ភ្នំពេញ៖ លោកជំទាវបណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ ព្រឹកថ្ងៃទី៩ ខែសីហា ឆ្នាំ២០២២នេះ បានជួបសំណេះសំណាលជាមួយគណៈប្រតិភូសមាគម​សិល្បៈវប្បធម៌ខ្មែរ សមាគមឱសថការី និងសមាគមគ្រូពេទ្យ មកពីប្រទេសបារាំង ចំនួន៥៨នាក់។

លោកជំទាវបណ្ឌិតសភាចារ្យ ភឿង សកុណា សូមស្វាគមន៍ និងរីករាយចំពោះវត្តមានរបស់​សមាគម​ទាំង៣ មកពីប្រទេសបារាំង ​ដោយផ្ទាល់ដែលដឹកនាំដោយលោក​ Lor Vila ​ប្រធានសមាគមSCK, លោកស្រី Vong Melanie ប្រធានសមាគម ​Nexty Pharm និងលោក​ Nicollet Martine ប្រធាន​សមាគមACK ដែលបានធ្វើដំណើរពីប្រទេសបារាំង ​មានបេសកកម្មសំខាន់ៗជាច្រើន ក្នុងការជួយ​លើក​កម្ពស់សិល្បៈវប្បធម៌ ​ដោយធ្វើការសម្តែងសិល្បៈរួមគ្នាជាមួយ ​នឹងសិល្បករក្នុងស្រុក ព្រមទាំង​ចុះទៅពិនិត្យ ពិគ្រោះព្យាបាលជំងឺចែកអំណោយថ្នាំពេទ្យដោយឥតគិតថ្លៃ ​ជូនប្រជាពលរដ្ឋខ្មែរ នៅខេត្តស្វាយរៀង ​និងខេត្តកណ្តាល។

ជាមួយគ្នានោះដែរ លោកស្រី Vong Melanie ប្រធានសមាគម Nexty Pharm បានថ្លែងអំណរគុណ​ដល់​លោក​ជំទាវ រដ្ឋមន្រី្តដែលបានទទួលស្វាគមន៍ចំពោះសមាគមទាំង៣ ​មកពីប្រទេសបារាំង ហើយ​ក៏ជាលើកទី១ ​ដែលសមាគមសិល្បៈវប្បធម៌ នៅប្រទេសបារាំង ​បានមកចូលរួមសម្តែង​សិល្បៈនៅ​កម្ពុជា។

សូមបញ្ជាក់ផងដែរថា ក្នុងសកម្មភាពនៃដំណើរទស្សនកិច្ចរបស់គណៈប្រតិភូ​សមាគម​សិល្បៈវប្បធម៌​ខ្មែរ ​សមាគម​ឱសថការី​ និង​សមាគមគ្រូពេទ្យ ​មកពីប្រទេសបារាំង ដោយមាន​កម្មវិធីដូចខាង​ក្រោម៖ ទស្សនកិច្ចនៅ​សារមនី្ទរឧក្រិដ្ឋកម្មប្រល័យពូជសាសន៍ទួលស្លែង, ទស្សនកិច្ច​នៅសារមនី្ទរជាតិកម្ពុជា,ទស្សនកិច្ចខេត្តកែប, ពិធីសំពះគ្រូនៅសាកលវិទ្យាល័យភូមិន្ទវិចិត្រសិល្បៈ, ចុះពិនិត្យ ព្យាបាលជំងឺជូនប្រជាពលរដ្ឋនៅស្រុកស្អាង ​ខេត្តកណ្តាល​ និងស្រុកស្វាយទាប ខេត្តស្វាយរៀង, ទស្សនាការសម្តែងសិល្បៈនៅសាលសន្និសីទចតុម្មុខ, ទស្សនកិច្ចនៅខេត្តសៀមរាប និងសកម្មភាពផ្សេងទៀតជាច្រើនផងដែរ៕ អត្ថបទ៖ រដ្ឋា