ភ្នំពេញ៖ ឯកឧត្តម សេង សុមុនី អ្នកនាំពាក្យក្រសួងធម្មការ និងសាសនា បានឱ្យដឹងថា គិតមកទល់ពេលនេះមិនមានព្រះសង្ឃអង្គណាបានឆ្លងជំងឺកូវីដ១៩នៅឡើយទេ ខណៈរាជរដ្ឋាភិបាលបានអំពាវនាវដ ល់គ្រប់បណ្តាវត្តអារាម និងវិហារសាសនាផ្សេងៗបន្តអនុវត្តឱ្យបានខ្ជាប់ខ្ជួននូវវិធានការសុខាភិបាល ដើម្បីបញ្ជៀសការឆ្លងរាលដាលពីជំងឺកូវីដ១៩។​

ស្របពេលរាជរដ្ឋាភិបាល បានចេញសេចក្តីណែនាំអំពីវិធានការបង្ការ និងទប់ស្កាត់ការរាតត្បាតនៃជំងឺកូវីដ១៩ ជាពិសេសក្នុងពិធីបុណ្យចូលឆ្នាំប្រពៃណីជាតិខ្មែរខាងមុខ ថ្លែងក្នុងកិច្ចសម្ភាសន៍ជាមួយ BTV ឯកឧត្តម សេង សុមុនី រដ្ឋលេខាធិការ និងជាអ្នកនាំពាក្យក្រសួងធម្មការ និងសាសនា បានឱ្យដឹងថា ទោះបីប្រទេសជាតិបាននឹងកំពុងបន្តជួបប្រឈមនឹងហានិភ័យខ្ពស់នៃការឆ្លងរាលដាលជំងឺកូវីដ១៩ ប៉ុន្តែ មកទល់ពេលនេះទោះក្នុងកាលៈទេសៈនៃជំងឺនេះបន្តអូសបន្លាយក៏ដោយ ឯកឧត្តមបានសង្កេតឃើញថា ចំពោះកិច្ចពិធីសាសនានានាពេលកន្លងមកបានអនុវត្តយ៉ាងល្អប្រសើរ និងមិនមានព្រះសង្ឃអង្គណាបានកើតជំងឺកូវីដ១៩នោះទេ ហើយពិធីសាសនាដែលចាំបាច់ត្រូវប្រារព្ធដូចជាពិធីបុណ្យសពក៏បានចូលរួមអនុវត្តទៅតាមច្បាប់ស្តីពីការទប់ស្កាត់ការឆ្លងរាលដាលនៃជំងឺកូវីដ១៩។​

ពាក់ព័ន្ធនឹងពិធីបុណ្យចូលឆ្នាំប្រពៃណីជាតិខ្មែរ ឯកឧត្តមក៏បានណែនាំដល់បណ្តាវត្តអារាមទាំងអស់ត្រូវគោរពគោលការណ៍អំពីការផ្អាកចំពោះពិធីនានាដែលមានការជួបជុំ ប៉ុន្តែ ចំពោះពិធីទទួលទេវតាតាមវត្តអារាម ឬគេហដ្ឋានជាលក្ខណៈគ្រួសារគឺអាចរៀបចំបានដោយធម្មតា។

ឯកឧត្តមបានបន្តថា នាពេលខាងមុខនេះ ដើម្បីរួមចំណែកក្នុងការទប់ស្កាត់ការឆ្លងជំងឺកូវីដ១៩ក្នុងសហគមន៍ ក្រសួងធម្មការ និងសាសនា គ្រោងនឹងមានការចាក់វ៉ាក់សាំងដល់ព្រះសង្ឃជាង៦ម៉ឺនអង្គនិងបព្វជិតពាហិរសាសនា គឺសាសនាផ្សេងៗរាប់ម៉ឺននាក់ទៀតផងដែរ។

ចំពោះដំណើរការផ្តល់វ៉ាក់សាំងកូវីដ១៩ ដល់ព្រះសង្ឃនៅទូទាំងប្រទេសសរុបមាន ៦៤,៨៦៤អង្គ ក្នុងនោះ បើតាមរបាយការណ៍ចំពោះព្រះសង្ឃ និងបព្វជិតពាហិរសាសនា ដែលមានព្រះជន្ម ឬអាយុពី៦០ឆ្នាំឡើងមានចំនួន៨,៦៣៧ អង្គ/នាក់ និងចាប់ពីព្រះជន្ម ឬអាយុ១៨ដល់៥៩ឆ្នាំមានចំនួន ៣៥,៣១៣ អង្គ/នាក់៕​ អត្ថបទ សេក ឧត្តម​