ចិន៖ ក្រុមហ៊ុន​អាកាសចរណ៍​មួយ​ចំនួន​បាន​លុបចោល​ជើង​ហោះហើរ​ទៅកាន់​ទីក្រុង​ Taipei និង​បាន​ប្ដូរ​ទិស​ដៅ​ដោយ​ប្រើប្រាស់​ផ្លូវ​ផ្សេងទៀត ​ជិត​ដែនអាកាស​ដែល​បាន​បិទ​ចំពោះ​ការ​ធ្វើ​ចរាចរណ៍​ស៊ីវិល អំឡុង​សម​យុទ្ធ​យោធា​ចិន​ដែល​បង្កឡើង​ដោយសារ​ដំណើរ​ទស្សនកិច្ច ​របស់​ប្រធាន​សភា​អាមេរិក​លោកស្រី Nancy Pelosi ទៅកាន់​កោះ​តៃវ៉ាន់​។​

​ចិន​បាន​ពង្រាយ​យន្តហោះ និង​បាញ់​មី​ស៊ី​ល​គ្រាប់​ពិត​ជាច្រើន​ជិត​កោះ​តៃវ៉ាន់​កាលពី​ថ្ងៃ​ព្រហស្បតិ៍ ក្នុង​ការ​ធ្វើ​សមយុទ្ធ​ដ៏​ធំ​បំផុត​មិន​ធ្លាប់​មាន​របស់​ខ្លួន​ក្នុង​ច្រក​សមុទ្រ​តៃវ៉ាន់ ដែល​គ្រោង​នឹង​បន្ត​រហូត​ដល់​ថ្ងៃត្រង់​ម៉ោង​ក្នុងស្រុក​ថ្ងៃអាទិត្យ​សប្ដាហ៍​នេះ​ក្នុង​ ៦​ទីតាំង​ឡោមព័ទ្ធ​ភាគច្រើន​នៃ​ដែនទឹក​របស់​កោះ​នេះ​។ ដែនអាកាស​នេះ​បាន​ប៉ះពាល់​តិចតួច ប៉ុន្តែ​ការ​ផ្អាក​ការហោះហើរ​កំពុង​រំខាន​ការ​ធ្វើ​ដំណើរ​រវាង​តំបន់​អាស៊ី-​អាគ្នេយ៍ និង​អាស៊ី​ឦសាន។​ ​ក្រុមហ៊ុន Air Lines Co Ltd របស់​កូរ៉េខាងត្បូង​និយាយ​ថា ខ្លួន​បាន​លុបចោល​ជើង​ហោះហើរ​រវាង​ទីក្រុង Seoul ​និង ​Taipei ​នៅ​ថ្ងៃ​សុក្រ ​និង​ថ្ងៃ​សៅរ៍​ស្អែក ​និង​អាច​ពន្យាពេល​ដល់​ថ្ងៃអាទិត្យ​សប្ដាហ៍​នេះ​ព្រោះ​សម​យុទ្ធ​នេះ​។ ក្រុមហ៊ុន​អាកាសចរណ៍ Singapore Airlines Ltd និយាយ​ថា ​ខ្លួន​បាន​លុប​ចោល​ជើង​ហោះហើរ​រវាង Singapore និង ​Taipei ដោយសារ​ការ​រឹតត្បិត​ដែនអាកាស និង​បន្ត​តាមដាន​ស្ថានការណ៍​ក្រែង​មាន​ប្រែប្រួល​ដ៏​ចាំបាច់​។

អ្នកនាំពាក្យ​របស់​ក្រុមហ៊ុន​អាកាសចរណ៍​នានា​បាន​និយាយ​ថា ​ក្រុមហ៊ុន ANA Holdings Inc និង Japan Airlines Co Ltd នៅតែ​កំពុង​ប្រតិបត្តិការ​ជើង​ហោះ​ហើរ​ទៅកាន់​ទីក្រុង Taipei ដូច​ធម្មតា។ ប៉ុន្តែ​កំពុង​វាង​ដែនអាកាស​ដែល​បាន​ប៉ះពាល់​ព្រម​ទាំងលើ​ផ្លូវ​ទៅ​ទីក្រុង Hong Kong និង​អាស៊ី​-​អាគ្នេយ៍​។ ​ក្រុមហ៊ុន Cathay Pacific Airways Ltd របស់​ Hong Kong បាន​និយាយ​កាលពី​ថ្ងៃ​ព្រហស្បតិ៍​ថា ជើង​ហោះហើរ​របស់​ខ្លួន​កំពុង​ជៀស​ពី​តំបន់​ដែន​អាកាសដែល​បាន​បង្កើត​ជុំវិញ​កោះ​តៃវ៉ាន់ ជា​វិធានការ​មួយ​ដែល​អាច​ឈាន​ដល់​ការអនុញ្ញាត​ ឲ្យ​មាន​ពេលវេលា​ហោះហើរ​បន្ថែម​ទៀត​សម្រាប់​ជើង​ហោះហើរ​មួយ​ចំនួន​៕

អត្ថបទ៖ សុខមាន