ភ្នំពេញ៖ ក្រសួងបរិស្ថាន ក្នុងឆ្នាំ២០២១-២០២២ បានផ្តល់រថយន្តដឹកសំរាម សំណល់រឹង ចំនួន ៥៨គ្រឿង ឡដុតសំរាម ៦០គ្រឿង ម៉ូតូកង់បី ១១៨គ្រឿង និងសម្ភារគាំទ្រជាច្រើន ជូន​ដល់​រដ្ឋ​បាល​ក្រុង ស្រុក អង្គភាព និងប្រតិបត្តិករមួយចំនួន ដើម្បីពង្រឹងភាពជាម្ចាស់ នៃការគ្រប់​គ្រង​សំរាម​សំណល់​ទីប្រជុំជនប្រកបដោយនិរន្តរភាព ។ 

យោងតាមបណ្ដាញហ្វេសប៊ុក របស់ក្រសួងបរិស្ថាន នៅថ្ងៃទី៨ ខែសីហា ឆ្នាំ២០២២នេះ បាន​ឲ្យ​ដឹង​ថា មធ្យោបាយ និងសម្ភារទាំងអស់នោះ បាននិងកំពុងត្រូវប្រើប្រាស់ ចូលរួមសម្អាត ប្រមូល ដឹកជញ្ជូន និងទុកដាក់សំរាម សំណល់រឹងនៅទូទាំងប្រទេស ក្នុងគោល​បំណង​រួម​គ្នា​គាំទ្រ​ការ​រស់​នៅ​ស្អាត ភូមិឋានស្អាត ក៏ដូចជាការឆ្លើយតបនឹងគោលនយោបាយ ច្បាប់ បទដ្ឋានគតិយុត្ត និង​ទស្សន​វិស័យ របស់រាជរដ្ឋាភិបាល ។

ក្រសួងបន្តថា ការផ្ដល់នេះ នឹងធ្វើឱ្យប្រសើរឡើងនូវការគ្រប់គ្រងសំរាម សំណល់រឹងទីប្រជុំជន ប្រកប​ដោយប្រសិទ្ធិភាព តម្លាភាព និងគណនេយ្យភាព សំដៅបាននូវសោភ័ណភាព កិច្ចគាំពារ​បរិស្ថាន សុខភាពសាធារណៈ និងបរិស្ថាន ក៏ដូចជារួមចំណែកធ្វើឱ្យភូមិ ឃុំ សង្កាត់ កាន់​តែ​មាន​បរិស្ថាន​ស្អាត ការរស់នៅប្រកបដោយផាសុកភាព សុខុមាលភាព និងសោភ័ណភាព ទាក់ទាញ ស្រប​ទៅនឹងកំណើននគរូបនីយកម្ម និងការអភិវឌ្ឍសេដ្ឋកិច្ចដ៏ឆាប់រហ័ស ។

ជាមួយគ្នានេះដែរ ក្រសួងបរិស្ថាន បានផ្តល់ការបណ្តុះបណ្តាល ដល់រដ្ឋបាលថ្នាក់ក្រោមជាតិ លើ​បច្ចេកទេស ក្នុងការគ្រប់គ្រងសំរាម សំណល់រឹង និងគម្រោងរៀបចំទីលានចាក់សំរាម តាម​ខ្នាត​បច្ចេក​ទេសផងដែរ ។

ក្នុងនោះរដ្ឋបាលក្រុង ស្រុកមួយចំនួន បាននិងកំពុងអនុវត្តគោលនយោបាយ ស្តីពីការ​គ្រប់គ្រង​សំរាម សំណល់រឹងទីប្រជុំជន បានល្អប្រសើរ និងមួយចំនួនទៀត កំពុងឈានឆ្ពោះ ទៅ​រក​ការ​គ្រប់​គ្រង​សំរាម សំណល់រឹង ប្រកបដោយប្រសិទ្ធភាព ក្នុងពេលអនាគតខាងមុខ ដើម្បី​ឈាន​ទៅ​ធ្វើ​ភាព​ជា​ម្ចាស់ នៃការគ្រប់គ្រងសំរាម សំណល់ទីប្រជុំជន ប្រកបដោយនិរន្តរភាព ៕  អត្ថបទ៖ បាន សុខរិទ្ធិ