ភ្នំពេញ៖ ឯកឧត្តម ស៊ូប្រាម៉ានីយ៉ាម ចៃសាំងការ (Subrahmanyam Jaishankar) រដ្ឋមន្រ្តីការបរទេសឥណ្ឌា បានដឹកនាំគណៈប្រតិភូ ទៅធ្វើទស្សកិច្ចតំបន់រមណីយដ្ឋានអង្គរ កាលពីថ្ងៃទី​០៣ ខែសីហា ម្សិលមិញ។

គណៈប្រតិភូឥណ្ឌា បានទៅទស្សនាប្រាសាទអង្គរវត្ត ប្រាសាទតាព្រហ្ម និងសារមន្ទីរវាយភណ្ឌ ប្រពៃណី​អាស៊ី ដែលអំឡុងពេលទស្សនកិច្ចនេះ រដ្ឋមន្ត្រីការបរទេសឥណ្ឌា បានលើកឡើងថា ឆ្នាំ២០២២ ជាឱកាសក្នុងការពង្រឹងទំនាក់ទំងវប្បធម៌ឱ្យកាន់តែស៊ីជម្រៅ សម្រាប់ប្រយោជន៍​ដល់​ប្រទេសទាំងពីរ ឥណ្ឌា-កម្ពុជា។ គិតត្រឹមឆ្នាំនេះ កម្ពុជា និងឥណ្ឌា មានទំនាក់ទំនងការ​ទូតជាមួយគ្នា រយៈពេល ៧០ឆ្នាំ ហើយ។

ឯកឧត្តម បានបញ្ជាក់ថា ប្រាសាទបុរាណនៅខេត្តសៀមរាប ដែលបានសាងសង់ឡើងនៅសតវត្សរ៍ ទី១០នេះ គឺជាភស្តុតាង នៃទំនាក់ទំនងប្រវត្តិសាស្រ្ត និងអរិយ្យធម៌ពាក់ព័ន្ធគ្នា ។ ឥណ្ឌា មានតួនា​ទីយ៉ាង សំខាន់ក្នុងការស្តារ និងអភិរក្សប្រសាទនានា ដែលធ្វើឱ្យទំនាក់ទំនង​កាន់តែល្អលើផ្នែក​ទេសចរណ៍ ជំនួញ និងពាណិជ្ជកម្ម រវាងប្រទេសទាំងពីរ។ កម្ពុជា និងឥណ្ឌា មាន​អរិយ្យធម៌ស្រដៀងគ្នា តាំងពីរាប់ពាន់ឆ្នាំមុន។

ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ មានប្រសាសន៍ថា ក្នុងឆ្នាំ២០០២ នៃ​ដំណើរទស្សនកិច្ចជាផ្លូវការរបស់នាយករដ្ឋមន្ត្រីឥណ្ឌាមកកម្ពុជា ​បានជួយសាងសង់សារមន្ទីរ Ganga Agent Traditional Textile ​នៅខេត្តសៀមរាប ដោយធ្វើពិធីបញ្ចុះបឋមសិលានៅឆ្នាំ២០១០ និងបានបើក សម្ពោធជាផ្លូវការនៅក្នុងឆ្នាំ២០១៤។ នៅពីឆ្នាំ២០០៤ រហូតមកដល់បច្ចុប្បន្ននេះ ក្រុមស្រាវជ្រាវបុរាណ វិទ្យាឥណ្ឌា (ASI) បានជួយជួសជុលប្រាសាទតាព្រហ្មបានយ៉ាងល្អប្រសើរ ដោយ​បានទទួលការវាយតម្លៃ ខ្ពស់ពី ICC Angkor និងប្រជាជនកម្ពុជាទាំងមូល។

ឯកឧត្តម បានថ្លែងអំណរគុណផងដែរចំពោះរដ្ឋាភិបាលឥណ្ឌា ​និងស្ថានទូតឥណ្ឌាប្រចាំកម្ពុជា ដែលបាន​សហការល្អជាមួយក្រសួងទេសចរណ៍កម្ពុជា​ ក្នុងការផ្សព្វផ្សាយ​ទេសចរណ៍រួមគ្នា ជា​ពិសេសកម្ម វិធី Cambodia Tourism | Roadshow​ នៅប្រទេសឥណ្ឌា ការរៀបចំ​ទិវា​យោគៈអន្តរជាតិជារៀងរាល់ឆ្នាំ​ នៅតាមគោលដៅទេសចរណ៍សំខាន់ៗរបស់កម្ពុជា ៕

អត្ថបទ៖ ឈិត សាវី