ភ្នំពេញ៖ ភាគីតំណាងឲ្យកម្មករនិយោជិត បានឲ្យដឹងថា ក្នុងកិច្ចចចារប្រាក់ឈ្នួលអប្បបរមា​សម្រាប់​ឆ្នាំ​២០២៣ខាងមុខ សហជីព ​គ្រោងនឹងស្នើសុំបន្ថែម​ ២០ដុល្លារ ​លើប្រាក់ខែគោល ដោយ​ក្រុមសហជីពបានជួបប្រជុំគ្នាដើម្បីពិនិត្យ និងពិភាក្សាអំពីជីវភាពរស់នៅរបស់កម្មករនិយោជិត។

លោក អាត់ ធន់ ប្រធាន​សហភាពការងារកម្ពុជា ​នៅព្រឹកថ្ងៃទី១០ សីហា ឆ្នាំ២០២២នេះ បាន​ឲ្យ​ទូរទស្សន៍ព័ត៌មាន ​ប៊ីធីវីដឹងថា សហជីពបានប្រជុំ កាលពីថ្ងៃទី៤ សីហាកន្លងទៅ ដោយបាន​កំណត់​តួលេខក្រៅផ្លូវការមួយហើយ។ ប៉ុន្តែសហជីបត្រូវការផ្ទៀងផ្ទាត់ព័ត៌មាន ឬ​ទិន្នន័យពីក្រុមប្រឹក្សា​ជាតិ​ប្រាក់ឈ្នួលទៀត និងក្រសួងសេដ្ឋកិច្ច និងហិរញ្ញវត្ថុទៀត ដើម្បីអាច​បញ្ចេញ​តួលេខ​ចុងក្រោយបាន។

លោក បានបន្ថែមថា បច្ចុបន្នប្រាក់ឈ្នួលអប្បបរមារបស់កម្មករក្នុងវិស័យកាត់ដេរចំនួន ១៩៤ដុល្លារ ប៉ុន្ដែប្រាក់ឈ្នួលទាំងនេះ​ មិនទាន់បានបំពេញតម្រូវការរស់នៅឱ្យបានល្អប្រសើរនៅឡើយទេ បើផ្អែក​ទៅលើការចំណាយប្រចាំថ្ងៃរបស់កម្មករនិយោជិត​ ដោយជាមធ្យមរហូតដល់ទៅ ២៩៧ដុល្លារ​ ក្នុងមួយខែ។

សូមជម្រាបជូនថា នៅព្រឹកថ្ងៃទី១៥ ខែសីហាខាងមុខនេះ ក្រសួងការងារ និងបណ្តុះបណ្តាល​វិជ្ជាជីវៈ ​នឹងបើកកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា ​អាណត្តិទី២ លើកទី២ ស្តីពីការ​កំណត់ប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភណ្ឌ ​កាត់ដេរ ​ផលិតស្បែកជើង និងផលិតផលិតផលធ្វើដំណើរ ​និងកាបូប សម្រាប់ឆ្នាំ២០២៣៕អត្ថបទ៖ បូរ៉ាវី