អ៊ុយក្រែន៖ ប្រធានាធិបតីអ៊ុយក្រែនលោក Volodymyr Zelenskyy កាលពីថ្ងៃសុក្របានចោទប្រកាន់រុស្ស៊ីពីការប្រើប្រាស់ថាមពលជាអាវុធ ដើម្បីដាក់គោលដៅលើមនុស្សគ្រប់គ្នានៅអឺរ៉ុប។ លោក Zelenskyy និយាយថា នេះគឺជាការបង្ហាញពីគោលនយោបាយប្រឆាំងអឺរ៉ុប និងគោលនយោបាយប្រឆាំងមនុស្សជាតិដោយមានចេតនារបស់រុស្ស៊ី។
នៅក្នុងសុន្ទរកថា មេដឹកនាំអ៊ុយក្រែនរូបនេះបានសម្តែងក្តីសង្ឃឹមថា វិបត្តិស្បៀងអាហារពិភពលោកអាចយកឈ្នះបាន ខណៈនាវាចំនួន 3គ្រឿងបន្ថែមទៀតដែលដឹកគ្រាប់ធញ្ញជាតិបានចាកចេញពីកំពង់ផែអ៊ុយក្រែន។ នាវាទាំងនោះបានធ្វើដំណើរតាមដែនទឹកឆ្ពោះទៅទីកន្លែងត្រួតពិនិត្យទំនិញ ដែលត្រូវបានពន្យារពេលជាច្រើនខែ ជាសញ្ញាមួយបង្ហាញថា កិច្ចព្រមព្រៀងអន្តរជាតិក្នុងការនាំចេញគ្រាប់ធញ្ញជាតិ ត្រូវបានធ្វើឡើងចាប់តាំងពីប្រទេសរុស្ស៊ីបានវាយលុកលើអ៊ុយក្រែនកំពុងដំណើរការមួយជំហានម្តងៗ។
លោក Zelenskyy បានជំរុញឱ្យប្រទេសលោកខាងលិចអនុវត្តទណ្ឌកម្មតឹងរ៉ឹង ប្រឆាំងឧស្សាហកម្មនុយក្លេអ៊ែររុស្ស៊ីដោយចាត់ទុកវាថា បញ្ហាសុវត្ថិភាព។ ក្រុមហ៊ុន Energoatom ដែលដំណើរការរោងចក្រថាមពលនុយក្លេអ៊ែររបស់ប្រទេសអ៊ុយក្រែនបាននិយាយថា គ្រាប់ផ្លោងបីគ្រាប់បានធ្លាក់កាលពីពេលល្ងាចនៅលើទឹកដីនៃរោងចក្រ Zaporizhzhia ជារោងចក្រធំបំផុតរបស់អឺរ៉ុប ប៉ុន្តែគ្មានការស្លាប់ ឬការខូចខាតម៉ាស៊ីនរ៉េអាក់ទ័រត្រូវបានគេរាយការណ៍នោះទេ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
