ភ្នំពេញ៖ ដើម្បីឆ្លើយតបបន្ទាន់ នឹងករណីជំងឺកូវីដ-១៩ បន្តងើបឡើងវិញ និងការពារ ការចម្លង​ជំងឺ​អុតស្វា មនី្ទរពេទ្យបង្អែករាជធានីភ្នំពេញ ​នៃមនី្ទរសុខាភិបាលរាជធានីភ្នំពេញ បានត្រៀមឆ្លើយ​តប​បន្ទាន់ ការចម្លងមេរោគកូវីដ-១៩ និងជំងឺអុតស្វា។

បើតាមលោកវេជ្ជបណ្ឌិត អេង គឹមបូរ៉ារិទ្ធ អនុប្រធាន តំណាងលោកវេជ្ជបណ្ឌិត នេត សុវិរៈ ប្រធាន​មនី្ទរពេទ្យបង្អែករាជធានីភ្នំពេញ ប្រាប់BTV ព័ត៌មាននាព្រឹកថ្ងៃទី៣ ខែសីហា ឆ្នាំ២០២២នេះថា ក្នុងរយៈពេលចុងក្រោយពាក់ព័ន្ធករណីជំងឺឆ្លង កូវីដ-១៩ សភាពការណ៍បច្ចុប្បន្ននេះ មានការ​កក្រើកឡើងវិញ ឬក៏ឆ្លងឡើងវិញ ជាបញ្ហាមួយ ដែលយើងទាំងអស់គ្នា ត្រូវតែយកចិត្តទុកដាក់​ជាមួយ​នឹងការរីករាលដាលជំងឺកូវីដ-១៩ នេះឲ្យបានម៉ត់ចត់។

ដោយឡែកចំពោះករណីជំងឺឆ្លងប្រភេទថ្មីៗនេះ គឺជំងឺអុតស្វា ក្រុមគ្រូពេទ្យ បានត្រៀម​លក្ខណៈគ្រប់គ្រាន់ ក្នុងការឆ្លើយតបឲ្យបានទាន់ពេលវេលា ​ចំពោះជំងឺអុតស្វា ប្រភេទថ្មីនេះផងដែរ។

ទន្ទឹមនឹងនោះប្រជាពលរដ្ឋមកទទួលសេវាពិនិត្យ ពិគ្រោះព្យាបាលជំងឺ និងមកចាក់វ៉ាក់សាំង​បង្ការ​ជំងឺកូវីដ-១៩ ពីក្រុមការងារគ្រូពេទ្យ ​នៃមនី្ទរពេទ្យបង្អែករាជធានីភ្នំពេញ បានបង្ហាញពី​អារម្មណ៍​រីករាយក្នុងពេលមកដល់មនី្ទរពេទ្យ ​ដោយទទួលបានការយកចិត្តទុកដាក់ពីគ្រូពេទ្យ និងទទួល​សារអប់រំ​អំពីការការពារថែទាំសុខភាពជៀសផុតពីជំងឺឆ្លងថ្មីៗ និងការបរិភោគអាហារណា​ដែល​ប្រកបដោយអនាម័យខ្ពស់​ និងសូមគោរពដឹងគុណជូនចំពោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត នៃព្រះរាជាណាចក្រកម្ពុជា​ ក្នុងការលើកស្ទួយស្ថានភាពសុខភាព​ប្រជាពលរដ្ឋ​គ្រប់រូបឲ្យកាន់តែមានប្រសិទ្ធភាពខ្ពស់។

ជាមួយគ្នានេះលោកវេជ្ជបណ្ឌិត អេង គឹមបូរ៉ារិទ្ធ ក៏បានលើកឡើងទៀតថា មនី្ទរពេទ្យ មានក្រុមឆ្លើយ​តប​​បន្ទាន់លើការផ្ទុះរីករាលដាលជំងឺកូវីដ-១៩ ​និងជំងឺអុតស្វា​ ទាន់ពេលវេលា ដោយគ្មាន​ការខ្លាចរអាល ​និងចូលរួមទាំងអស់គ្នា ​ទាំងថ្នាក់ដឹកនាំមនី្ទរពេទ្យ ​និងបុគ្គលិកមនី្ទរពេទ្យ គឺ​ស្ម័គ្រស្មោះ​ប្រយុទ្ធប្រឆាំង ​នឹងជំងឺឆ្លងប្រភេទថ្មីនេះ។ សូមអំពាវនាវដល់បងប្អូន​ប្រជាពលរដ្ឋ​ដែល​មាន​បញ្ហាសុខភាព ដូចជាជំងឺទូទៅ​ និងការចាក់វ៉ាក់សាំង ​សូមអញ្ជើញមកទទួលសេវាក្នុង​មន្ទីរ​បង្អែករាជធានីភ្នំពេញ ​ដោយក្រុមគ្រូពេទ្យទាំងអស់រីករាយរងចាំ​ បំរើសេវាជូនប្រជាពលរដ្ឋទាំងអស់ ដោយគ្មានការរើងអើងនោះទេ៕ អត្ថបទ៖ រដ្ឋា