ភ្នំពេញ៖ ក្រោយពីកិច្ចប្រជុំរដ្ឋមន្រ្តីការបរទេសអាស៊ាន បានបញ្ចប់ទៅ អ្នកជំនាញទេសចរណ៍ បាន​ស្នើអាស៊ានសាមគី្គគ្នា ​គោរពគោលការណ៍កិច្ចសហប្រតិបត្តិការនានារបស់អាស៊ាន ឲ្យបាន​ពេញលេញ ​ដើម្បីជំរុញកំណើនទេសចរណ៍សេដ្ឋកិច្ច និងរក្សាស្ថេរភាពនយោបាយនៅក្នុងតំបន់។

នៅក្នុងកិច្ចប្រជុំរដ្ឋមន្ត្រីការបរទេសអាស៊ាន លើកទី៥៥ បានចេញសេចក្តីថ្លែងការណ៍រួមដោយបាន​ឯកភាព​អនុវត្តគោលការណ៍កិច្ចសហប្រតិបត្តិការចំនួន១១៩ នៅក្នុងនោះរដ្ឋមន្ត្រីការបរទេស​អាស៊ាន ក៏បានគាំទ្រលទ្ធផលនៃកិច្ចប្រជុំរដ្ឋមន្ត្រីទេសចរណ៍អាស៊ានលើកទី២៥​ និងកិច្ចប្រជុំពាក់ព័ន្ធ ដែលរួមមានការប្រកាសអំពីការបើកទេសចរណ៍អាស៊ានឡើងវិញជាបណ្តើរៗ ក្នុងគោលបំណង​បង្កើន​ល្បឿន​ដល់​ដំណើរការស្តារឡើងវិញនៃឧស្សាហកម្មទេសចរណ៍ក្នុងតំបន់ ​និងពង្រឹងនិរន្តរភាព និងភាពធន់នៃវិស័យនាពេលអនាគតផង។

លើសពីនេះ រដ្ឋមន្ត្រីការបរទេសអាស៊ាន ក៏បានគាំទ្រការអនុម័តគោលការណ៍ណែនាំអាស៊ាន​ស្តីពី​អនាម័យ និងសុវត្ថិភាពសម្រាប់អ្នកជំនាញនិងសហគមន៍ ក្នុងឧស្សាហកម្មទេសចរណ៍ រួមជាមួយ​នឹងការដាក់ឱ្យប្រើប្រាស់ត្រាធ្វើដំណើរប្រកបដោយសុវត្ថិភាពអាស៊ាន “សុវត្ថិភាព និងកក់ក្តៅ” គោលការណ៍ណែនាំអាស៊ាន ​ស្តីពីការទទួលស្គាល់ការសិក្សាទុកជាមុន និងការបោះពុម្ពផ្សាយ​ស្តង់ដារ​ទេសចរណ៍សហគមន៍អាស៊ានលើកទី២​ ដែលនឹងជួយបង្កើនទំនុកចិត្ត គុណភាពសេវា​កម្មទេសចរណ៍ ​ឆ្ពោះទៅកាន់គោលដៅទេសចរណ៍សុវត្ថិភាព​ក្នុងតំបន់អាស៊ានរួមគ្នាតែមួយ។

លោក ធួន ស៊ីណាន​ ប្រធានសមាគមន៍ទេសចរណ៍អាស៊ីប៉ាស៊ីភិច PATA ប្រចាំនៅកម្ពុជា បានថ្លែង​ស្នើឲ្យអាស៊ាន រួមគ្នាអនុវត្តគោលការណ៍កិច្ចសហប្រតិបត្តិការនានា ដែលអាស៊ានបានឯកភាព​គ្នា​ដាក់ចេញដើម្បីអនុវត្ត ហើយតាមរយៈកិច្ចប្រជុំរដ្ឋមន្ត្រីការបរទេសអាស៊ានលើកទី៥៥​ដែលកម្ពុជា​ធ្វើជាប្រធាននេះ ​ក៏នឹងជម្រុញឲ្យអាស៊ានសាមគី្គគ្នាជម្រុញការស្តារវិស័យទេសចរណ៍ សេដ្ឋកិច្ច​និងស្ថេរភាពនយោបាយក្នុងតំបន់អាស៊ានឲ្យល្អប្រសើរឡើងវិញ។

បណ្ឌិត គី សេរីវឌ្ឍ អ្នកជំនាញសេដ្ឋកិច្ចនៃរាជបណ្ឌិតសភាកម្ពុជា ​ក៏បានថ្លែងដែរថា កិច្ចប្រជុំរដ្ឋ​មន្ត្រី​ការបរទេសអាស៊ាន អាស៊ានបូក ​និងអាស៊ានដៃគូនេះ គឺពិតជាសារសំខាន់ខ្លាំងណាស់ ជាពិសេស​ជម្រុញ​ការដោះស្រាយវិបត្តិនានា​របស់​អាស៊ាន​ដើម្បីជម្រុញ​ប្រជាជាតិអាស៊ីអាគ្នេយ៍​រស់​នៅប្រកប​សុខសន្តិភាព ​និងការជម្រុញឲ្យថ្នាក់ដឹកនាំបណ្តាប្រទេស​ជម្រុញ​ការដករបាំងការ​ធ្វើ​ដំណើរ​អន្តរជាតិ​ឲ្យបានច្រើនថែមទៀត​ ដែលនឹង​ជម្រុញកំណើនទេសចរណ៍ និងកំណើនសេដ្ឋកិច្ច​មក​កម្ពុជា និងក្នុងតំបន់ផងដែរ។

ឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានថ្លែងថា ព្រឹត្តិការណ៍​កិច្ចប្រជុំរដ្ឋមន្ត្រីការបរទេសអាស៊ាននេះ ​ក៏ជាព្រឹត្តិការណ៍ទេសចរណ៍​លំដាប់ខ្ពស់និង​មាន​សក្តានុពល​ខ្លាំងណាស់​ ហើយកម្ពុជាទទួលបានផលចំណេញច្រើន ពិសេសការជំរុញផ្សព្វផ្សាយ​ទេសចរណ៍កម្ពុជា​ និងបង្ហាញឲ្យគោលដៅទេសចរណ៍មានសុខសុវត្ថិភាព៕

អត្ថបទ ស៊ុម សុខជា