ភ្នំពេញ​ ៖ ឯកឧត្តម កែវ ឈា ឯកអគ្គរាជទូតកម្ពុជា ប្រចាំសហរដ្ឋអាមេរិក តំណាងឲ្យរាជរដ្ឋាភិបាលកម្ពុជា និងលោក Damien Williams អគ្គរដ្ឋអជ្ញាសហរដ្ឋអាមេរិក នៃសង្កាត់ភាគខាងត្បូង ក្រុងញូវយ៉ក កាលពីថ្ងៃទី៨ ខែសីហា ឆ្នាំ២០២២ ចូលរួមក្នុងពិធីប្រគល់-ទទួល សម្បតិ្តវប្បធម៌ខ្មែរ ចំនួន៣០រូបនេះ នៅទីក្រុងញូវយ៉ក។ ក្រសួង កំពុងធ្វើការជាមួយក្រុមហ៊ុនដឹកជញ្ជូន ដើម្បីចាត់ចែងការដឹកវត្ថុទាំង៣០រូបមក កម្ពុជា ក្នុងពេលវេលាខាងមុខនេះ ហើយក្រសួង នឹងជូនព័ត៌មានបញ្ជាក់បន្ថែមនៅពេលវត្ថុទាំងនេះមកដល់កម្ពុជា។

​លោកជំទាវ បណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ បានថ្លែងថា ការបញ្ជូនមកវិញនេះ គឺអាចសម្រេចទៅបានដោយសារកិច្ចសហប្រតិបតិ្តការ និងការខិតខំប្រឹងប្រែងរួមគ្នារវាងរដ្ឋាភិបាលនៃប្រទេសទាំងពីរ (កម្ពុជា និងសហរដ្ឋអាមេរិក) និងក៏ដោយសារប្រទេសកម្ពុជា មានសុខសន្តិភាពពេញលេញ តាមរយៈនយោបាយឈ្នះ-ឈ្នះ ក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត នៃព្រះរាជាណាចក្រកម្ពុជា ដែលផ្តល់ឱកាសក្នុងការនាំមកវិញនូវព្រលឹងបុព្វបុរសខ្មែរ ដែលបានរសាត់ចាកឆ្ងាយពីមាតុភូមិកំណើតអស់ជាច្រើនឆ្នាំ នាសម័យសង្រ្គាម និងអសន្តិសុខ។ ក្នុងនាមរាជរដ្ឋាភិបាលកម្ពុជា លោកជំទាវ បណ្ឌិតសភាចារ្យ រដ្ឋមន្រី្ត បានថ្លែងអំណរគុណ និងកោតសរសើរចំពោះកិច្ចសហប្រតិបតិ្តការ និងការខិតខំប្រឹងប្រែងពីសំណាក់ស្ថាប័ន នានា របស់សហរដ្ឋអាមេរិក ជាពិសេសរដ្ឋអាជ្ញាសហរដ្ឋអាមេរិក នៃសង្កាត់ភាគខាងត្បូង ក្រុងញូវយ៉ក ការិយាល័យស៊ើបអង្កេតសន្តិសុខមាតុភូមិសហរដ្ឋអាមេរិក និងស្ថានទូតសហរដ្ឋអាមេរិកប្រចាំនៅកម្ពុជា។  ជាមួយនេះ លោកជំទាវ បណ្ឌិតសភាចារ្យ ភឿង សកុណា បានថ្លែងអំណរគុណដល់ក្រសួងពាក់ព័ន្ធ ស្ថានទូតកម្ពុជា នៅរដ្ឋធានីវ៉ាស៊ីនតោន ក្រុមការងារក្រសួងវប្បធម៌ និងវិចិត្រសិល្បៈ និងពិសេសដល់លោកមេធាវី Bradley Gordon និងលោកមេធាវី Steven Heimberg ដែលបានចំណាយពេលអស់ជាច្រើនឆ្នាំ ក្នុងការសហការជាមួយក្រុមការងារកម្ពុជា ដើម្បីស្រាវជ្រាវ និងស្វែងរកមកវិញនូវសម្បតិ្តវប្បធម៌ខ្មែរជាច្រើន មិនអាចកាត់ថ្លៃបាន។

លោកជំទាវ រដ្ឋមន្រី្ត ក៏បានថ្លែងអំណរគុណដល់សារមនី្ទរ និងអ្នកកាន់កាប់សមុច្ច័យឯកជននានា ដែលបានស្ម័គ្រចិត្តប្រគល់មរតកវប្បធម៌ជាតិ មកកម្ពុជាវិញ។ ជាមួយនឹងយុទ្ធនាការសកល លោកជំទាវ បណ្ឌិតសភាចារ្យ ភឿង សកុណា ក៏បានអំពាវនាវដល់សារមនី្ទរនានា ក៏ដូចជាអ្នកកាន់កាប់សមុច្ច័យឯកជន នៅទូទាំងពិភពលោក សូមចូលរួមសហការផ្តល់ឯកសារភស្តុតាង និងប្រគល់សម្បតិ្តវប្បធម៌ដែលជាអត្តសញ្ញាណជាតិ ត្រឡប់មកប្រទេសកំណើតវិញ។

សូមបញ្ជាក់ផងដែរថា វត្ថុទាំងនេះ ជាប់ពាក់ព័ន្ធនឹងករណីកាន់កាប់វត្ថុបុរាណដោយខុសច្បាប់ ដែលត្រូវបានរឹបអូសដោយរដ្ឋអាជ្ញាសហរដ្ឋអាមេរិក នៃសង្កាត់ភាគខាងត្បូងក្រុងញូវយ៉ក សហការជាមួយការិយាល័យស៊ើបអង្កេតសន្តិសុខមាតុភូមិសហរដ្ឋអាមេរិក អនុលោមតាមអនុស្សារណៈនៃការយោគយល់គ្នារវាងរាជរដ្ឋាភិបាលកម្ពុជា និងរដ្ឋាភិបាលសហរដ្ឋអាមេរិក ស្តីពីការដាក់កំរិតហាមប្រាមនូវការនាំចូលលើប្រភេទ នៃវត្ថុបុរាណរបស់កម្ពុជា។ ក្នុងចំណោមសម្បតិ្តវប្បធម៌ខ្មែរនេះ មានរូបបដិមាសំខាន់ៗ មួយចំនួនផ្នែកពុទ្ធសាសនា និងព្រហ្មញ្ញសាសនា ដូចជា៖ រូបចម្លាក់ដ៏វិចិត្រ «ព្រះស្កន្ទគង់លើក្ងោក»និង«ព្រះគណេស» ដែលត្រូវបានលួចយកចេញពីប្រាសាទក្នុងរមណីយដ្ឋានកោះកេរ អតីតរាជធានី នៃអាណាចក្រខ្មែរ នៅសតវត្សរ៍ទី១០ នៃគ.ស។ ប្រាសាទកោះកេរ ធ្លាប់ជាគោលដៅនៃការលួចទ្រង់ទ្រាយធំអស់ជាច្រើនឆ្នាំនៅក្នុងអំឡុងសម័យសង្គ្រាម៕​អត្ថបទ​៖ រដ្ឋា