ស្វាយរៀង៖ បើទោះជាជំងឺកូវីដ-១៩ នៅក្នុងខេត្តស្វាយរៀង បានស្ងប់ស្ងាត់​ចម្លងចូលសហគមន៍ ឬនៅ តាមរោងចក្រ សហគ្រាស ក៏ពិតមែន តែវិធាន៣ការពារ​ និង៣កុំ ត្រូវបានកម្មករ កម្មការិនី នៅ តាមរោងចក្រ សហគ្រាស បន្តអនុវត្តយ៉ាង​ខ្ជាប់ខ្ជួន​ មុន​ពេលចេញចូលបម្ររើការងារ។

លោក អ៊ូ សុខឿន ប្រធានមន្ទីរការងារបណ្ដុះបណ្ដាលវិជ្ជាជីវៈខេត្តស្វាយរៀង​ បានប្រាប់ BTVថា កម្មករ កម្មការិនី នៅខេត្តស្វាយរៀង រហូតមកដល់បច្ចុប្បន្ននេះ បានបន្តអនុវត្តវិធានការ សុខាភិបាល ពិសេស វិធានការ ៣ការពារ និង៣កុំ បានយ៉ាង​ខ្ជាប់ខ្ជួន ​តាមរយៈពាក់ម៉ាស លាង សម្អាតដៃ មុនពេលចូលបម្រើការងារ ​និងពេលជួបជុំគ្នានៅក្រៅបរិវេណ​ ពិសេសនៅលើ​មធ្យោបាយ​ដឹកជញ្ជូន ​ពេលចូលទៅបម្រើការងារ ​និងពេលចេញពីបម្រើការងារ វិលត្រឡប់មកជួបជុំ គ្រួសារវិញ ។

លោក បានបញ្ជាក់បន្ដថា កម្មការ កម្មការិនី បានយល់ដឹងថា ការពាក់ម៉ាស នៅកន្លែងជួប ជុំគ្នាច្រើន អាចកាត់​បន្ថយការចម្លងជំងឺផ្សេងៗ ​ក្រៅពីជំងឺកូវីត-១៩​ បានខ្លះដែរ​ ទើបពួកគេបាន បន្ត​អនុវត្តការពាក់ម៉ាសមកបែបនេះ។

លោកប្រធានមន្ទីរ បានបញ្ជាក់ថា ខេត្តស្វាយរៀង បន្ទាប់ពីរាជរដ្ឋាភិបាលបានបង្កើតឲ្យ មានតំបន់​សេដ្ឋកិច្ចពិសេស ​នៅឆ្នាំ២០០៥ មកដល់បច្ចុប្បន្ន​ មានតំបន់សេដ្ឋកិច្ចពិសេសចំនួន​ ១២ទីតាំង ហើយបាន​នឹងកំពុងដំណើរការចំនួន៩ទីតាំង​ ដោយមានកម្មករកម្មការិនី​បម្រើការងារ ​ជាង៩ម៉ឺននាក់ ហើយនៅក្នុងវិបត្តិជំងឺកូវីដ-១៩ ​កម្មករកម្មការិនី ប្រមាណតែ១ ឬ២ភាគរយ ប៉ុណ្ណោះ ដែលបានឆ្លង៕

អត្ថបទ៖ ភា សារិត