​លីបង់៖ នាវា​ដឹកទំនិញ​ដំបូង​ដែល​ចាក​ចេញពី​ប្រទេស​អ៊ុយ​ក្រែ​ន ក្រោម​កិច្ចព្រមព្រៀង​សម្រប​សម្រួល​ដោយ​អង្គការ​សហប្រជាជាតិ​ត្រូវ​បាន​ជាប់​គាំង បន្ទាប់ពី​អ្នកទិញ​ទំនិញ​របស់​ខ្លួន​បដិសេធ​មិន​ទទួលយក​។ ស្ថានទូត​អ៊ុយ​ក្រែ​ន​ប្រចាំ​ប្រទេស​លី​បង់បាន​សរសេរ​នៅ​លើ​បណ្តាញ Twitter កាលពី​ថ្ងៃ​ចន្ទ​ថា អ្នក​ទិញ​ចុងក្រោយ​នៅ​ក្នុង​ប្រទេស​លី​បង់បាន​បដិសេធ​មិន​ទទួលយក​ទំនិញ ដោយសារតែ​ការ​ពន្យារ​ពេល​នៃ​លក្ខខណ្ឌ​ដឹកជញ្ជូន​។​

ស្ថានទូត​បាន​និយាយថា​ អ្នក​ដឹកជញ្ជូន​ពេលនេះ​កំពុង​ស្វែងរក​អ្នក​ទទួល​ទំនិញ​ផ្សេងទៀត​នៅក្នុង​ប្រទេស​លី​បង់ ​ឬ​ប្រទេស​ផ្សេងទៀត​។ នាវា​ដឹកទំនិញ​បាន​ចាក​ចេញ​ពី​កំពង់ផែ​ទីក្រុង Odesa ភាគខាងត្បូង​ប្រទេស​អ៊ុយ​ក្រែ​ន​កាលពី​ថ្ងៃទី​1 ខែសីហាដោយ​ដឹក​ពោត​ចំនួន 12,000​តោន ដែល​នេះ​បានបង្ហាញ​ពី​ការបន្ត​ការនាំចេញ​គ្រាប់​ធញ្ញជាតិ​របស់​អ៊ុយ​ក្រែ​ន ​បន្ទាប់​ពី​រុស្ស៊ី​បាន​បិទ​ច្រក​សមុទ្រ​ខ្មៅ​។ ​ជាមួយគ្នានេះនាវា​ចំនួន​ 3​គ្រឿង​នៃ​ក្រុម​នាវា​ទី​ពីរ​ដែល​ចាក​ចេញពី​អ៊ុយ​ក្រែ​ន​នាំចេញ​គ្រាប់​ធញ្ញជាតិ ត្រូវបាន​ត្រួសត្រាយ​ផ្លូវ​ដោយ​មជ្ឈមណ្ឌល​សម្របសម្រួល​រួម (JCC) នៃ​គំនិត​ផ្តួចផ្តើម​គ្រាប់​ធញ្ញជាតិ​សមុទ្រ​ខ្មៅ​បាន​ចូល​មកដល់​ដែនទឹក​ប្រទេស​ទួរគី​កាលពី​ថ្ងៃ​សៅរ៍៕

អត្ថបទ៖ ប៊ុនថន