បាល់ទាត់៖ មុនទទួលបានឱកាសបង្ហាញខ្លួនទៀងទាត់ សម្រាប់សមាគមកីឡាបាល់ទាត់កងយោធពលខេមរភូមិន្ទដូចបច្ចុប្បន្ន ខ្សែការពារ រឿម ចាន់រឿន បានឆ្លងកាត់ការតស៊ូប្រឹងប្រែងយ៉ាងខ្លាំង។ ចាកចេញពីស្រុកកំណើតឯខេត្តបាត់ដំបងក្នុងឆ្នាំ២០១៤ ដើម្បីមកបន្តការសិក្សាកម្រិតមហាវិទ្យាល័យ ចាន់ រឿន ត្រូវបានណែនាំពីសំណាក់រៀមច្បងមួយរូប ឲ្យចូលសាកល្បងសមត្ថភាពនៅសមាគមកីឡាបាល់ទាត់កងយោធពលខេមរភូមិន្ទ (កាលណោះនៅឈ្មោះជាក្លិបបាល់ទាត់កងក្រសួងការពារជាតិ) ហើយក៏ទទួលបានឱកាសចូលក្រុមធំក្នុងរដូវកាល២០១៥។
ខ្សែការពារស្លាបខាងលើរំឭកថា ទម្រាំអាចទទួលបានទំនុកចិត្តពីថ្នាក់ដឹកនាំ និងគ្រូបង្វឹកបែបនេះ គេត្រូវប្រឹងប្រែងខ្លាំង ព្រោះការឈានជើងចូលលក្ខណៈអាជីពដំបូង គឺចំពេលគេមានអាយុច្រើនបន្តិចទៅហើយ ហើយក៏មិនសូវមានទេពកោសល្យខ្លាំងក្នុងការលេងផ្លូវការដែរ។ ចាន់ រឿន រៀបរាប់ថា កាលចូលដំបូងៗមានការលំបាកច្រើន គេមើលមកយើង គិតថាប្រហែលទៅមិនរួចទេ។ ដុងបាល់ទាត់ពីកំណើតក៏មិនសូវមាន ហើយចូលលេងបាល់ទាត់ក៏ធំទៅហើយដែរ ពេលមកពីខេត្តអាយុ១៧-១៨ ហើយហ្នឹង។ ដល់ពេលយើងទទួលបានការណែនាំពីគ្រូ យើងក៏ខំប្រឹងប្រែងដោយខ្លួនឯង ងើបពីព្រលឹមហាត់ខ្លួនឯងអ៊ីចឹងទៅ ថ្ងៃហាត់ជាមួយក្រុម ហើយទោះគេសម្រាកយើងនៅតែហាត់ ថ្ងៃសៅរ៍ អាទិត្យក៏នៅតែហាត់។ ខិតខំ និងព្យាយាមធ្វើតាមអ្វីដែលគ្រូចង់បាន។
មួយទៀតគឺមានវិន័យចំពោះខ្លួនឯង ហើយគោរពវិន័យក្រុម និងក្លិបទើបទទួលបានផលពីការប្រឹងប្រែង។ គួរដឹងដែរថា ក្នុងឆ្នាំ២០១៥ ដែលឆ្នាំដំបូងនៃអាជីពបាល់ទាត់ រឿម ចាន់រឿន ត្រូវបានកោះហៅចូលរួមក្រុមជម្រើសជាតិអាយុក្រោម ១៩ឆ្នាំចេញទៅប្រកួតជើងឯក AFF U19 Championship នៅប្រទេសឡាវ។ មួយឆ្នាំក្រោយមកគេក៏ជាប់ក្រុមធំជម្រើសជាតិ ដែលកាលណោះដឹកនាំដោយ លោក Lee Tae-hoon៕
អត្ថបទ៖ CNCC
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
