អ៊ុយក្រែន៖ ខណៈជំរុញឲ្យប្រជាជននៅក្នុងតំបន់ Donetsk ជម្លៀសចេញ ប្រធានាធិបតីអ៊ុយក្រែនលោក Volodymyr Zelenskyy កាលពីថ្ងៃព្រហស្បតិ៍បានរិះគន់យ៉ាងខឹងសម្បារ ចំពោះរបាយការណ៍មួយរបស់អង្គការលើកលែងទោសអន្តរជាតិដែលបានបញ្ជាក់ថា យុទ្ធសាស្ត្រយោធារបស់អ៊ុយក្រែនបានធ្វើឱ្យជីវិតជនស៊ីវិលប្រឈមហានិភ័យ។
អង្គការសិទ្ធិមនុស្សឈានមុខមួយនេះបាននិយាយថា យុទ្ធសាស្ត្ររបស់អ៊ុយក្រែនក្នុងការកំណត់ទីតាំងគ្រាប់រ៉ុក្កែត និងមីស៊ីលនៅតំបន់ជុំវិញអគារលំនៅឋានប្រជាពលរដ្ឋ បានធ្វើឱ្យប៉ះពាល់ដល់អាយុជីវិតពលរដ្ឋ និងបានបំពានច្បាប់សង្គ្រាមដែលបានបង្កើតឡើង។ លោក Zelenskyy និយាយនៅក្នុងសុន្ទរកថារបស់លោកថា យើងបានឃើញនៅថ្ងៃនេះ នូវរបាយការណ៍ខុសគ្នាទាំងស្រុងពីអង្គការលើកលែងទោសអន្តរជាតិ ដែលគួរឲ្យសោកស្តាយដែលព្យាយាមលើកលែងទោសដល់រដ្ឋភេរវករ និងដកចេញការទទួលខុសត្រូវអ្នកឈ្លានពានលើជនរងគ្រោះ។
លោកនិយាយថា ប្រសិនបើនរណាម្នាក់រាយការណ៍ដែលជនរងគ្រោះ និងអ្នកឈ្លានពានត្រូវបានចោទប្រកាន់ក្នុងរឿងប្រព្រឹត្តអ្វីដូចគ្នា ហើយប្រសិនបើទិន្នន័យខ្លះអំពីជនរងគ្រោះត្រូវបានវិភាគ ហើយអ្វីដែលអ្នកបំពានកំពុងធ្វើនៅពេលនេះមិនត្រូវបានគេអើពើ រឿងនេះមិនអាចអត់ឱនឲ្យបានឡើយ។ អង្គការលើកលែងទោសអន្តរជាតិបាននិយាយថា ខ្លួនបានរកឃើញថា កងកម្លាំងអ៊ុយក្រែនប្រើប្រាស់មន្ទីរពេទ្យជាមូលដ្ឋានយោធាចំនួន ៥កន្លែង ដែលក្រុមសិទ្ធិមនុស្សបានចាត់ទុកថា ជាការបំពានយ៉ាងច្បាស់លាស់លើច្បាប់មនុស្សធម៌អន្តរជាតិ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
