កំពង់ឆ្នាំង ៖ នៅព្រឹកថ្ងៃទី០៨ ខែសីហា ឆ្នាំ២០២២នេះ ប្រជាពលរដ្ឋក្នុងក្រុងកំពង់ឆ្នាំង បាន​បន្ត​សំណូមពរ​ដល់​អាជ្ញាធរខេត្តកំពង់ឆ្នាំង និង​មន្ទីរ​ពាក់ព័ន្ធ​ជួយ​ពិនិត្យ​មើល​លើ​បច្ចេកទេស នៃ​ការ​ចែក​ចាយ​ទឹក​ស្អាត​របស់ក្រុមហ៊ុនអានកូផង ព្រោះក្នុងឆ្នាំ២០២២នេះ នៅ​ពេល​ពួក​គាត់​បើក​ទឹក​ស្អាត​ប្រើប្រាស់​ក្នុងគ្រួសារ តែងតែជួបប្រទះឃើញទឹកល្អក់ ទឹកមានកករដី ប្រៀប​បាន​ទឹក​ទន្លេ​ជា​ញឹក​ញាប់ ដោយមិនដឹងមូលហេតុ ហើយករណីបែបនេះ គឺមានរយៈពេលជិត ១ឆ្នាំមកហើយ មិន​ទាន់​មាន​ការ​ដោះស្រាយនៅឡើយ។

ប្រជាពលរដ្ឋបន្តថា ចំពោះថវិការបង់ថ្លៃសេវាទឹកស្អាតនេះ ពួក​គាត់​មិន​ដែល​ខ្វះ​មួយ​រៀល​ណា​ឡើយ​ តែសុំធ្វើយ៉ាងណា អោយទឹកស្អាតដែលពួកគាត់កំពុងតែប្រើប្រាស់នេះ ជាទឹកសុវត្ថិភាព និង​មិនមានផលប៉ះពាល់ដល់សុខភាពពួកគាត់ទៅចុះ។

ពាក់ព័ន្ធនឹងបញ្ហាទឹកស្អាតដែលប្រជាពលរដ្ឋបានជួបប្រទះទឹកកករល្អក់នេះ លោក ទិត្យ វង្ស​វិសាល ប្រធានមន្ទីរឧស្សាហកម្ម បានអោយដឹងថា លោកក៏ធ្លាប់ទទូលបានព័ត៌មានពីប្រជាពលរដ្ឋ ហើយលោកតែងតែដឹកនាំក្រុមការងារជំនាញ ចុះពិនិត្យ​ដល់​ទីតាំង​ផលិត​ទឹក​ស្អាត​របស់​ក្រុមហ៊ុន​អានកូ​ ដើម្បី​ពិនិត្យទៅលើបច្ចេកទេស និងការចែកចាយទឹកស្អាតជូនប្រជាពលរដ្ឋប្រើប្រាស់។ ពាក់​ព័ន្ធនឹងបច្ចេកទេសនៅទីតាំងផលិតទឹកស្អាតរបស់ក្រុមហ៊ុន គឺមិនមានអ្វីខុសទាស់នោះឡើយ ក៏​ប៉ុន្តែ​ក្រុម​ការងារ​របស់​មន្ទីរ​បាន​រក​ឃើញ​បញ្ហា​មិន​ប្រក្រតី​មួយ​ចំនួន​ដែល​ធ្វើ​អោយ​ទឹក​ស្អាត​ប្រែ​ជា​កករល្អក់ ដោយសារតែការជួសជុលផ្លូវ ការជីកកាយដាក់ប្រព័ន្ធលូ ឬប្រព័ន្ធបណ្តាញផ្សេងៗ ធ្វើ​អោយ​ប៉ះពាល់ទៅដល់ទុយយោទឹកស្អាត(ទុយយោមេ)បែកធ្លុះធ្លាយ ដីចូល​ក្នុង​ប្រព័ន្ធ​ទុយ​យោ​ចែក​ចាយ​ទឹកស្អាត នាំអោយទឹកថ្លាប្រែជាកករល្អក់តែម្តង។ លោកប្រធានមន្ទីរ ក៏បានសំណូមពរ​ដល់​អាជ្ញាធរ​ក្រុងកំពង់ឆ្នាំង និងមន្ទីរពាក់ព័ន្ធ ពេលជីកគាស់កាយចិញ្ចើមផ្លូវ សូមផ្តល់ដំណឹង ឬ​សហការ​ជាមួយក្រុមហ៊ុនទឹកស្អាតអានកូ ដើម្បីជៀសវាងការ​ជីក​គាស់​កាយ​ប៉ះ​ចំទុយ​យោ​ទឹក​ស្អាត នាំអោយប៉ះពាល់ដល់ការប្រើប្រាស់ទឹក និងសុខុមាលភាពប្រជាពលរដ្ឋ។

ចំណែកលោក ញ៉យ កាន់ ប្រធានគ្រប់គ្រងទឹកស្អាតរបស់ក្រុមហ៊ុនអានកូបានបញ្ជាក់ថា រៀង​រាល់​ថ្ងៃ​ លោកតែងពិនិត្យមើលប្រព័ន្ធផលិតទឹកស្អាតជាប្រចាំ ហើយ​ក្រុម​ហ៊ុន​បាន​បំពាក់​នូវ​ម៉ាស៊ីន​ចំរោះ​ថ្មី​បន្ថែម មិនមានបញ្ហាអ្វីទាក់ទងនឹងបច្ចេកទេសនៅទីតាំងផលិតទឹកស្អាតឡើយ។ ក៏​ប៉ុន្តែ​នៅ​រ​ដូវប្រាំង លោកទទួលស្គាល់ថា ពិតជា​អាច​មាន​បញ្ហា​ល្អក់​ម្តង​ម្កាល​ពី​ទីតាំង​ផលិត​ទឹក​ស្អាត​មែន ក៏ព្រោះនៅរដូវប្រាំងតែទឹកទន្លេរាក់ និងកខ្វក់ខ្លាំង។ លោក​បាន​សំណូមពរ​ដល់​ក្រុម​ការងារ​ជីក​ចិញ្ចើម​ថ្នល់​គ្រប់កន្លែងជួយសហការជាមួយក្រុមការងារទឹកស្អាតផង ដើម្បីកុំអោយប៉ះ​ពាល់​ដល់​ប្រព័ន្ធ​ទុយយោទឹក​ស្អាត​ដែលប្រជាពលរដ្ឋ​កំពុង​ប្រើប្រាស់៕ អត្ថបទ៖ ហុង វាស្នា