ភ្នំពេញ៖ រាជរដ្ឋាភិបាលកម្ពុជា បានចាប់ផ្តើមធ្វើសេចក្តីព្រាងច្បាប់ ស្តីពីព្រៃឈើ និងជលផល និងច្បាប់ស្តីពី តំបន់ការពារធម្មជាតិ ដើម្បីជំរុញ និងលើកកម្ពស់ឲ្យថ្នាក់ក្រោមជាតិ ទទួលខុសត្រូវក្នុងកិច្ចការពារ និងអភិរក្សព្រៃឈើ និងធនធានធម្មជាតិប្រកបដោយប្រសិទ្ធភាពខ្ពស់។

នៅក្នុងកិច្ចប្រជុំអន្តរក្រសួង ស្ដីអំពីការរៀបចំសេចក្ដីព្រាងច្បាប់ ស្ដីពីព្រៃឈើ ជលផល និងតំបន់ការពារធម្មជាតិ នៅព្រឹកថ្ងៃទី៨ ខែសីហា នេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងថា ការរៀបចំធ្វើសេចក្ដីព្រាងច្បាប់ ស្ដីពីព្រៃឈើ ជលផល និងតំបន់ការពារធម្មជាតិ នាពេលនេះ គឺជាការអនុវត្តតាមអនុសាសន៍សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ស្របតាមគោលនយោបាយរបស់រាជរដ្ឋាភិបាល។

សម្តេចក្រឡាហោម បានបញ្ជាក់បន្ថែមថា «ការរៀបចំសេចក្ដីព្រាងច្បាប់ទាំង៣នេះ ក៏មានគោលដៅធ្វើឱ្យស្របតាមបន្ទាត់កំណែទម្រង់វិមជ្ឈការ និងវិសហមជ្ឈការ ដើម្បីជំរុញ និងលើកកម្ពស់ការទទួលខុសត្រូវរបស់រដ្ឋបាលថ្នាក់ក្រោមជាតិ និងប្រជាពលរដ្ឋ ក្នុងការការពារ ការអភិរក្ស និងការអភិវឌ្ឍធនធានធម្មជាតិ ប្រកបដោយប្រសិទ្ធភាព និងនិរន្តរភាពនៅកម្ពុជាផងដែរ» ។

យ៉ាងណាក៏ដោយ សម្តេចក្រឡាហោម ស ខេង ពុំទាន់បានបញ្ជាក់ថាតើសេចក្តីព្រាងច្បាប់នេះមានប៉ុន្មានជំពូក និងប៉ុន្មានមាត្រានៅឡើយទេ និងពេលវេលាជាក់លាក់ នឹងត្រូវចាប់ផ្តើមតាក់តែងដែរ។

កិច្ចប្រជុំអន្តរក្រសួងនេះ គឺមានការចូលរួមពីឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន និងឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ ព្រមទាំងមន្ត្រីជាន់ខ្ពស់អន្តរក្រសួងមួយចំនួនទៀត៕ អត្ថបទ៖ បាន ចក់