ភ្នំពេញ៖ ផែនការមេស្តីពីប្រព័ន្ធដឹកជញ្ជូនអន្តរមធ្យោបាយ បានកំណត់នូវអភិក្រម និងទស្សនាទានជាយុទ្ធសាស្រ្ត ប្រកបដោយលក្ខណៈប្រាកដនិយម, ភាពប្រទាក់ក្រឡា, គ្រប់ជ្រុងជ្រោយ ព្រមទាំងឆ្លើយតបខ្ពស់ទៅនឹងស្ថានភាព និងតម្រូវការជាក់ស្តែងនៃការអភិវឌ្ឍប្រព័ន្ធដឹកជញ្ជូន និងឡូជីស្ទីកនៅកម្ពុជា នាពេលបច្ចុប្បន្ន និងអនាគត។

​ឯកឧត្តម រស់ សីលវ៉ា សមាជិកឧត្តមក្រុមប្រឹក្សាសេដ្ឋកិច្ចជាតិ លើកឡើងនៅក្នុងពិធីប្រគល់-ទទួលជាផ្លូវការ នូវរបាយការណ៍ នៃការសិក្សាផែនការមេ ស្តីពីប្រព័ន្ធដឹកជញ្ជូនអន្តរមធ្យោបាយកម្ពុជា នៅថ្ងៃទី០៣ ខែ​មករា ឆ្នាំ​២០២២ នេះថា ស្ថិតក្នុងគ្រប់កាលៈទេសៈ និងស្ថានភាព, ប្រព័ន្ធដឹកជញ្ជូន និងឡូជីស្ទីក បន្តជាវិស័យឆ្អឹងខ្នងគាំទ្រសកម្មភាពសង្គម និងសេដ្ឋកិច្ច ដែលមិនអាចខ្វះបានសម្រាប់កម្ពុជា ជាពិសេសគាំទ្រដល់ចក្ខុវិស័យនៃការអភិវឌ្ឍរយៈពេលវែង។

ជាលទ្ធផល​រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចតេជោនាយករដ្ឋមន្រ្តី តែងផ្តល់អាទិភាពខ្ពស់លើការអភិវឌ្ឍប្រព័ន្ធដឹកជញ្ជូន និងឡូជីស្ទីក។

ចំពោះការគិតគូររៀបចំឱ្យមានការសិក្សាផែនការមេ ស្តីពីប្រព័ន្ធដឹកជញ្ជូនអន្តរមធ្យោបាយកម្ពុជា ជាឆ្លើយតបនឹងការចង្អុលបង្ហាញ នៃឯកសារគោលនយោបាយជាតិសំខាន់ៗរួមមាន៖ គោលនយោបាយអភិវឌ្ឍន៍វិស័យឧស្សាហកម្មកម្ពុជា ២០១៥-២០២៥ និងយុទ្ធសាស្រ្តចតុកោណ-ដំណាក់កាលទី៤ ។

ឈរលើមូលដ្ឋាននៃរបាយការណ៍នៃការសិក្សានេះ ឧត្តមក្រុមប្រឹក្សាសេដ្ឋកិច្ចជាតិ រួមជាមួយក្រុមប្រឹក្សាជាតិភស្តុភារកម្ម និងក្រសួងសាធារណការ និងដឹកជញ្ជូន បានកំពុងធ្វើការសំយោគជាមួយផែនការមេអន្តរកាល ស្តីពីការតភ្ជាប់ប្រព័ន្ធដឹកជញ្ជូន និងឡូជីស្ទីក ២០២១-២០៣០ និងរបាយការណ៍ នៃការសិក្សាដោយស្ថាប័ន និងដៃគូ-អភិវឌ្ឍន៍ផ្សេងទៀត នាពេលកន្លងមក សំដៅកសាងនូវ “ផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយកម្ពុជា ២០២២-២០៣០”។

ជារួមផែនការមេគ្រប់ជ្រុងជ្រោយដែលរំពឹងថា នឹងទទួលបានការអនុម័តពីរាជរដ្ឋាភិបាលកម្ពុជា នាចុងឆ្នាំ២០២២ ឬនៅដើមឆ្នាំ២០២៣ ដែលនឹងក្លាយជាផែនទីចង្អុលផ្លូវ ក្នុងការតម្រង់ទិសសម្រាប់ការអភិវឌ្ឍប្រព័ន្ធដឹកជញ្ជូន និងឡូជីស្ទីកនៅកម្ពុជាឱ្យកាន់តែមានប្រសិទ្ធភាព។

 ចំណែកវិស័យឯកជន, លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា លើកឡើងថា ចំពោះការផ្តល់ជូនរបាយការណ៍ សិក្សាផែនការមេ ស្តីពីប្រព័ន្ធដឹកជញ្ជូនអន្តរមធ្យោបាយកម្ពុជាពីភាគីចិន គឺជាការជួយបំពេញនូវចំណុចខ្វះខាត លើផ្នែកភស្តុភាកម្មកម្ពុជា ដើម្បីកែលម្អឲ្យបានកាន់តែប្រសើរ មានតម្លៃកាន់តែថោកក្នុងការដឹកជញ្ជូន និងការកាត់បន្ថយថ្លៃដើម ដែលជាចំណុចសំខាន់ ខណៈបច្ចុប្បន្នការដឹកជញ្ជូននៅក្នុងប្រទេសកម្ពុជាយើង នៅមានកម្រិតខ្ពស់នៅឡើយ បើប្រៀបធៀបបណ្តាប្រទេសក្នុងអាស៊ាន។

​ជុំវិញការសិក្សាផែនការមេ ស្តីពីប្រព័ន្ធដឹកជញ្ជូនអន្តរមធ្យោបាយនេះ ទទួលបានការគាំទ្រតាមរយៈជំនួយហិរញ្ញប្បទានឥតសំណង ពីសាធារណរដ្ឋប្រជាមានិតចិន, ការសិក្សានេះបានគ្រោងសម្រាប់រយៈពេល ២ឆ្នាំ ដោយបានចាប់ផ្តើមពីឆ្នាំ២០១៩ ក៏ប៉ុន្តែបានចំណាយពេលច្រើនជាងការគ្រោងទុក ដោយសារផលវិបាកនៃការរីករាលដាលនៃជំងឺកូវីដ-១៩។ ទោះបីជាយ៉ាងនេះក្តី របាយការណ៍នៃការសិក្សាផែនការមេស្តីពីប្រព័ន្ធដឹកជញ្ជូនអន្តរមធ្យោបាយកម្ពុជា ត្រូវបានបញ្ចប់ជាស្ថាពរ នាដើមឆ្នាំ២០២២ ដោយមានរបាយការណ៍នៃការសិក្សាសរុបចំនួន៧ រួមមាន៖ (១). ផែនការមេស្តីពីប្រព័ន្ធដឹកជញ្ជូនពហុមធ្យោបាយ, (២). ផែនការអភិវឌ្ឍន៍ផ្លូវថ្នល់, (៣). ផែនការអភិវឌ្ឍន៍ផ្លូវដែក, (៤). ផែនការអភិវឌ្ឍន៍តាមផ្លូវទន្លេ, (៥). ផែនការអភិវឌ្ឍន៍ការដឹកជញ្ជូនផ្លូវសមុទ្រ, (៦). ផែនការអភិវឌ្ឍន៍ផ្លូវអាកាស និង (៧). ផែនការអភិវឌ្ឍន៍ឡូជីស្ទីក៕អត្ថបទ៖ សុន រ៉ាឌី