ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ បាន​ជំរុញ​ឲ្យ​ក្រុម​ការងារអន្តរក្រសួង ត្រូវបន្តប្រឹងធ្វើការសម្អាតឲ្យអស់នូវគ្រាប់យុទ្ធភណ្ឌមិនទាន់ផ្ទុះ ក្នុងនាវាដែលបាន​លិច​ក្នុង​ទន្លេ កាលពីសម័យសង្រ្គាមនោះ ដើម្បីផ្តល់សុវត្ថិភាពដល់ការដឹកជញ្ជូនតាមផ្លូវទឹក។

សម្ដេច​ក្រឡាហោម ស ខេង នៅក្នុងកិច្ចប្រជុំពិនិត្យអំពីវឌ្ឍនភាព​កិច្ចប្រតិបត្តិការ​បោស​សម្អាត​គ្រាប់​យុទ្ធ​ភណ្ឌ​មិនទាន់ផ្ទុះក្រោមទឹក និងស្រង់នាវាលិចក្នុងទន្លេ នៅថ្ងៃទី១០ ខែសីហា នេះ បានបញ្ជាក់ ថា ការងារ​បោស​សម្អាតគ្រាប់យុទ្ធភណ្ឌមិនទាន់ផ្ទុះក្រោមទឹក និងស្រង់នាវាលិចក្នុងទន្លេនេះ មានសារសំ ខាន់​ណាស់ ព្រោះជាគោលការណ៍របស់រាជរដ្ឋាភិបាលកម្ពុជា ត្រូវតែបោសសម្អាត​គ្រាប់យុទ្ធភណ្ឌ​មិនទាន់​ផ្ទុះ​ទាំង​នេះ ដើម្បីឲ្យមានសុវត្ថិភាពដល់ប្រជាពលរដ្ឋ និងការដឹកជញ្ជូនតាមផ្លូវទឹក។

សម្តេចក្រឡាហោម បានបន្តទៀតថា «ក្រុមការងារអន្ដរក្រសួង ដើម្បីចុះសិក្សា និង​ដោះស្រាយ​ករណី​រក​ឃើញ​គ្រាប់យុទ្ធភណ្ឌមិនទាន់ផ្ទុះក្នុងនាវាដែលលិចក្នុងទន្លេ ត្រូវមានការតាំងចិត្តខ្ពស់អំពីការងារទាំងនេះ ដោយ​មិនទុកគ្រាប់យុទ្ធភណ្ឌមិនទាន់ផ្ទុះទាំងនោះ ក្នុងបាតទន្លេទៀតឡើយ»។

ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកអគ្គនាយក CMAC បានធ្វើបទបង្ហាញថា ផែន​ការ​ប្រតិបត្តិការបោសសម្អាតយុទ្ធភណ្ឌមិនទាន់ផ្ទុះ និងស្រង់នាវា នៅភូមិកោះពាមរាំង ឃុំកោះចេក ស្រុក​ពាមជរ ខេត្តព្រៃវែង មានទំហំចំនួន ២៦៨ហិកតា ក្នុងនោះតំបន់ហានិភ័យខ្ពស់ មានចំនួន១៩៧ហិចតា និងតំបន់​ដែលហានិភ័យមធ្យម ចំនួន៧១ហិកតា។

ឯកឧត្តមបានបញ្ជាក់ថា ការបោសសម្អាតសំណល់យុទ្ធភណ្ឌមិនទាន់ផ្ទុះ ជាភារកិច្ចយ៉ាងសំខាន់​របស់​រាជរដ្ឋាភិបាល​កម្ពុជា ក្នុងការឆ្លើយតបជាកាតព្វកិច្ចជាតិ និងអន្ដរជាតិ។ ការបោសម្អាតគ្រាប់ទាំងនេះ មានប្រយោជន៍យ៉ាងសំខាន់ ក្នុងការពង្រឹងកិច្ចការសន្ដិសុខជាតិ និងផ្ដល់សុខសុវត្ថិភាពជូនប្រជាពលរដ្ឋ ព្រមទាំងដំណើរការស្ដារការអភិវឌ្ឍសេដ្ឋកិច្ចជាតិឡើងវិញផងដែរ៕ អត្ថបទ៖ បាន ចក់