ភ្នំពេញ៖ ដើមសប្ដាហ៍នេះ អន្តរក្រសួង បានរៀបចំកិច្ចប្រជុំពីសេចក្ដីព្រាងច្បាប់ ស្ដីពីព្រៃឈើ ច្បាប់ស្ដីពីជលផល និងច្បាប់ស្ដីពីតំបន់ការពារធម្មជាតិ។ ជុំវិញកិច្ចការនេះ វេទិកានៃអង្គការមិនមែនរដ្ឋាភិបាល ស្ដីពីកម្ពុជា ហៅកាត់ថា NGO FORUM បង្ហាញការគាំទ្រ និងចង់ឱ្យមានការពន្លឿន ក៏ដូចជាការបង្ហាញផ្សព្វផ្សាយសេចក្ដីព្រាងទាំងមូលឱ្យបានទូលំទូលាយ។

បញ្ហាព្រៃឈើ ជាប្រធានបទមានការចាប់អារម្មណ៍ច្រើន ជាពិសេសខណៈពេលមានការឈូសឆាយ​ព្រៃឈើ ក្នុងតំបន់ភ្នំតាម៉ៅ ដោយក្រុមហ៊ុនអភិវឌ្ឍន៍។ យ៉ាងណាម៉ិញសកម្មភាពនេះ ត្រូវបានបញ្ឈប់ ដោយប្រមុខរាជរដ្ឋាភិបាលកម្ពុជា និងតម្រូវឱ្យក្រុមហ៊ុនឈូសឆាយត្រូវដាំដើមឈើឡើងវិញ លើផ្ទៃដីដែលឈូសឆាយរួច។

ភ្ជាប់ជាមួយរឿងព្រៃឈើនេះ សម្ដេចក្រឡាហោម ស ខេង រដ្ឋមន្រ្តីក្រសួងមហាផ្ទៃ និងមានការ​ចូលរួមពីរដ្ឋមន្ត្រីក្រសួងកសិកម្ម រដ្ឋមន្រ្តីក្រសួងបរិស្ថាន​ និងរដ្ឋមន្រ្តីក្រសួងយុត្តិធម៌ ​កាលពីថ្ងៃទី០៨ ខែសីហាម្សិលម៉ិញ បានរៀបចំកិច្ចប្រជុំ លើសេចក្ដីព្រាងច្បាប់ ស្ដីពីព្រៃឈើ ច្បាប់ស្ដីពីជលផល និងច្បាប់ស្ដីពីតំបន់ការពារធម្មជាតិ។

កិច្ចប្រជុំនេះ ក៏មានការចាប់អារម្មណ៍ ពីខាងអង្គការសង្គមស៊ីវិល ដែលធ្វើការពាក់ព័ន្ធនឹងការងារ​បរិស្ថាន។ ជាក់ស្ដែងសម្រាប់ វេទិកានៃអង្គការមិនមែនរដ្ឋាភិបាល ស្ដីពីកម្ពុជា ហៅកាត់ថា NGO FORUM ក៏គាំទ្រចំពោះកិច្ចការនេះដែរ។

លោក ភាព សុភា ប្រធានកម្មវិធីអភិបាលកិច្ចដីធ្លី និងធនធានធម្មជាតិ របស់ NGO FORUM លើកឡើងបន្ថែមថា ភ្ជាប់ជាមួយការគាំទ្រ​ និងគោលបំណងឱ្យពន្លឿនលើកិច្ចការនេះ គឺលោក​ចង់ឱ្យមានការចែក​រំលែក​ឱ្យ​ទូលំទូលាយ​នូវ​សេចក្ដីព្រាងច្បាប់ទាំងមូល ដើម្បីក្រុមអង្គការសង្គម​ស៊ីវិល និងអ្នកពាក់ព័ន្ធទាំងអស់អាចពិនិត្យមើល​ និងផ្ដល់ជាធាតុចូលបន្ថែមនូវចំណុចខ្វះខាត សម្រាប់ផលប្រយោជន៍រួម។

ពាក់ព័ន្ធនឹងសេចក្ដីព្រាងច្បាប់ទាំង ៣នេះ សម្ដេចក្រឡាហោម ស ខេង ក្នុងកិច្ចប្រជុំកាលពី​ម្សិលម៉ិញ បញ្ជាក់ថា ការរៀបចំធ្វើសេចក្ដីព្រាងច្បាប់ស្ដីពីព្រៃឈើ​ ច្បាប់ស្ដីពីជលផល និង​ច្បាប់ស្ដីពីតំបន់ការពារធម្មជាតិ នាពេលនេះ ​គឺជាការអនុវត្តតាមអនុសាសន៍ដ៏ខ្ពង់ខ្ពស់ របស់​សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ស្រប​តាមគោលនយោបាយរបស់រាជរដ្ឋាភិបាល។

សម្ដេចក្រឡាហោម បន្តថា ការរៀបចំសេចក្ដីព្រាងច្បាប់ទាំង ៣នេះ ក៏មានគោលដៅ​ធ្វើឱ្យ​ស្របតាម​បន្ទាត់កំណែទម្រង់វិមជ្ឈការ និងវិសហមជ្ឈការ ដើម្បីជំរុញ និងលើកកម្ពស់ការទទួល​ខុសត្រូវរបស់រដ្ឋបាលថ្នាក់ក្រោមជាតិ និងប្រជាពលរដ្ឋក្នុងការការពារ ការអភិរក្ស និងការ​អភិវឌ្ឍធនធានធម្មជាតិប្រកបដោយប្រសិទ្ធភាព និងនិរន្តរភាពនៅកម្ពុជាផងដែរ៕ អត្ថបទ៖ គឹមហុក