កោះតៃវ៉ាន់៖ ក្រុមអ្នកជំនាញ អ្នកនយោបាយ និងមេដឹកនាំសង្គមស៊ីវិលនៅទូទាំងពិភពលោក បានរួមគ្នាថ្កោលទោសដំណើរទស្សនកិច្ចរបស់លោកស្រី Nancy Pelosi ប្រធានសភាសហរដ្ឋអាមេរិកមកកាន់កោះតៃវ៉ាន់របស់ប្រទេសចិន។
សំឡេងភាគច្រើនបានគាំទ្រទស្សនៈដែលថា ដំណើរទស្សនកិច្ចនេះបានរំលោភលើអធិបតេយ្យភាព និងបូរណភាពទឹកដីរបស់ប្រទេសចិន ផ្ទុយទៅនឹងច្បាប់អន្តរជាតិ និងបទដ្ឋានជាមូលដ្ឋាននៃទំនាក់ទំនងអន្តរជាតិ និងធ្វើឱ្យប៉ះពាល់ដល់ស្ថិរភាពក្នុងតំបន់។ លោក Ali al-Hefny អតីតឯកអគ្គរដ្ឋទូតអេហ្ស៊ីបប្រចាំប្រទេសចិន និងជាអតីតអនុរដ្ឋមន្ត្រីការបរទេសបាននិយាយថា ដំណើរទស្សនកិច្ចរបស់លោកស្រី Pelosi មកកាន់កោះតៃវ៉ាន់របស់ចិនគឺពិតជាមិនអាចទទួលយកបានឡើយ។ ក្នុងនាមជាប្រទេសមហាអំណាចសេដ្ឋកិច្ចពិភពលោក និងជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ សហរដ្ឋអាមេរិកគួរតែគោរពតាមបទដ្ឋានអន្តរជាតិស្តីពីបញ្ហាសន្តិសុខក្នុងតំបន់ ខណៈប្រទេសនេះបានបង្កបញ្ហាដដែលៗលើប្រទេសជាច្រើននៅអាស៊ីបូព៌ា និងអាស៊ីអាគ្នេយ៍ ជាពិសេសចំពោះបញ្ហាកោះតៃវ៉ាន់។
សកម្មភាពជាឯកតោភាគីរបស់សហរដ្ឋអាមេរិកនឹងធ្វើឱ្យភាពតានតឹងរវាងចិន និងសហរដ្ឋអាមេរិកកាន់តែកើនឡើង ហើយធ្វើឱ្យភាពតានតឹងក្នុងតំបន់ក៏កាន់តែធ្ងន់ធ្ងរឡើងៗ។ លោក Lucas Qakaza អគ្គលេខាធិការរងស្តីទីនៃអង្គការផ្តល់សញ្ជាតិអាហ្វ្រិកខាងត្បូងបាននិយាយថា អ្វីដែលយើងចង់ឃើញគឺថា ពិភពលោកទាំងអស់កំពុងតែថ្កោលទោសចំពោះអ្វីដែលបានកើតឡើង គោលដៅសំខាន់របស់សហរដ្ឋអាមេរិកគឺដើម្បីដាក់គំនាបប្រទេសចិន និងរារាំងការអភិវឌ្ឍន៍របស់ចិន។ សហរដ្ឋអាមេរិកបាននឹងកំពុងព្យាយាមបង្ហាញប្រទេសចិន ពីឥទ្ធិពលរបស់ខ្លួននៅក្នុងតំបន់អាស៊ី-ប៉ាស៊ីហ្វិក ខណៈដែលលោកមិនគិតថា សហរដ្ឋអាមេរិកនឹងធ្វើបែបនេះនោះទេ។ អ្នកជំនាញជនជាតិហ្ស៊កដានីលោក Omar Al-Armouti និងជាសមាជិកនៃសមាគមមិត្តភាពហ្ស៊កដានី-ចិនបាននិយាយថា ប្រទេសចិនមានគំនិត និងចក្ខុវិស័យវែងឆ្ងាយក្នុងការដោះស្រាយស្ថានការណ៍បែបនេះ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
