ភ្នំពេញ៖ កម្ពុជា​ទទួល​បាន​ក្រុមហ៊ុន​ចម្រាញ់​មាស​មួយ​ទៀត ដោយ​បាន​កំពុង​ចាប់​ផ្តើម​អាជីវកម្មក្នុងជំហានដំបូង ទទួល​បាន​បរិមាណចំនួន ២០គីឡូក្រាម។ ក្រុមហ៊ុន ​គ្រោងផលិតប្រមាណ ៣៤០គីឡូក្រាម ក្នុងមួយឆ្នាំ។

ឯកឧត្តម អ៊ឹង ឌីប៉ូឡា អគ្គនាយក នៃអគ្គនាយកដ្ឋានធនធានរ៉ែ ក្រសួងរ៉ែ និងថាមពល លើក​ឡើង​នៅ​ក្នុង​សន្និសីទសារព័ត៌មាន ស្តីពី​សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងរ៉ែ និងថាមពល នៅទីស្តីការគណៈរដ្ឋមន្រ្តី នៅថ្ងៃទី០៩ ខែសីហា ឆ្នាំ២០២២ នេះថា ទាក់ទងអាជីវកម្មរ៉ែមាសនេះ កម្ពុជា​មាន​ក្រុម​ហ៊ុន​ចំនួន៧ បានទទួលអាជ្ញារប័ណ្ណអាជីវកម្មក្នុងការផលិតរ៉ែមាស ក្នុងនោះ មានក្រុមហ៊ុន រឺនីសង់ (Renaissance)មួយទេ ដែលបានផលិតជាផ្លូវការ បើគិតដល់ដើមខែកក្កដា ឆ្នាំ ២០២២ នេះ ផលិតមាសបាន ២៣២ដុំ ត្រូវប្រមាណ ៣ ៥៤៣ គីឡូក្រាម និងបានបង់ចំណូលសូយសារចូលរដ្ឋបានចំនួនជាង ៥, ១លានដុល្លារអាមេរិក។

ទាក់ទងអាជីវកម្មរ៉ែមាសនេះដែរ, ឯកឧត្តម បន្តឲ្យដឹងថា បច្ចុប្បន្នកម្ពុជាមានក្រុមហ៊ុនថ្មីមួយទៀត គឺក្រុមហ៊ុន ដែលខម (Delcom) គឺជាក្រុមហ៊ុនខ្នាតមធ្យម បានចាប់ផ្តើមផលិតមាសជាលើកដំបូង។ បើគិតត្រឹមថ្ងៃទី ៤ ខែ សីហា ឆ្នាំ ២០២២ នេះ ផលិតមាសបានចំនួន ២០គីឡូក្រាមរួចហើយ នៅក្នុងគម្រោងផែនការផលិតចំនួន ៣៤០ គីឡូក្រាមក្នុងមួយឆ្នាំ ក្នុងនោះបើគិតជាសូយសារចូលថវិការរដ្ឋជិត ៦០ម៉ឺនដុល្លារអាមេរិក ក្នុងមួយឆ្នាំ។

សូមបញ្ជាក់៖ នៅក្នុងក្រុមហ៊ុនចំនួន៧ បានទទួលអាជ្ញារប័ណ្ណអាជីវកម្មក្នុងការផលិតរ៉ែមាស ដោយផ្តល់ជូន​អាជ្ញា​ប័ណ្ណ​ដោយ​ក្រសួងរ៉ែ និងថាមពល មកដល់ពេលនេះមានក្រុមហ៊ុនចំនួន២ បានចាប់ផ្តើមធ្វើអាជីវកម្មហើយ ក្នុងនោះ ក្រុមហ៊ុន រឺនីសង់ Renaissance Minerals (Cambodia) Ltd គឺជាក្រុមហ៊ុនរបស់អូស្ត្រាលី ដែលទទួលបាន​អាជ្ញា​បណ្ណ​រុក​រក​រ៉ែ​មាសពីក្រសួងរ៉ែ និងថាមពល ស្ថិតនៅក្នុងតំបន់អូរខ្វាវ ក្នុងស្រុកកែវសីមា ខេត្តមណ្ឌលគីរី បានចាប់ផ្ដើមបើក​សម្ពោធ​ដាក់​ឲ្យ​ដំណើរការជាផ្លូវការ លើប្រតិបត្តិការអាជីវកម្ម និងរោងចក្រចម្រាញ់រ៉ែមាស កាលពីថ្ងៃទី ២១ ខែ មិថុនា ឆ្នាំ២០២១, ចំណែក​ក្រុមហ៊ុន ដែលខម (Delcom) គឺជាក្រុមហ៊ុនផលិតរ៉ែមាសទី២ របស់កម្ពុជាហើយ ដោយបានចាប់​ផ្តើមដំណើរ​ការ​អាជីវកម្មថ្មីៗនេះ៕ អត្ថបទ៖ សុន រ៉ាឌី​