ភ្នំពេញ៖ យន្តការពង្រឹងអភិបាលកិច្ចទាំង ត្រូវការចាំបាច់ធនធានមនុស្ស ដើម្បីសម្រេចបាននូវ​សមិទ្ធផល ជាក់ស្តែងបម្រើផលប្រយោជន៍ប្រទេសជាតិ។ នេះបើតាមប្រសាសន៍មន្រ្តីជំនាញ នៃក្រសួងមុខងារសាធារណៈ។

ឯកឧត្តម យក់ ប៊ុនណា រដ្ឋលេខាធិការប្រចាំការ នៃក្រសួងមុខងារសាធារណៈ និងជានាយកសាលាភូមិន្ទរដ្ឋបាល តំណាងរដ្ឋមន្រ្តីក្រសួងមុខងារសាធារណៈ និងឯកឧត្តម សុខ គាង រដ្ឋលេខាធិការ តំណាងរដ្ឋមន្រ្តីក្រសួងបរិស្ថាន នៅថ្ងៃទី៩ ខែសីហានេះ បានអញ្ជើញ​ចូលរួមបិទវគ្គ​បណ្តុះបណ្តាលមន្រ្តី ជាន់ខ្ពស់ថ្នាក់ជាតិជំនាន់៣ និងមន្រ្តីមធ្យមថ្នាក់ក្រោមជាតិ​ជំនាន់៥ និងបើកវគ្គបណ្តុះបណ្តាលមន្រ្តីជាន់ ​ខ្ពស់ថ្នាក់ជាតិជំនាន់៤ នៃក្រសួងបរិស្ថាន។

ឯកឧត្តម បានលើកឡើងថា ការបណ្តុះបណ្តាលមន្រ្តីរាជការនៃក្រសួងបរិស្ថានទាំងថ្នាក់ជាតិ និង ថ្នាក់ក្រោមជាតិ នៅសាលាភូមិន្ទរដ្ឋបាល ​នៃក្រសួងមុខងារសធារណៈ ​លើជំនាញរដ្ឋបាលទូទៅ ហិរញ្ញវត្ថុ ​សាធារណៈ ​និងមុខជំនាញផ្សេងៗទៀតតាមតម្រូវការចាំបាច់ គឺឈរលើគោលដៅ​ជា​សារវន្ត នៃកំណែទម្រង់សាធារណៈ និងកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ ដែល​ជា​ផ្នែកដ៏សំខាន់ ​នៃអភិបាលកិច្ចល្អ ដែលជាឆ្អឹងខ្នង នៃកំណែទម្រង់រដ្ឋស៊ីជម្រៅ ដោយផ្អែក​លើ​យុទ្ធសាស្រ្តចតុកោណដំណាក់កាលទី៤ ​របស់រាជរដ្ឋាភិបាល​នៃព្រះរាជាណាចក្រកម្ពុជា។

មន្រ្តីក្រសួងបរិស្ថាន បានលើកឡើងដែរថា ​ក្រោយបញ្ចប់វគ្គសិក្សានៅសាលាភូមិន្ទរដ្ឋបាល នឹង យកចំណេះដឹងទាំងអស់នេះ ​ទៅពង្រឹងសមត្ថភាពការងារបន្ថែមទៀត ដើម្បីផលប្រយោជន៍​សង្គមជាតិ។

បន្ទាប់ពីចុះអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការបណ្តុះបណ្តាល រវាង​ក្រសួងមុខងារសាធារណៈ ​និងក្រសួងបរិស្ថាន នាឆ្នាំ២០១៤មក ​សាលាភូមិន្ទរដ្ឋបាល បាន​រៀបចំបណ្តុះ បណ្តាលមន្រ្តីក្រសួងបរិស្ថានទាំងថ្នាក់ជាតិ ​និងថ្នាក់ក្រោមជាតិ ចំនួន១១វគ្គ ដែលសិក្ខាកាមសរុបជាង ៣០០នាក់៕អត្ថបទ៖ ទូច សោភ័ណ