​ភ្នំពេញ៖ សហព័ន្ធស្រូវអង្ករកម្ពុជា ចាប់ផ្តើមពង្រីកខ្លួន​នៃការនាំចូលអង្ករទៅកាន់ទីផ្សារសហរដ្ឋអាមេរិកបន្ថែម ខណៈបច្ចុប្បន្នមានក្រុមហ៊ុន ដែលជាអ្នកនាំចូលអង្ករទៅកាន់ទីផ្សារសហរដ្ឋអាមេរិក បានថ្លែងនូវការគាំទ្រ និងប្តេជ្ញាចិត្តខ្ពស់ ក្នុងការចូលរួមបង្កើតនូវទីផ្សារអង្ករខ្មែរ​នៅទីនោះ។

លោកឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជា ថ្លែងលើកឡើង ក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន ស្តីពីការនាំអង្ករចេញរបស់កម្ពុជា និងការពង្រីកទីផ្សារ នៅថ្ងៃនេះថា ជុំវិញការនាំចេញអង្ករនេះ សហព័ន្ធស្រូវអង្ករកម្ពុជា បានខិតខំប្រឹងប្រែង​យកចិត្តទុកដាក់ខ្ពស់ ដើម្បីជំរុញនាំចេញអង្កររបស់កម្ពុជាឲ្យបានកាន់តែខ្លាំងក្លា ក្នុងគៅលដៅលើកកម្ពស់ដល់សហគមន៍ និងកសិករដែលជាអ្នកដាំដុះស្រូវ ជាពិសេស គឺការចូលរួមចំណែកដល់សេដ្ឋកិច្ចជាតិយើង។

លោកឧកញ៉ា បន្តថា ជាក់ស្តែងក្នុងរយៈពេលជាង ២​ឆ្នាំមកនេះ យើងបានជួបប្រទះបញ្ហាជាច្រើន, ស្ថិតក្នុងកាលៈទេសៈនេះ សហព័ន្ធស្រូវអង្ករកម្ពុជា បានជំរុញ និងពង្រីកខ្លួនទៅកាន់ទីផ្សារអាមេរិក អាហ្រ្វិចជាដើម ក្នុងនោះ សម្រាប់ទីផ្សារអាមេរិក តាមរយៈនៃការទស្សកិច្ចរបស់លោកឧកញ៉ាផ្ទាល់ គឺទទួលបានការគាំទ្រអង្កររបស់កម្ពុជាច្រើន ក្នុងនោះ ក្រុមហ៊ុនដែលនាំអង្ករចូលទីផ្សារអាមេរិក កំពុងពិចារណា ផ្តល់ជម្រើសទីផ្សារដល់កម្ពុជា នឹងបានសម្តែងនូវការគាំទ្រ ក្នុងការចូលរួមបង្កើតនូវទីផ្សារអង្ករខ្មែរ នៅសហរដ្ឋអាមរិក។

​សូមបញ្ជាក់ថា៖ ការនាំចេញអង្ករក្នុងរយៈពេល ៧ខែ ឆ្នាំ២០២២ បានចំនួន ៣៥ ម៉ឺនតោន គិតជាទឹកប្រាក់ចំនួនជាង ២១៨ លានដុល្លារសហរដ្ឋអាមេរិក កំណើនឡើងជាង ១៣% បើប្រៀបធៀបរយៈពេលដូចគ្នាក្នុងឆ្នាំ ២០២១, ក្នុងនោះ កម្ពុជាបាននាំអង្ករចេញទៅកាន់ទីផ្សារអន្តរជាតិតាមរយៈក្រុមហ៊ុននាំចេញអង្ករ ចំនួន ៥៣ក្រុមហ៊ុន, ទៅកាន់គោលដៅចំនួន ៥៦ ប្រទេស ក្នុងនោះកម្ពុជាបាននាំចេញទៅកាន់ប្រទេសចិន ម៉ាកាវ និងហ៊ុងកុង បានចំនួនជាង ១៦ ម៉ឺនតោន ស្មើជាង ៤៨% នៃការនាំចេញសរុប គិតជាទឹកប្រាក់មានជាង ៨៩លានដុល្លារ, ការនាំចេញទៅកាន់ប្រទេសនៅក្នុងតំបន់សហគមន៍អឺរ៉ុបចំនួន ២៥ ប្រទេស មានបរិមាណ ១២ម៉ឺនតោន ស្មើនឹង ៣២% នៃការនាំចេញសរុប គិតជាទឹកប្រាក់ជាង ៨៦ លានដុល្លារ, ទៅកាន់ប្រទេសអាស៊ានចំនួន ៤ ប្រទេស មានជិត ៣០ពាន់តោន ស្មើនឹង ៩% នៃការនាំចេញសរុប គិតជាទឹកប្រាក់មានជាង ២០លានដុល្លារ និងបណ្តាលគោលដៅផ្សេងៗទៀតមានចំនួន ២៤ប្រទេស ក្នុងបរិមាណជាង ២៨ ពាន់តោន ស្មើជាង ១០% គិតជាទឹកប្រាក់ជិត ២៣ លានដុល្លារសហរដ្ឋអាមេរិក៕ អត្ថបទ៖ សុន រ៉ាឌី