ភ្នំពេញ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដែលមានរដ្ឋាករទឹក​ជា​សេនាធិការបាននឹងកំពុងខិតខំតទឹកស្អាត ឲ្យមានគុណភាពល្អ ទៅកាន់ទីខាងចុងបណ្ដាញ ឬនៅតំបន់អភិវឌ្ឍន៍ជាយក្រុង ដែលតែងតែខ្វះខាតទឹកប្រើប្រាស់ ។

ក្នុងសន្និសីទសារព័ត៌មាន ស្ដីពីសមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួង ឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ រៀបចំដោយអង្គភាពអ្នកនាំពាក្យរាជរដ្ឋាភិបាល នៅថ្ងៃទី១១ ខែសីហានេះ ឯកឧត្តម ហេង សុខគង់ រដ្ឋលេខាធិការក្រសួងនេះ បានឱ្យដឹងថា ប្រជា​ពលរដ្ឋរស់ នៅខាងចុងបណ្ដាញ​ តែងមានការរអ៊ូរទាំ ព្រោះពេលបើកទឹកប្រើប្រាស់​មានកម្លាំង​ខ្សោយ ដែលបញ្ហានេះ ជំនាញកំពុងផលិតទឹកឲ្យបានកាន់តែច្រើន ឲ្យកាន់តែល្អប្រសើរ ដើម្បីរុញទឹកស្អាត​ទៅតំបន់ខាងចុង បណ្ដាញ ឬនៅទីតាំងអគារខ្ពស់ៗ ។

ឯកឧត្តម បានឱ្យដឹងថា ចាប់ពីឆ្នាំ២០១៧ ដល់ឆ្នាំ២០២២ អង្គភាពរដ្ឋាករទឹក ទាំងរដ្ឋ និងឯកជន ផលិតទឹកស្អាតបានជាង ១៦៣២ពាន់លានម៉ែត្រគីប កើនដល់ជាង ៤៥ភាគរយ បើធៀបទៅ​នឹងអាណត្តិមុន ផលិតបានត្រឹម១ពាន់លាន ១សែនម៉ែត្រគីបប៉ុណ្ណោះ ។

ទន្ទឹមនោះដែរអត្រា ការគ្រប់ដណ្ដប់ នៃការ ផ្គត់ផ្គង់ទឹកស្អាត និងប្រព័ន្ធបណ្ដាញនៅក្នុង​តំបន់ទីប្រជុំជន ទូទាំងប្រទេស ​មានការកើនឡើងដល់ជាង ៦៥ភាគរយ ស្មើនឹងជិត ២លានគ្រួសារ ។

ឯកឧត្តម ហេង សុខគង់ បានបន្ថែមថា ចំពោះបញ្ហាកម្ពុជារងគ្រោះដោយទឹកជំនន់ គឺនៅតាម បណ្ដា​ទីទួលសុវត្ថិភាពទូទាំងប្រទេស ​គឺក្រសួងបានរៀបចំឲ្យមានស៊ីទែនដាក់ទឹកស្អាត ​ចែកជូនពលរដ្ឋ ឲ្យបាន​ប្រើប្រាស់ និងបានជំរុញទៅអង្គភាពក្រោមឱវាទ នៅក្នុងដំណាក់កាលនៃការរាតត្បាត​ជំងឺ​កូវីដ-១៩ នេះ ត្រូវរុញប្រព័ន្ធទឹកស្អាតទៅតាមមណ្ឌលចត្តាឡីស័ក​ និងទីកន្លែងព្យាបាលអ្នកជំងឺ ដោយឥតគិតថ្លៃ ។

ការតបណ្ដាញទឹកស្អាតនេះ បានស្ថិតក្នុងទិសដៅរបស់រាជរដ្ឋាភិបាល ​នៅឆ្នាំ២០២៥ តំបន់ទីប្រជុំ ជន ​មានទឹកស្អាតប្រើប្រាស់ ៩០ភាគរយ និងនៅឆ្នាំ២០៣០ ​មានទឹកស្អាតប្រើប្រាស់ ១០០ភាគរយ ដោយទឹកមានគុណភាពល្អ និងមានតម្លៃសមរម្យ ​ហើយកាលពីពេលកន្លងទៅ ​សម្ដេចតេជោ ហ៊ុន សែន នាយក រដ្ឋមន្ត្រី នៃកម្ពុជា ​បានបង្កើតពាក្យស្លោកមួយ “ទឹកស្អាត​ សម្រាប់ទាំងអស់គ្នា (Water for All) ៕ អត្ថបទ៖ បាន សុខរិទ្ធិ