​ក្រចេះ៖ នៅព្រឹកថ្ងៃទី០១ ខែមេសា ឆ្នាំ២០២១ នេះ រដ្ឋបាលខេត្ដក្រចេះ ដឹកនាំដោយផ្ទាល់ក្រោមអធិបតីភាពឯកឧត្តម វ៉ា ថន អភិបាលខេត្តក្រចេះ សហការជាមួយមន្ទីរសុខាភិបាលខេត្ត និងក្រុមគ្រូពេទ្យ បន្តចុះយុទ្ធនាការចាក់វ៉ាក់សាំងការពារជំងឺកូវីដ-១៩ ជូនមន្ត្រីរាជការនៅតាមបណ្តាអង្គភាព ស្ថាប័ន​ទូទាំង​ខេត្តក្រចេះ​។

ដោយមានការចូលរួមពីបុគ្គលិក មន្ត្រីរាជការ នៅគ្រប់ស្ថាប័ន អង្គភាពនានាយ៉ាងច្រើនកុះករ ដែលឆ្លុះបញ្ចាំងអោយឃើញកាន់តែច្បាស់ពីការយល់ដឹងរបស់បងប្អូន ប្រជាពលរដ្ឋទូទាំងប្រទេស តាមរយៈការផ្សព្វផ្សាយរបស់រាជរដ្ឋាភិបាលក្រសួងសុខាភិបាល អាជ្ញាធរខេត្តក្រុងស្រុក។

មានប្រសាសន៍ ថ្លែងប្រាប់អ្នកសារព័ត៌មាន នាព្រឹកថ្ងៃដដែលនោះដែរ ឯកឧត្តម វ៉ា ថន បានអោយដឹងថា តាមគោលការណ៍របស់រាជរដ្ឋាភិបាលកំណត់នោះ គឺជំហានទី១ គឺចាក់វ៉ាក់សាំងស៊ីណូហ្វាមបានចំនួន ៣៥៩០នាក់ ហើយការចាក់វ៉ាក់សាំងនៅថ្ងៃនេះ គឺចាប់ផ្ដើមចាក់នៅវ៉ាក់សាំងស៊ីណូវ៉ាក់ដោយចាក់ជូនសម្រាប់មន្ត្រីរាជការដែលនៅសេសសល់ ចំនួន ០៦ស្រុក/ក្រុង ដែលមានទីតាំងចំនួន ១១ទីតាំងនិង ១២ក្រុមចាក់។

ឯកឧត្តម អភិបាលខេត្ត មានប្រសាសន៍បន្តថា វត្តមានរបស់មន្ត្រីរាជការនៅជុំវិញខេត្ត ដែលបានអញ្ជើញមកទទួលចាក់វ៉ាក់សាំងនៅថ្ងៃនេះ គឺជាការល្អសម្រាប់ពួកគាត់ ដែលពួកគាត់បានយល់ដឹងតាមការផ្សព្វផ្សាយរបស់រាជរដ្ឋាភិបាលកម្ពុជាក្រសួងសុខាភិបាល រួមនិងអាជ្ញាធរគ្រប់លំដាប់ថ្នាក់នៅក្នុងខេត្តរបស់យើងក្នុងការការពារសុវត្ថិភាពរបស់គាត់កុំឱ្យឆ្លងនូវជំងឺ-១៩។

ជាមួយគ្នានោះ ក្រុមការងារក៏បានរៀបចំជូនពួកគាត់ឲ្យបានល្អប្រសើរ ទាំងកំលាតសុវត្ថិភាព និងកុំឲ្យ​មាន​​​ភាពរញ៉េរញ៉ៃ ហើយចំពោះវ៉ាក់សាំង គឺនៅតែបន្តចាក់ជាជំហានៗបន្តទៀតរហូតទាល់តែគ្រប់ចំនួន ។

ឯកឧត្តម មានប្រសាសន៍បញ្ជាក់ថា ចាប់ពីព្រឹត្តិការណ៍ ២០កុម្ភៈ រហូតមកដល់ពេលនេះ ខេត្តក្រចេះ គឺទទួលឥទ្ធិពលនៃការឆ្លងជំងឺកូវីដ-១៩ ដូចជាករណីរបស់លោកវរសេនីឯក វ៉ាន់ ណាក្រូ ដែលគាត់បានអញ្ជើញមកកាន់ខេត្តក្រចេះនេះ គឺពាក់ព័ន្ធទៅដល់មនុស្សចំនួន ១៣០នាក់ ដែលបានធ្វើចិត្តាឡីស័ក ក្រៅពីនោះ ក៏មានអ្នកប៉ះពាល់ប្រយោល មួយចំនួនផ្សេងទៀត គឺឲ្យពួកគាត់ធ្វើចិត្តាឡីស័កនៅឯផ្ទះ។

ចំណែកឯពលករដែលមកពីក្រៅប្រទេស ក៏ដូចជាអ្នកដែលចេញមកពីតាមបណ្ដាខេត្ត ស្រុកមួយចំនួនដែលពាក់ព័ន្ធនោះ គឺបានអញ្ជើញពួកគាត់ធ្វើចត្តាឡីស័កនៅតាមមណ្ឌល ចត្តាឡីស័ក និងនៅតាមមន្ទីរពេទ្យក្នុងស្រុកផងដែរ៕ អត្ថបទ៖ សេង ម័រ