ភ្នំពេញ៖ មន្ត្រីជំនាញមន្ទីរទេសចរណ៍រាជធានីភ្នំពេញ នៅថ្ងៃនេះ បានចាប់ផ្តើមបើកការផ្សព្វផ្សាយ​ច្បាប់​ទេសចរណ៍ និងយន្តការផ្តល់អាជ្ញាបណ្ណ នៅតាមបណ្តាខ័ណ្ឌទាំង១២ ដោយការផ្សព្វផ្សាយ​ដំបូង​គឺបានចាប់ផ្តើមពីខ័ណ្ឌដង្កោ ​ហើយនៅក្រោយការផ្សព្វផ្សាយ​ ពោលចាប់ពីឆ្នាំ២០២៣ទៅ អាជ្ញាធរនឹងចុះស្រាវជ្រាវ ផាកពិន័យ ឬអាចបិទអាជីវកម្មវិញ ករណីអាជីវកម្មទេសចរណ៍​នោះបើក​ដំណើរការគ្មាន ឬមានអាជ្ញាបណ្ណហួសសុពលភាព ។

បើតាមលោក ម៉ម វាសនា ប្រធានមន្ទីរទេសចរណ៍រាជធានីភ្នំពេញ ថ្លែងប្រាប់BTVនៅថ្ងៃទី០៩ ខែ​សីហានេះថា ក្នុងឆ្នាំ២០២២នេះ គ្រប់អាជីវកម្មទេសចរណ៍ទាំងអស់ ត្រូវបានរាជរដ្ឋាភិបាល​បន្តផ្តល់​ការលើកទឹកចិត្ត ធ្វើអាជ្ញាបណ្ណបន្តបើកអាជីវកម្មដោយមិនគិតថ្លៃសេវានិងមិនយកពន្ធណានោះទេ ប៉ុន្តែនៅក្រោយមន្ត្រីជំនាញចុះផ្សព្វផ្សាយច្បាប់ទេសចរណ៍ និងយន្តការផ្តល់អាជ្ញាបណ្ណ​ជូនម្ចាស់​អាជីវកម្មទេសចរណ៍​នៅតាមបណ្តាខ័ណ្ឌចប់ទៅ មន្ត្រីជំនាញនឹងចុះត្រួតពិនិត្យតាមមូលដ្ឋាន​អាជីវកម្ម​ទេសចរណ៍ ហើយករណីអាជីវកម្មទេសចរណ៍ គ្មាន ឬមានអាជ្ញាបណ្ណហួសសុពលភាព អាជ្ញាធរនឹងធ្វើការផាកពិន័យទឹកប្រាក់ប្រមាណ ២លានរៀល ទៅ២០លានរៀល ទៅតាមចំនួន​ថ្ងៃហួសសុពលភាពនោះ។

លោក បន្តថា ទោះយ៉ាងណា នៅក្នុងអំឡុងពេលនេះ មន្ត្រីជំនាញបានរកឃើញអាជីវកម្ម​ទេស​ចរណ៍​មានអាជ្ញាបណ្ណហួសសុពលភាពជាង ១០ទីតាំង ហើយត្រូវបាន​អាជ្ញាធរបាន​ពិន័យជាប្រាក់រួចហើយ ​និងបានស្នើអាជីវកម្មនោះគោរពតាមនីតិវិធីស្តង់ដារអប្បបរមា SOP ដើម្បី​ទប់ស្កាត់ការរាតត្បាតមេរោគកូវីដនៅក្នុងមូលដ្ឋានអាជីកម្មផងដែរ។

បើតាមតំណាងភោជនីយដ្ឋាន សម្រស់ជើងឯក នៅខណ្ឌដង្កោ បានថ្លែងថា ជាទូទៅ​អាជីវកម្មភោជនីយដ្ឋានរបស់អ្នកស្រីនៅពេលអាជ្ញាបណ្ណជិតហួសថ្ងៃសុពលភាព គឺយើង​បាន​ទៅដាក់ស្នើសុំអាជ្ញាបណ្ណបន្តអាជីវកម្មនៅការិយាល័យច្រកចេញចូលតែមួយនៅក្នុងសាលា​ខណ្ឌដង្កោ ​ដោយមិនមានការលំបាកណានោះទេ។

សូមបញ្ជាក់ថា បើតាមច្បាប់ទេសចរណ៍មាត្រា៣២៖ គ្មានបុគ្គលណាម្នាក់អាចប្រកប​អាជីវកម្ម​ទេសចរណ៍បានទេ ប្រសិនបើបុគ្គលនោះមិនបានទទួលអាជ្ញាបណ្ណទេសចរណ៍ពីក្រសួងទេសចរណ៍ ឬពីរដ្ឋបាលថ្នាក់ក្រោមជាតិ។​ ក្នុងករណីអាជីវកម្មច្រើនប្រភេទ ត្រូវបានប្រតិបត្តិ​ដោយបុគ្គល​តែម្នាក់ចេញពីទីតាំងតែមួយប្រភេទ ​ អាជីវកម្មនីមួយៗ ត្រូវតែមានអាជ្ញាបណ្ណផ្សេងៗគ្នា ប្រៀប​ដូចជាអាជីវកម្មផ្សេងគ្នា ​ដែលប្រតិបត្តិចេញពីទីតាំងផ្សេងគ្នាយ៉ាងដូច្នោះដែរ។ ក្នុងករណីបុគ្គលម្នាក់មានអាជីកវម្មទេសចរណ៍មួយប្រភេទហើយមានសាខាច្រើនកន្លែង សាខានីមួយៗនោះត្រូវតែមានអាជ្ញាបណ្ណទេសចរណ៍៕ អត្ថបទ ស៊ុម សុខជា