ភ្នំពេញ៖ អនុវត្តតាមសេចក្តីជូនដំណឹងរបស់គណៈកម្មាធិការជាតិសុវត្ថិភាពចរាចរណ៍ផ្លូវគោកនេះ នគរបាលចរាចរណ៍ក្រសួងមហាផ្ទៃ នឹងចាប់ផ្តើមសាកល្បងអនុវត្តកម្មវិធីដកពិន្ទុបណ្ណបើកបរ និងការបង់ប្រាក់ពិន័យអន្តរការណ៍ចំពោះអំពើល្មើសច្បាប់ស្ដីពីចរាចរណ៍ផ្លូវគោកទូទាំងប្រទេស ចាប់ពីថ្ងៃទី០១ ខែកញ្ញា ឆ្នាំ២០២២ តទៅ ហើយនឹងដំណើរការអនុវត្តពេញលេញចាប់ពីថ្ងៃទី០១ ខែមករា ឆ្នាំ២០២៣។

ពាក់ព័ន្ធការអនុវត្តច្បាប់ចរាចរណ៍ផ្លូវ ផាកពិន័យដកពន្ទុបណ្ណបើកបរតាមមាត្រា៤៣ និងមាត្រា៤៤ និងអនុលោមតាមប្រកាសអន្តរក្រសួងលេខ១៧៦ ប្រក.សក.ដជក ចុះថ្ងៃទី១៤ ខែកញ្ញា ឆ្នាំ២០២១ ស្តីពីនីតិវិធីនៃការដក និងបំពេញពិន្ទុឡើងវិញសម្រាប់បណ្ណបើកបរ បណ្តាអ្នកបើកបរយានយន្ត​នានា​ថ្លែងប្រាប់BTV នៅថ្ងៃទី១១ ខែសីហានេះថា យើងមានគាំទ្រ និងសូមឲ្យនគរបាលចរាចរណ៍​អនុវត្តឲ្យបានស្មើៗគ្នា​ ជាពិសេសគឺត្រូវបានកំណត់ពិន្ទុសម្រាប់ដកឲ្យបានច្បាស់លាស់ ចៀសវាង​ការអនុវត្តលើសគោលការណ៍ថ្នាក់ដឹកនាំ​ប្រកាសដាក់ឲ្យអនុវត្ត។

បើតាមលោកស្រី ម៉ែន ចាន់សុកុល ប្រធាននាយកដ្ឋានដឹកជញ្ជូនផ្លូវគោគ ​នៃក្រសួងសាធារណៈការ និង​ដឹកជញ្ជូន បានថ្លែងថា ​នៅក្នុងដំណើរការអនុវត្ត​សាកល្បង​ផាក​ពិន័យ​ដក​ពិន្ទុ​បណ្ណបើកបរនេះ ក្រសួងសាធារណៈការ នឹងផ្តល់ឧបករណ៍ SCAN​ ដកពិន្ទុបណ្ណបើកបរនេះប្រមាណជាង ៥០០គ្រឿង ដើម្បីអនុវត្ត​ SCAN ​ដកពិន្ទុ​លើអ្នកបើកបរប្រព្រឹតល្មើសច្បាប់ចរាចរណ៍។

លោកស្រី បញ្ជាក់ថា នៅក្នុងម៉ាស៊ីនSCANលើQR Codលើ​បណ្ណបើកបរនេះ ​គឺមានកំណត់ពិន្ទុ​សម្រាប់​ដកពី៦ ទៅ១២ពិន្ទុ ហើយការដក​គឺ​ធ្វើឡើងទៅតាមទោសកំហុស​ដែលអ្នកបើកបរ​បាន​ប្រព្រឹត្តិ ​នៅក្នុងនោះសម្រាប់អ្នកបើកបរមិនពាក់​ខ្សែក្រវ៉ាត់សុវត្ថិភាព ត្រូវបាន​ម៉ាស៊ីន​SCANកំណត់​ដកមួយពិន្ទុ។

ឧត្តមសេនីយ៍ត្រី ថី វិសាល អនុប្រធាននាយកដ្ឋាននគរបាល​ចរាចរណ៍ផ្លូវគោក​ បានថ្លែងថា ជា​ទូទៅ​គ្រប់បណ្ណបើកបរ នៅពេលម៉ាស៊ីនSCAN បានដកពិន្ទុពេញពី ៦ ទៅ១២ពិន្ទុហើយនោះ នគរបាល​នឹងផាកពិន័យអន្តរការណ៍ដកបណ្ណបើកបរពីអ្នកបើកបរ ហើយតម្រូវឲ្យអ្នក​បើកបរ​ទៅប្រឡង​យកបណ្ណបើកបរឡើងវិញ ​ហើយក្នុងករណីអ្នកបើកបររឹងរុស​បើកបរ​ដោយ​គ្មាន​បណ្ណ​បើកបរ ឬបណ្ណបើកបរត្រូវ​បាន​ដកពិន្ទុអស់ហើយនោះ នគរបាលនឹងធ្វើការផាក​ពិន័យជា​ប្រាក់​ប្រមាណ ១លាន២សែនរៀលសម្រាប់រថយន្តធុនតូច ហើយសម្រាប់រថយន្តធុនធំ​នឹងពិន័យជាប្រាក់ ២លាន៤សែនរៀល៕ អត្ថបទ ស៊ុម សុខជា