ភ្នំពេញ៖ ក្រសួងរ៉ែ និងថាមពល បានបង្កើតមូលនិធិមួយ ដើម្បីប្រមូលថវិកា ពី​អ្នក​ធ្វើ​អាជីវកម្ម​រ៉ែ​ផ្សេង​ៗ ទុកសម្រាប់អភិវឌ្ឍមូលដ្ឋាន និងបានជំរុញទៅអាជ្ញាធរឃុំសង្កាត់ ដែល​មាន​សកម្មភាព​ធ្វើ​អាជីវកម្ម​រ៉ែ សូមដាក់សំណើពីក្រសួង ដើម្បីយកថវិកាដែលប្រមូលបាននោះ ទៅប្រើប្រាស់​អភិវឌ្ឍន៍​មូលដ្ឋាន​របស់​ខ្លួន ។

នៅក្នុងសន្និសីទសារព័ត៌មានស្តីពី វឌ្ឍនភាពរយៈពេល ៥ឆ្នាំ របស់ក្រសួងរ៉ែ និងថាមពល រៀបចំដោយអង្គភាពអ្នកនាំពាក្យរាជរដ្ឋាភិបាល កាលពីថ្ងៃទី៩ ខែសីហា ឆ្នាំ២០២២ ឯកឧត្តម អ៊ឹង ឌីប៉ូឡា អគ្គនាយក នៃអគ្គនាយកដ្ឋានរ៉ែ នៃក្រសួងរ៉ែ និងថាមពល លើកឡើកថា រាល់ក្រុមហ៊ុន ឬមានអ្នកស្នើធ្វើអាជីវកម្មរ៉ែ នៅទីតាំងណាមួយនោះ គឺមានកាតព្វកិច្ចបង់ថវិកា​ទៅ​លើ​តោន ទៅលើម៉ែត្រគីប នៃផលិតផលដែលបានទាញយកមកប្រើប្រាស់នោះ បង់ចូល​ក្នុងមូលនិធិរ៉ែ ។

ឯកឧត្តមបានបន្តថា មូលនិធិនេះ បានបង្កើតឡើងកាលពីឆ្នាំ២០១៥ ដែលផ្ដួច​ផ្ដើម​ដោយ​ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល ហើយ​រហូតមកដល់​ពេល​នេះ​ប្រមូល​បាន​ជាង ៨លានដុល្លារ និងបានប្រើប្រាស់អស់ជាង ១លានដុល្លារ ។

ក្នុងរបាយការណ៍រយៈពេល៥ឆ្នាំ គឺចាប់តាំងពីឆ្នាំ២០១៨ ដល់ឆមាសទី១ ឆ្នាំ២០២២ របស់ក្រសួងរ៉ែ និងថាមពល បានឲ្យដឹងថា ការធ្វើអាជីវកម្មរ៉ែនៅកម្ពុជាមានចំនួន១៧ ក្នុងនោះ​មានរ៉ែធ្យូងថ្ម ខ្សាច់ស ស៊ីម៉ងត៍ មាស ថ្មបំបែក អាចម៍ដី ដីក្រហម ខ្សាច់បក ថ្មអារ ថ្មភក់ ថ្មកែវ ខ្សាច់សំណង់ ដីល្បាយខ្សាច់ ក្រួស ខ្សាច់នាំចេញ ថ្មអារប្លុកនាំចេញ និងថ្មអារសន្លឹកនាំចេញ ។

សម្រាប់ថវិកាមូលនិធិរ៉ែ ដែលត្រូវបានចំណាយអស់ជាង ១លានដុល្លារនោះ គឺបានអនុវត្តទៅ​លើ​គម្រោង​ចំនួន ៣៩គ្រោង ហើយបន្តផ្សព្វផ្សាយ ដើម្បីជំរុញឲ្យអាជ្ញាធរមូលដ្ឋាន លើកជា​សំណើ​គម្រោង​ថ្មីៗ បន្ថែមទៀត ៕ អត្ថបទ៖ បាន សុខរិទ្ធិ