ភ្នំពេញ៖ ឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល តំណាងរាជរដ្ឋាភិបាលកម្ពុជា នាទីស្តីការក្រសួងព្រឹកថ្ងៃទី០៤ ខែសីហា ឆ្នាំ២០២២នេះ បានអញ្ជើញទទួលកញ្ចប់តេស្តរកវីរុសអុតស្វា (Monkeypox Test Kits) ចំនួន ៥០០ឯកតា ពី​រដ្ឋាភិបាល និងប្រជាជនសហព័ន្ធរុស្សី ជូនរាជរដ្ឋាភិបាល និងប្រជាជនកម្ពុជា ដើម្បីទប់ស្កាត់ការរីករាលដាល នៃជំងឺអុតស្វា។

ពិធីប្រគល់-ទទួលនេះ មានការអញ្ជើញចូលរួមដោយផ្ទាល់ពីឯកឧត្តម Anatoly Borovik ឯកអគ្គរដ្ឋទូតវិសាមញ្ញនិងពេញសមត្ថភាព នៃសហព័ន្ធរុស្សី ប្រចាំកម្ពុជា ​និងឯកឧត្តមបណ្ឌិត ចែម វិឌ្យ៉ា រដ្ឋលេខាធិការក្រសួងការបរទេស ​និងសហប្រតិបត្តិការអន្តរជាតិ។

ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្ដ្រីក្រសួងសុខាភិបាល បានថ្លែងថា ដោយទទួល​បានការ​អនុញ្ញាត​ដ៏ឧត្តុង្គឧត្តមពីសម្តេចអគ្គមហាសេនាបតីតេជោ​ ហ៊ុន សែន នាយករដ្ឋមន្រ្តី​នៃព្រះរាជាណា​ចក្រ​កម្ពុជា ​ជាតំណាងរាជរដ្ឋាភិបាលកម្ពុជា​ ក្នុងពិធីប្រគល់ និងទទួលកញ្ចប់តេស្តរកវីរុសអុតស្វា (Monkeypox Test Kits) ​ចំនួន ៥០០ឯកតា ដែលជាជំនួយដ៏ថ្លៃថ្លារបស់រដ្ឋាភិបាល និងប្រជាជន​សហព័ន្ធរុស្សី ជូនរាជរដ្ឋាភិបាល និងប្រជាជននៃកម្ពុជា ដើម្បីទប់ស្កាត់ការរីករាលដាល​នៃ​ជំងឺ​អុតស្វា។

ឯកឧត្តម រដ្ឋមន្ដ្រី បានថ្លែងទៀតថា កម្ពុជា និងសហព័ន្ធរុស្សី មានចំណងមិត្តភាពជាប្រពៃណី​ដ៏យូរអង្វែង​ ហើយបច្ចុប្បន្ន ប្រទេសយើងទាំងពីរ ក៏មានកិច្ចសហប្រតិបត្តិការក្នុងក្របខណ្ឌទ្វេភាគី ពហុភាគី ក៏ដូចជាក្នុង អាស៊ានបូក ដើម្បីនាំមកនូវសន្តិភាព​ ស្ថិរភាព សន្តិសុខ ការអភិវឌ្ឍ​ប្រកប​ដោយចិរភាព និងផលប្រយោជន៍នៃប្រជាជាតិយើងទាំងពីរ។ សម្រាប់ថ្ងៃនេះ ចំណងមិត្តភាព និងកិច្ចសហប្រតិបត្តិការកម្ពុជា-រុស្សី ​បានបង្កើតនូវកាលានុវត្តភាពថ្មីមួយទៀត ដែលជាការឆ្លើយតប​ទៅនឹងសេចក្តីប្រកាសរបស់អង្គការសុខភាពពិភពលោក ដែលបានប្រកាសជាផ្លូវការ កាល​ពីថ្ងៃទី២៣ ខែកក្កដា ឆ្នាំ២០២២នេះ ​ដោយបានដាក់ជំងឺអុតស្វា ជាបញ្ហាសុខភាព​សាធារណៈសកល។

ឯកឧត្តម រដ្ឋមន្ដ្រីក្រសួងសុខាភិបាល បានគូសបញ្ជាក់ថា រហូតមកដល់ពេលនេះ កម្ពុជាមានករណី​ជំងឺអុតស្វា តែ១ករណីគត់ ជាករណីនាំចូល ប៉ុន្តែទោះជាយ៉ាងណាក៏ដោយ រាជរដ្ឋាភិបាលកម្ពុជា ដែល​មានក្រសួងសុខាភិបាលជាសេនាធិការ ​បានត្រៀមលក្ខណៈដើម្បីឆ្លើយតបបន្ទាន់ក្នុងករណី​មានការផ្ទុះឡើង​ជំងឺអុតស្វា ជាយថាហេតុ។

ការផ្តល់ជំនួយកញ្ចប់តេស្តរកវីរុសអុតស្វា (Monkeypox Test Kits) ចំនួន៥០០ ថ្ងៃនេះ ជាការរួម​ចំណែក ដើម្បីត្រៀមបម្រុងទប់ស្កាត់ ឆ្លើយតបការរីករាលដាលនៃជំងឺអុតស្វា គឺជាកាយវិការបង្ហាញ​នូវ​មនោ​សញ្ចេតនាជា​បងប្អូន និងសាមគ្គីភាពរបស់រដ្ឋាភិបាល ​និងប្រជាជនរុស្សី ជាមួយរាជ​រដ្ឋាភិបាល ​និងប្រជាជនកម្ពុជា​ នៅក្នុងកាលៈទេសៈដែលពិភពលោកទាំងមូល កំពុងជួបនឹងបញ្ហា​ប្រឈម​ជាច្រើន ដែលមិនធ្លាប់មានពីមុនមក។

រដ្ឋមន្ដ្រី ម៉ម ប៊ុនហេង ជឿជាក់ថា ទំនាក់ទំនងល្អប្រសើរជាប្រពៃណី និងកិច្ចសហប្រតិបត្តិការរវាង​ប្រទេស​យើងទាំងពីរ នឹងកាន់តែរីកចម្រើន រឹងមាំ​ នាំមកនូវភាពសុខដុម ​និងវឌ្ឍនភាពសេដ្ឋកិច្ច-សង្គម ជានិរន្តរ៍ ​ដល់ប្រជាជនយើងទាំងពីរ ​ដែលនឹងរួមចំណែកផងដែរ ​ដល់សន្តិភាព ​ស្ថិរភាព និងការអភិវឌ្ឍ​នៅក្នុងតំបន់ ​និងពិភពលោកទាំងមូល។

ក្នុងនាមតំណាងរាជរដ្ឋាភិបាលកម្ពុជា ឯកឧត្តមសាស្រ្តាចារ្យ ម៉ម ប៊ុនហេង សូមសម្តែងអំណរ​គុណ​យ៉ាងជ្រាលជ្រៅជូនចំពោះរដ្ឋាភិបាល ​និងប្រជាជនសហព័ន្ធរុស្សី ​ជាពិសេស ឯកឧត្តម Anatoly Borovik ឯកអគ្គរដ្ឋទូតសហព័ន្ធរុស្សី ​ប្រចាំកម្ពុជា និង Russian State Research Center of Virology and Biotechnology VECTOR ដែលជាក្រុមហ៊ុនផលិតកញ្ចប់តេស្តរកវីរុសអុតស្វានេះ៕