​ផ្នំពេញ៖ តម្លៃនៃសេវាដឹកជញ្ជូននៅកម្ពុជា ចាប់ផ្តើមចុះថ្លៃជាបណ្តើៗមកវិញហើយ បន្ទាប់តម្លៃប្រេងនៅលើទីផ្សារ​អន្តរជាតិ និងក្នុងស្រុក បានធ្លាក់ចុះ។

​​លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជា ថ្លែងប្រាប់ភ្នាក់ងារអ្នកយកព័ត៌មាន BTV ស្តីពី​ស្ថានភាព​នៃ​ការ​ដឹកជញ្ជូន និងតម្លៃសេវានៃការដឹកជញ្ជូន ថ្ងៃទី ១០ ខែ សីហា ឆ្នាំ ២០២២ នេះថា នៅពេល​តម្លៃប្រេង​លើទី​ផ្សារ​អន្តរជាតិ​បានហក់ឡើង សេវាដឹកជញ្ជូននៅព្រះរាជាណាចក្រកម្ពុជា មិនមានការឡើងថ្លៃភ្លាមៗនោះឡើយ លុះដល់ដំណាក់​ចុង​ក្រោយ​ដោយសារការហក់ឡើងថ្លៃប្រេងឥន្ធនៈកាន់តែខ្ពស់ ទើបមានការឡើងថ្លៃបន្តិចបន្ទួច តែ​ស្ថិត​មក​ដល់​ស្ថាន​ភាព​បច្ចុប្បន្នសេវាដឹកជញ្ជូននឹងមានការប្រែប្រួលមកវិញ។

លោកឧកញ៉ា បញ្ជាក់ថា៖ ជុំវិញបញ្ហាប្រេងសាំង រាជរដ្ឋាភិបាលបានយកចិត្តទុកដាក់យ៉ាងខ្លាំង ជាពិសេសនៅក្នុង​ស្ថាន​ភាព ប្រទេសមួយចំនួនជួបប្រទះបញ្ហាប្រេងសាំង, សម្រាប់កម្ពុជា ទោះបីតម្លៃសាំងហក់ឡើងថ្លៃបន្តិចមែន តែកម្ពុជាមាន​សន្និធិ​សាំងគ្រប់គ្រាន់ ដែលអាចធ្វើឲ្យសេវាដឹកជញ្ជូនប្រព្រិត្តទៅដោយរលូន ទោះជាតម្លៃសេវាបានកើន​ឡើងបន្តិច​បន្ទួច​ក៏ដោយ។

​​ជុំវិញបញ្ហាប្រេងសាំងនេះ លោកឧកញ៉ា លឹម ហេង អនុប្រធានសភាពពាណិជ្ជកម្មកម្ពុជា លើកឡើងថា ការឡើងថ្លៃ​ប្រេង​សាំង​កន្លងមកនេះ គឺដោយសារសង្រ្គាមរុស្សី និងអ៊ុយក្រែន, មកដល់ឥឡូវនេះ តម្លៃប្រេង អាចប៉ាន់ស្មានបានជាបណ្តើរៗ ដោយមានលំនឹងល្អប្រសើរហើយ ដែលជាចំណែកមួយដ៏សំខាន់ក្នុងការកាត់បន្ថយថ្លៃដើមនៃសេវាដឹកជញ្ជូន។

សូម​បញ្ជាក់ថា៖ តាមសេចក្តីជូនដំណឹងស្តីពីថ្លៃលក់រាយប្រេងឥន្ធនៈនៅតាមស្ថានីយ ដែលបានកំណត់ចាប់ពីថ្ងៃទី១ ដល់​ទី១០ ខែសីហា ឆ្នាំ២០២២ នេះ ក្នុងតម្លៃប្រេងសាំងធម្មតា មានតម្លៃ ៤ ៧៥០ រៀល និងប្រេងម៉ាស៊ូត មានតម្លៃ ៥ ១៥​០ រៀល នៅក្នុងមួយលីតផងដែរ៕អត្ថបទ៖ សុន រ៉ាឌី