តាកែវ៖ ក្រុមគ្រូពេទ្យស្ម័គ្រចិត្តសមាគមជនជាតិខ្មែរនៅប្រទេសបារាំង នៅព្រឹកថ្ងៃទី៩ ខែសីហា ឆ្នាំ ២០២២នេះ បានចុះពិនិត្យព្យាបាលជំងឺជូនបងប្អូនប្រជាពលរដ្ឋមួយចំនួនដែលរស់នៅក្នុងឃុំពារាម ស្រុកបាទីខេត្តតាកែវ។

លោកវេជ្ជបណ្ឌិត ឡោ គឹមសុង គ្រូពេទ្យនៅប្រទេសបារាំងដែលដឹកនាំក្រុមគ្រូពេទ្យស្ម័គ្រចិត្ត​ចុះមក​ពិនិត្យព្យាបាលជំងឺជូនបងប្អូនប្រជាពលរដ្ឋ បានឱ្យដឹងថា ក្រុមគ្រូពេទ្យនៅក្នុងសមាគម​នៅប្រទេស​បារាំង​ដែលលោកបានដឹកនាំមកមានចំនួន ៨នាក់ជាគ្រូពេទ្យខ្មែរ​និងបារាំង​ដែលមានគ្រូពេទ្យ​ឯកទេស​ព្យាបាល​ជំងឺផ្សេងៗចំនួន៥នាក់និង គ្រូពេទ្យពិនិត្យជំងឺទូទៅចំនួន៣នាក់ព្រមទាំង​ក្រុម​គ្រូពេទ្យនៅស្រុកខ្មែរផ្នែកជំងឺវះកាត់ក៏​បាន​ចូលរួមជួយពិនិត្យព្យាបាលជំងឺជូនបងប្អូនប្រជាពលរដ្ឋ​ដោយឥតគតថ្លៃផងដែរ។

លោកវេជ្ជបណ្ឌិត ឡោ គឹមសុង បានបន្តថា ការព្យាបាលជំងឺជូនបងប្អូនប្រជាពលរដ្ឋនៅក្នុង​ឃុំពារាម​ និងឃុំក្បែរខាង គឺមានរយៈពេល ២ថ្ងៃចាប់ពីថ្ងៃទី៩និងថ្ងៃទី១០ ខែសីហានេះដោយក្នុង​មួយថ្ងៃៗ​ក្រុមគ្រូពេទ្យពិនិត្យព្យាបាលអ្នកជំងឺចំនួន៤០០ទៅ៥០០នាក់ ហើយក្រៅពីព្យាបាល​និង​បើកថ្នាំជូនបងប្អូនប្រជាពលរដ្ឋដោយឥតគិតថ្លៃ ក្រុមគ្រូពេទ្យមកពីសមាគម​ប្រទេសបារាំង​ក៏​នាំគ្នាទៅធ្វើការព្យាបាល និងពិនិត្យជូនបងប្អូនប្រជាពលរដ្ឋនៅតាមបណ្ដាខេត្តមួយចំនួនទៀត នៅ​ក្នុងប្រទេសកម្ពុជាយើងផងដែរ។

បើតាមលោកវេជ្ជបណ្ឌិត ឡោ គឹមសុង នៅក្នុងឱកាសពិនិត្យព្យាបាលជូនបងប្អូនប្រជាពលរដ្ឋ ក្រុមគ្រូពេទ្យក៏​បានណែនាំដល់បងប្អូនប្រជាពលរដ្ឋអោយ​គិតគូរ​សុខភាព​ គឺ​ជាកត្តាចំបង និង​ត្រូវតែនាំគ្នាថែរក្សាឲ្យបានល្អ ​ចៀសវាង​នូវជំងឺដង្កាត់ផ្សេងៗ ដោយអនុវត្តឲ្យបាន​ខ្ជាប់ខ្ជួន​នូវ​អនាម័យ ​រស់នៅស្អាត ហូបស្អាត និងត្រូវ​សំអាត​បរិស្ថាន​អោយស្អាតនោះជុំវិញលំនៅដ្ឋាន​ដែលយើង​រស់នៅផងដែរ។

អ្នកស្រី ឈឹត កាណា ប្រជាពលរដ្ឋរស់នៅក្នុងឃុំពារាម ស្រុកបាទី ខេត្តតាកែវដែលបានមក​ពិនិត្យ​ព្យាបាល​ជំងឺភ្នែក​បានសំដែង​នូវក្ដីស្បាយរីករាយដែលក្រុមគ្រូពេទ្យសមាគន៍​ប្រទេសបារាំង​ចុះមក​ពិនិត្យព្យាបាលជូនបងប្អូនប្រជាពលរដ្ឋដោយឥតគិតថ្លៃ ។

សូមបញ្ជាក់ថា ក្រៅពិនិត្យព្យាបាលជូនបងប្អូនប្រជាពលរដ្ឋ ក្រុមគ្រូពេទ្យស្ម័គ្រចិត្តរបស់​សមាគមខ្មែរ​នៅប្រទេសបារាំង(SCK) ក៏​បានចែកសម្ភារៈសិក្សាមួយចំនួនដល់ប្អូនៗក្មួយៗ​សិស្សានុសិស្ស​នៅសាលាបឋមសិក្សាក្នុងឃុំពារាម ស្រុកបាទីផងដែរ៕ អត្ថបទ គុជ វិភាគ