អន្ដរជាតិ៖ ប្រតិបត្តិការបោសសំអាត និងកិច្ចខិតខំប្រឹងប្រែងស្តារឡើងវិញ បានចាត់ផ្តើម​នៅរដ្ឋធានីសេអ៊ូល ប្រទេសកូរ៉េខាង​ត្បូង​ នាថ្ងៃពុធនេះ ស្របពេលដែលផ្ទៃមេឃចាប់ផ្តើមស្រឡះ ក្រោយមានភ្លៀងធ្លាក់ខ្លាំងបំផុត​​រយៈ​ពេល ២ថ្ងៃជាប់ៗគ្នា បង្ក​ឲ្យ​មានទឹកជំនន់ ធ្វើឲ្យខូចខាតអគាររាប់ពាន់ខ្នង ផ្លូវថ្នល់រាប់រយខ្សែ និងបានសម្លាប់មនុស្សយ៉ាងហោច ០៩នាក់។

ស្របពេលមានការដកចេញការព្រមានពីភ្លៀងធ្លាក់ខ្លាំង នៅទីក្រុងសេអ៊ូល និងតំបន់ជុំវិញទីក្រុងមួយនេះ​ ទីភ្នាក់ងារ​ឧតុ​និយម​កូរ៉េខាងត្បូង បានព្យាករណ៍ថា ទឹកភ្លៀងកម្ពស់ពី ១០ ទៅ ៣០សង់ទីម៉ែត្រ នឹងកើតមាននៅតំបន់ភាគខាងត្បូងកូរ៉េ​ខាង​ត្បូង រហូតដល់​ថ្ងៃព្រហស្បតិ៍៕