អន្ដរជាតិ៖ រដ្ឋមន្រ្តីការបរទេសកោះតៃវ៉ាន់ លោក Joseph Wuបាននិយាយនៅថ្ងៃអង្គារនេះថា ចិនមានគោលបំណងចង់​គ្រប់​គ្រង​​សមុទ្រចិនខាងកើត និងសមុទ្រចិនខាងត្បូង តាមច្រកសមុទ្រតៃវ៉ាន់​ដោយរូបលោក ចាត់ទុកមហិច្ឆតាដ៏ធំធេងនេះ នឹង​ធ្វើឲ្យប្រែក្រឡាស់ស្ថានការណ៍ជាក់ស្តែងនៅតំបន់អាស៊ី-ប៉ាស៊ីហ្វិក និងរារាំងប្រទេសនានាពីការជួយ​ដល់កោះស្វ័យគ្រប់គ្រង​មួយ​នេះ។

លោកWuបានថ្លែងបែបនេះទៅកាន់សន្និសីទសារព័ត៌មាន​នៅទីក្រុងតៃប៉ិ ស្របពេលដែលកោះតៃវ៉ាន់ ចាប់ផ្តើម​សម​យុទ្ធ​​យោធាបាញ់គ្រាប់ពិត ដើម្បីធ្វើតេស្តការត្រៀមខ្លួនធ្វើសង្រ្គាម​របស់ពួកគេ ជាការឆ្លើយតប​នឹងសមយុទ្ធយោធា​កំពុង​ធ្វើ​ឡើង​​របស់​ចិន ដែលមានទាំងការបាញ់មីស៊ីលឆ្ពោះទៅកាន់ដែនសមុទ្រជិតកោះមានពលរដ្ឋ ២៣លាននាក់មួយនេះ៕