក្រុមហ៊ុន Eakon គ្រុប ក្នុងគោលបំណងចែករំលែកព័ត៌មានលម្អិត និងសំខាន់ៗដូចជា៖ វិសាលភាពការងារ និងការប្ដេជ្ញាចិត្តក្នុងការសហការនៃការធ្វើអាជីវកម្ម។តាមការលើកឡើងរបស់លោកតំណាងឲ្យក្រុមហ៊ុន Eakon គ្រុប បានឲ្យដឹងថា Eakon នឹង​ធ្វើការ​ចែករំលែកចំណេះដឹង និងជំនាញដែលមានក្នុងវិស័យជាច្រើនដូចជា វិស្វកម្ម ស្ថាបត្យកម្ម សំណង់ និងបច្ចេកទេសជាដើម ទៅកាន់ដៃគូ អូស៊ីអាយស៊ី ក៏ដូចជា ដើម្បីជួយពង្រឹងប្រភព​ចំណូលអ្នកជួល និងវិនិយោគិនអន្តរជាតិ ទៅលើគម្រោង Elysee ដើម្បីអភិវឌ្ឍអចលនទ្រព្យ ឲ្យដូចលំដាប់ពិភព​លោក ដែលនឹងបង្ករបង្កើនជីវភាពរស់នៅ​ និងអាជីវកម្មរបស់ប្រជាពលរដ្ឋខ្មែរ។

លោក បានបន្តថា ដោយមានការច្នៃប្រឌិតដូចទៅនឹងទីក្រុង Champs Elysees ក្នុងទីក្រុងប៉ារីស The Elysee គឺជាការអភិវឌ្ឍទីក្រុងមួយ ក្នុងចំណោមការអភិវឌ្ឍទីក្រុងទាំងអស់របស់ អូស៊ីអាយស៊ី នៅ​រាជធានីភ្នំពេញ ដែលនាំមកនូវវប្បធម៌ដ៏ល្បីល្បាញ​មកពីប៉ែកអឺរ៉ុប ​ភាគពាយ័ព្យ មកកសាង​នៅក្នុងប្រទេសកម្ពុជា។

លោក បានអះអាងទៀតថា នឹងទាក់ទាញវិនិយោគិនម៉ាឡេស៊ី ឲ្យកាន់ច្រើនជាងនេះ ដើម្បីវិនិយោគ​លើគម្រោងផ្សេងៗទៀតនៅកម្ពុជា ជាពិសេស ដូចដែលឃើញស្រាប់ហើយថា កម្ពុជាបាន​នឹងកំពុងតែមានអ្នកវិនិយោគអន្ដរជាតិកើនឡើងយ៉ាងច្រើន ក្នុងរយៈពេលប៉ុន្មានឆ្នាំចុងក្រោយនេះ ទោះបីជួបប្រឈមនឹងវិបត្តិសកលនៃជំងឺកូវីដ១៩យ៉ាណាក៏ដោយ។ តាមរយៈភាពជាដៃគូនេះ យើងនឹងទន្ទឹងរង់ចាំទទួលយកនូវអត្ថប្រយោជន៍ជាច្រើន នៃឱកាសវិនិយោគនៅកម្ពុជាតាមរយៈ អូស៊ីអាយស៊ី។

សូមបញ្ជាក់ថា អូស៊ីអាយស៊ី គឺជាក្រុមហ៊ុនសាជីវកម្មធំជាងគេបំផុតនៅកម្ពុជា ដែលក្រៅពីវិស័យ​ពាណិជ្ជកម្មផ្សេងៗ ​ក្រុមហ៊ុនក៏ធ្វើការទៅលើគម្រោងអភិវឌ្ឍន៍អចលនទ្រព្យ និងហេដ្ឋា​រចនា​សម្ព័ន្ធខ្នាតធំ ជាពិសេសក៏មានវិស័យអាកាសចរណ៍ វិទ្យាស្ថានអប់រំ និងគំរោងធំផ្សេងទៀតផងដែរ។ ដោយឡែក EKG Development Sdn Bhd គឺជាគំរោងអភិវឌ្ឍន៍អចលនទ្រព្យរបស់ក្រុមហ៊ុន Eakon គ្រុប និងជាក្រុមហ៊ុនរបស់ម៉ាឡេស៊ី ​ដែលមានជំនាញខាងសេវាកម្មមេកានិច អគ្គិសនី និង​សេវាកម្មសំអាត សម្រាប់គម្រោងពាណិជ្ជកម្ម ​លំនៅដ្ឋានធំៗ ​និងគ្រឹះស្ថានអប់រំជាដើម៕

អត្ថបទ៖ ឈិត បូរ៉ាវី