ភ្នំពេញ៖ បច្ចុប្បន្នស្ថានទឹកជំនន់នៅក្នុងប្រទេសកម្ពុជាមិនទាន់បង្ករផលបះពាល់​ធ្ងន់ធ្ងរ​ដល់​ប្រជាពលរដ្ឋនោះទេ ខណៈគណៈកម្មធិការជាតិគ្រប់គ្រងគ្រោះមហន្តរាយ បានត្រៀមខ្លួន​ជានិច្ចជួយប្រជាពលរដ្ឋនៅពេលមានបញ្ហា។

មានប្រសាសន៍ប្រាប់BTV នៅថ្ងៃទី១០ ខែសីហានេះ ឯកឧត្តម សុទ្ធ គឹមកុលមុនី អ្នកនាំពាក្យ​គណៈកម្មាធិការជាតិគ្រប់គ្រងគ្រោះមហន្តរាយ បានលើកឡើងថា បច្ចុប្បន្នស្ថានភាពទឹកជំនន់​នៅ​ក្នុងប្រទេសកម្ពុជា​ មានខេត្តមួយចំនួនរងផលបះពាល់ពីជំនន់ទឹកភ្ញៀង ​តែមិនបង្ករផលប៉ះពាល់​ធ្ងន់ធ្ងរ​នោះទេ ខណៈគណៈកម្មាធិការជាតិគ្រប់គ្រងគ្រោះមហន្តរាយ បានត្រៀមខ្លួន​ជានិច្ច​ជួយ​ប្រជាពលរដ្ឋនៅពេលមានបញ្ហាកើតឡើង។​ក្រៅពីនេះ លោកបានអំពាវនាវ​ដល់ប្រជាពលរដ្ឋត្រូវ​បង្កើនការប្រុងប្រយ័ត្នឲ្យបានខ្ពស់ផងដែរ។

សម្រាប់ផែនការបម្រុងទុក របស់គណៈកម្មាធិការជាតិគ្រប់គ្រងគ្រោះមហន្តរាយ ដើម្បីឆ្លើយតប​នឹង​គ្រោះមហន្តរាយ​ ពិសេស​បញ្ហា​ទឹកជំនន់ ​នៅរដូវវស្សាឆ្នាំ២០២២នេះ​ គឺបានត្រៀម​នូវ​កម្លាំង​អន្តរាគមន៍​ចំនួន ១៦កង ទូទាំងប្រទេស​ ស្មើនឹងជិត ២០០០នាក់ រួមទាំង​មាន​បំពាក់​នូវ​សម្ភារៈ​សង្គ្រោះ​បន្ទាន់ ​យានជំនិះ ​និងស្បៀងបម្រុងជាច្រើនទៀត ៕ អត្ថបទ៖ទូច សោភ័ណ