ទីប្រឹក្សារាជរដ្ឋាភិបាលកម្ពុជា ឯកឧត្តម យឿន យឿត បាន​សម្តែង​នូវ​អំណរ​សាទរ​ប្រកប​ដោយ​ក្តី​រំភើប​ឥត​ឧបមា គោរពជូនចំពោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រកម្ពុជា នាឱកាសដែលសម្តេចទទួលបាននូវ «សញ្ញាបត្របណ្ឌិតកិត្តិយស ផ្នែក​អភិវឌ្ឍន៍» ពីសាកលវិទ្យាល័យភូមិន្ទភ្នំពេញ ដែលជា​គ្រឹះ​ស្ថាន​ជាតិ​បណ្តុះ​បណ្តាល​បញ្ញវន្ត​ខ្មែរ​ជា​ច្រើន​ជំនាន់ និងមានភាពចំណាស់ជាងគេនៅក្នុងប្រទេសកម្ពុជានោះ។

ការប្រគល់ «សញ្ញាបត្របណ្ឌិតកិត្តិយស ផ្នែកអភិវឌ្ឍន៍» ជូនដល់សម្តេចតេជោ នាយករដ្ឋមន្រ្តី បានប្រ​ព្រឹត្តទៅនៅថ្ងៃទី៥ ខែសីហា ឆ្នាំ២០២២ ចំថ្ងៃចម្រើនជន្មាយុគម្រប់ ៧០ឆ្នាំ ឈាន​ចូល​៧១ ឆ្នាំ របស់សម្តេចតេជោនាយករដ្ឋមន្ត្រី ។

ឯកឧត្តមយឿន យឿត បានថ្លែងថា ការប្រគល់ «សញ្ញាបត្របណ្ឌិតកិត្តិយស ផ្នែកអភិវឌ្ឍន៍» ជូន​ដល់​សម្តេចតេជោ នាយករដ្ឋមន្រ្តី គឺពិតជាស័ក្តិសមបំផុតចំពោះគំរូវីរភាព គុណបំណាច់ និង​បង្ហា​ញ​ឱ្យ​ឃើញកាន់តែច្បាស់ពីគុណវុឱ្យផ្នែកចំណេះដឹង បទពិសោធន៍ ទេពកោសល្យ ភាពឈ្លាសវៃ និង​គតិបណ្ឌិតរបស់ សម្តេចតេជោនាយករដ្ឋមន្ត្រី ក្នុងនាម​ជា​អគ្គ​មគ្គ​ទេសក៍​ដ៏​ឆ្នើម​ដឹកនាំ​ប្រទេស​កម្ពុជា​នា​រយៈពេល៣៧ឆ្នាំកន្លងទៅនេះ ពោលគឺសម្តេចតេជោនាយករដ្ឋមន្ត្រី តែង​តែ​ឈរ​ជា​ប្រមុ​ខ​ដឹក​នាំ​ដ៏ប៉ិនប្រសប់ក្នុងបេសកកម្មជាប្រវត្តិសាស្ត្រនៅគ្រប់ដំណាក់កាលទាំងអស់ នាំឱ្យ​ប្រជាជាតិ និងប្រជាជនកម្ពុជា ទទួលបាននូវ “សន្តិភាព" ពេញបរិបូរណ៍ និង​ការ​អភិវឌ្ឍ​លើ​គ្រប់​វិស័យ។

ក្នុង​ឱកាសឯកឧត្តម ក៏បានយកឱកាសដ៏វិសេសវិសាលនេះ បួងសួង​ដល់​គុណ​បុណ្យ​ព្រះរ​ត​ន​ត្រ័យ កែវទាំងបីវត្ថុស័ក្តិសិទ្ធិទាំងឡាយក្នុងលោក ទេវតាថែរក្សាទឹកដីនៃព្រះរាជាណាចក្រកម្ពុជា សូមជួយ​ប្រសិទ្ធពរជ័យបវរសួស្ដី សិរីមង្គលវិប៉ុលសុខ មហាប្រសើរគ្រប់ប្រការជូន សម្តេចតេជោ​នាយករដ្ឋ​មន្ត្រី និងសម្តេចកិត្តិព្រឹទ្ធបណ្ឌិត ព្រមទាំងក្រុមគ្រួសារជាទីគោរពស្រឡាញ់ សូមបាន​សម​ប្រក​បដោយពុទ្ធពរបួនប្រការគឺ អាយុ វិណ្ណៈ សុខៈ ពលៈ ជានិច្ចនិរន្តរ៍​កុំ​បី​ឃ្លៀង​ឃ្លាត​ឡើយ​ផង​ដែរ​៕ អត្ថបទ៖ បាន ចក់